Ads by Google Ads by Google

Tala I Vaifanua


O le ulua'i sauniga ua fa'aaogaina ai le susuga Patele Tavete Maugaotega na te ta'ita'ia ina ua mae'a fa'au'uina o ia i le sauniga mamalu na faia i le aso Faraile na te'a nei. O lea sauniga sa ia ta'ita'ia i le aso Faraile ua te’a i le Malumalu Aiga Pa'ia i Fatuoaiga. [ata: foa'i]

O le susuga Patele Tavete Maugaotega ua ia fa'amae'a ona tiute i le ulua'i sauniga mamalu ua ia fa'atautaia. [ata: foa'i]

FA'AU'U TAVETE MAUGAOTEGA PATELE PULEAGA SAMOA PAGO PAGO

 

O le aso Faraiule ua te’a na fa'au'uina ai le tofi Patele o le sa mua'i avea ma Faia'oga a le malo o Amerika Samoa, peita'i na mua'i fa'au'uina fo'i lona tofiga Tiakono, ae o lea fa'ato'a fa'au'u ai lona tofiga Patele, le susuga Patele Tavete Maugaotega.

 

O Patele Tavete o se alo e fa'asino i le susuga le Fesoasoani Katoliko Tavete ma le faletua o Matagi Maugaotega lea ua tu'ua le mafutaga 2017, mai Tafuna.

 

O lenei fo'i ali'i Patele, o se taulaga lea sa fa'amoemoe tele nai ona matua e fa'aauauina le galuega sa la'ua gapatia a le Atua i tausaga e tele ina ua mae'a faigaluega i la'ua i galuega fa'ale-Kamupani, ma toe ofoina atu la'ua soifua e tautua o le Fesoasoani Katoliko i le Pule'aga Samoa Pago Pago.

 

O le taumafaiga a lenei alo e avea ma Patele, o se moemitiga a nai ona matua ae maise ai lava si ona tina, na amata fa'agasegasea tigaina mai ae ua o'o mai le la'ua auaunaga i le Ekalesia Katoliko i Aua, si'i ma'i ai i fafo ina ua fa'amama lona toto, peita'i fa'ato'a tu'ua lava le Malo i le 2017.

 

"O lenei taumafaiga uma, ou faia e vi'ia ai le Atua ina ia sao lava se mo'omo'oga autu o si ou tina lea ua le toe va'aia, ia avea a'u ma Patele e fa'aauauina le auaunaga a lenei aiga atoa mo le Atua,” o se tala lea a le ali'i Patele ina ua vaala'auina mo sona lagona fa'amauina.

 

O le tausaga lenei ua mae'a i ai le 9 tausaga o tulimata'ia mai lenei fa'amoemoe ia ausia, ma sa a'oga i le Seminare i Guam, si'itia i Mt Angel Seminare i Portland lea sa ia su'ea ai lona fa'ailoga o le Masters in Theology i le 2018.

 

O le sauniga mamalu ua fa'a'u'uina ai Maugaotega na ta'ita'ia e Bishop Peter Brown, ae maise o nisi o le aufaigaluega i susuga o ali'i Tiakono sa latou va'ava'alua i lea fa'atautaiga o lea sauniga o le fa'apa'iaga.

 

Ona o lea ua mae'a faau'uina nei Maugaotega mo le galuega ua tofia ai o ia e tautua i le St Joseph the Worker i Fagatogo e avea ai ma Sui Patele Ta'ita'i.

 

"O se fa'amanuiaga tele lenei mo le tatou Pule'aga, ona o lo'o fa'aopoopo mai pea lava alo o le atunu'u e avea ma Auauna a le Atua i le tovine. Ua iloga le tele fo'i o ala fita sa ia uia mo lona aoa'oina lelei mo le tofi ua ia tau'avea nei, o se fa'amanuiaga lea i le pa'ia o aiga fa'apea  le Ekalesia o le a tautua ai, ma le Puleaga atoa,” o se tala lea a Bishop Brown.

 

LE'ATELE - TULAGA TOLU TA'AVALE SOLAR & FAAALIGA HISTORY GROUP EXHIBIT

 

O le aoga tulaga muamua i Le'atele i Fagasa ua fa'alauiloa fanau a'oga e to'atolu na lautogia i le tauvaga a le STEAM i lenei tausaga, o le fa'aaliga lea o le Ta'avale e fausia ma fa'agaoioia e le malosi'aga o le Solar. Tulaga tolu ai le latou 'au tauva lenei o o Meapala Simanu, Jennifer Tusani ma Ilai To.

 

O i latou lava fo'i nei e to'atolu, ua toe fa'amanuiaina ai fo'i Le'atele Elementary i le tauvaga a le History Day ma sa latou mauaina ai le fa'ailoga mo le Faaaliga Fai To'atele "Group Exhibit" i lenei tausaga.

 

O i latou foi na faia lava le 'ai mo Le'atele ma ua latou fa'ailoa fo'i, "O le mea sili lava ua mafai ona fa'atino, ae fa'afetai tele lava i matou faia'oga sa avea ma matou faufautua i a matou taumafaiga uma nei e lua. Fa'fetai le onosa'i ia i matou ma le vaivai fo'i, a'o le ola taumafai ina ia maua se 'ai. Ua iloa e le o manumalo, ae fai aso le Ali'i, e toe oso fo'i le La,” o se tala lea a Meapala Simanu.

 

Mai le susuga le Pule Lua Rev. King Talamoni, sa ia fa'ailoa ai lo latou agaga fa'afetai tele ona o le taumafaiga ua au a nei fanau, "E le faigofie ona fa'atauva lenei to'aititi o fanau a'oga i le tatou aoga iinei ma le anoanoai o fanau a'oga i le 23 Aoga Tulaga muamua i le teritori nei, peita'i ua fili mai lava le mulia'a ma o se lagona fiafia ua matou fa'alogoina. Fa'afetai i le tima'i a ali'i faia'oga sa latou tautiga faatasi ma le fanau, fa'afetai fa'atoatoa."

 

O lo'o fa'amanatuina fo'i le vaiaso e fa'ataua ai Faia'oga uma i lea Laumua, ma sa fa'afiafiaina fo'i Faia'oga uma i le tapenaga a le tama'ita'i pule a'oga, ua ia faia ai le taumafaiga mamafa mo le vasega o faia'oga uma lava.

 

FUA FA'ATASI PAUNA O TAGATA MALAGA & ATO TA'ITA'I

 

O le malaga a le Hawaiian Air mai Honolulu i Pago Pago i le aso Tofi na te'a nei, sa fa'ato'a faia ai fo'i se isi taumafaiga fou a le Hawaiian Air ina ia maua tonu lava le mamafa atoa o uta ma tagata o lo'o femalaga'i i a latou va'alele, i le malaga mai ma le toe fo'i atu fo'i a latou va'alele.

 

O lea faiga e muamua lava ona fesiligia le tagata malaga, pe mafai ona fua fa'atasi lona mamafa ma lana alo ta'ita'i lea e malaga ma ia.

 

Ona o se fa'atulagaga a le kamupani Va'alele ina ia maua tonu lava le mamafa o uta ma tagata femalaga'i e fua fa'atatau i le aotelega o le kesi sa fa'aaogaina i malaga ta'itasi.

 

Ua fa'ailoa e le so’oupu a le Hawaiian Air, Ann Botticelli, "E le o se mea e faamalosia, peita'i e ao ina talosaga muamua i tagata femalaga'i pe malie i ai, ae tatau i le kamupani Va'alele ona latou aoina le aofaiga e 3,000 tagata femalaga'i, ia maua tonu le mamafa o uta fa'atasi ma pasese e fa'atusalia lea i le aotelega o le Kesi ua fa'aalu e le va'alele i lea malaga ma lea malaga."

 

Afai o le a to'atele i latou e le manana'o e fua fa'atasi i latou ma latou ato ta'ita'i, o le a suia le isi ala e maua ai e le kamupani va'alele a le Hawaiian Air a latou fa'amaumauga nei.

 

O le a faliu loa le Hawaiian Air e fa'aaoga le faiga masani o le fa'aaoga o le lona tolu pe lona fa o le tagata malaga ma fua ona pauna fa'atasi ma latou ato ta'ita'i, ina ia maua le aotelega o tagata lea e tatau ona fuaina e 3,000.

 

O le ituaiga suesuega lea e fa'atulaga e le Feterale ina ia fa'atautaia e ta'i tolu tausaa ma faia.

 

"Ua leai nisi fa'amaumauga e fa'amauina mo lenei lava suesuega, ua na'o le pau lea o fa'amaumauga e mana'omia ina ia fa'amae'a ona faia e le Hawaiian Air,” o se isi lea fa'amatalaga a Botticelli.