Ads by Google Ads by Google

Tala I Vaifanua

SIITIA NISI AVETA'AVALE TAXI PASESE TOTOGI MO FEOAIGA

 

Ua i si nisi o le atunu’u ua latou fa’ailoa mai i le Samoa News a latou fa'asea e tusa o le fa'asalalauga faia e ave ta’avale o taxi stands i Tafuna, fa'apea, "Ua mae'a ona si'itia totogi o le feoa'i ai pasese.”

 

Ae ua fa’ailoa mai e le Matagaluega o Fefa'ataua'iga a le malo, e leai se si'itaga fou i tau o pasese i taxi.

 

O le ala o le vala'au mai, ona ua fa'ailoa mai e pasese nei, "Ua fa'ailoa mai e le au ave taxi nei, ua mae'a taua'aoina e i latou i le latou Ofisa o le Stand Taxi, le lisi o pasese e tatau ona i ai” i le siitaga fou.

 

Na talosaga le pasese i le ali'i ave ta'avale laititi na malaga ai, "Aumai lau lisi sei ta va'ai i ai ona fa'ato'a totogi lea o lo'u pasese sa na'o le $5 lea ua e si'ia i le $10 ona fa'ato'a ou manatu lea e totogia lau tau lena ua fa'ailoa mai."

 

O le tali mai a le ave taxi, o le lisi o lo’o i le ofisa autu.

 

E fautuaina le mamalu o le atunu’u o lo’o feoa’i i taxi, va'ai lau telefoni matagofie e pu'e se ata o le ave Taxi, pu'e ma le ata o si ana ta'avale ma le laisene ia maua lelei, sau e fa'aulu lau tagi i le Ofisa o Leoleo, poo le DOC.

 

AMATALIA FA'AMAUMAU FA'ATO'AGA I LE ASO TOFI NA TE'A NEI

 

E afua i le aso ona amata asiasia e le Matagaluega o Fefa'ataua'iga, lona vaega Fa'amaumau Fuainumera, ona asia le vasega o le Aufaifa'ato'aga ina ia mafai ona latou fa'atumua mai pepa ua mae'a tapena mo le Faitauga o Amerika Samoa e fa'asinotonu i le Aufaifa'ato'aga o le atunu'u.

 

O le fa'asilasilaga ua mae'a lomia ma fa'asalalauina mai lea Matagaluega, ua latou fa'atalosagaina ai le galulue fa'atasi mai o le mamalu o le Aufaifa'ato'aga ina ia fa'afaigofie le galuega tausailia o maota o i latou o loo ua lisia o le aufaifa'ato'aga i le atunu'u.

 

O le aoga fo'i o lenei pepa fa'atumu, o le a fa'amautu atili ai le pitola'au tausi a le aufaifa'ato'aga, o i latou e tua i ai le atunuu i lo latou fofoga taumafa, ma o nei fo'i fa'amaumauga uma o le a aoga tele mo le toe va'ai pe o a mai le tatou faitauga i nei mea uma i le tausaga ua mavae e fa'atusatusa ma faitauga o lenei tausaga, talu mai ona fa'atautaia le Faitauga tele a le atunu'u.

 

O le isi itu tele lava e aoga i ai nei fa'amaumauga uma, e matua fa'ailoa ai le taua tele o le Aufaifa'ato'aga ma le latou pitola'au tausi i le tausiga laulelei o le atunu'u atoa.

 

Ma le isi fo'i, po'o aga'i i luga le taumafaiga i atina'e a le aufaifa'ato'aga pe leai. O suiga o le a matauina i fa'amaumauga nei, ua mautinoa lava o fa'amaumauga i le 10 tausaga ua tuana'i.

 

Ua fa'aaogaina tele nei fa'amaumauga uma e suesuega aoga tele mo le aufaifa'ato'aga i polokalama eseese ua ofoina mai e le tatou Malo, ma polokalama fo'i o lo'o ofoina mai ai fesoasoani mo le aufaifa'ato'aga mai le Malo tele poo le Feterale.

 

O nei faamaumauga uma e aoga tele aua afai ae toe sofa'i mai le atunu'u e se afa tele po'o se Galu Lolo ma fa'aleaga ai fa'ato'aga ae ua mautu lea fo'i fa'amaumauga i lenei tausaga, e tau fua fa'atatau i ai le lusi ua o'o i ai lea faifa'ato'aga ma lea faifa'ato'aga. O mea uma e mafai ona fesoasoani mai ai le Malo Tele, e mita'i muamua lava fa'amaumauga patino nei mai fa'ato'aga ta'itasi a le aufaifa'ato'aga.

 

O fa'amaumauga taua uma nei o le a fa'amauina i nei asiasiga a le Ofisa o Fefa'ataua'iga o le a fa'amoemoe i ai matagaluega eseese i ni a latou polokalama e fia fa'atulaga, ae maise o le a aoga tele mo le aiaiga mai o nisi o fesoasoani taua mo le aufaifa'ato'aga aua o le a iloga mai mea ua lape ai se fesoasoani, ma mea fo'i ua matele i ai le fesoasoani. E le gata i lea o le a matua iloga lava le tulaga mana'omia o i ai le aufaifa'atoaga i nisi o tautua e aoga mai ai vaega eseese o le Malo tele.

 

Ua aofia Amerika Samoa i le faitauga fa'atulaga a le Iunaite Setete ma ona Teritori, ona o se maliliega sa mua'i faia i le va o le Matagaluega o Fa'ato'aga a le Feterale ma le tatou malo fa'alotoifale o Amerika Samoa, Matagaluega o Fefa'atauaiga.

 

Afai e fia fesiligia nisi mataupu e ao ina nofouta i ai le aufaifa'ato'aga a'o le'i asiasia i latou e mafai ona e fa'afesiligia lea tulaga i le vala'au atu i le telefoni 633-5155 ma fa'afesili le itu o Fa'amaumauga Fuainumera.

 

TAUNU'U AUMALAGA BYU-RHD - MO SUESUEGA O LE FATU

 

Ua i o tatou laufanua nei le au malaga o Foma'i fa'apitoa o le Fatu ma nisi o tausima'i e agava'a i le fa'aaogaina ma faitau fa'amaumauga mai masini ua fa'aaogaina mo suesuega o le fatu mai le Iunivesite o BYU, ina ia faia ni a latou suesuga mautu o le Fatu o le fanau talavou i a'oga.

 

E to'aono i latou na malaga mai e aofia ai le ta'ita'i o le ali'i foma'i fa'apitoa i le Ma'i Fatu, Dr Michael Meyers. Na malaga muamua mai fo'i le aumalaga fa'apenei mai le BYU i le tausaga ua tuana'i ma latou faia fo'i suesue fa'apenei, ma ua aofia ai ma ali'i ma tama'ita'i fa'apitoa e fa'agaoioia masini o suesuega o le fatu ma faitauina fa'apitoa fo'i latou fa'amaumauga.

 

O lo'o soso'o mai pea malaga a nei ali'i foma'i ma latou tagata fa'amaumau suesuega, ina ia mautu fo'i a latou fa'amaumauga e aoga mo i tatou iinei, ae maise fo'i i latou o lo'o tausaili togafiti i le gasegase tau le fatu o tagata soifua a'o talavou.

 

Ua lisia fo'i Amerika Samoa o le numera tasi i le lalolagi atoa i le to'atele o ona tagata ua matauina ua i ai lea ituaiga o ma'i fatu RHD.

 

O le aso Lulu o le vaiaso lenei sa amata ai asiasiga. Sa muamua i le Aoga Maualuga a Tafuna, soso’o ai ma Pavaiai Elementary ae fa’auma ia Tafuna Elementary i le aso Faraile, Me aso 3. Ua tatau fo'i ona i ai tusi ua mae'a sainia e matua ona fa'ato'a faia lea o suesuega i se tamaititi a'oga.

 

O lo'o galulue vavalalata lava le Aumalaga mai BYU ma le tatou Falema'i tele i Faga'alu, ma le Kuaea Group ma le Matagaluega o le Soifua Maloloina i lea fa'amoemoe lelei.