FA'AILOGA FA'APITOA MO LE  VASEGA FAAIUASO SAMOANA 2018

I lenei tausaga na taua'aoina ai fa'ailoga fa'apitoa na ausia e nisi o le fanau fa'au'u mai le A'oga Maualuga a Samoana ma ua lisia fo'i i latou ua fa'amanuiaina.

Fa'ailoga mo le Togisilia i le Vasega fa'ai'uaso e to'alua i la'ua ua ausia le GPA 4.0 mo Karlinna Suluama Lutu Sanchez ma Daisy-Rose Crichton. Tulaga lua o le tama'ita'i o Arizona Fa'api'o Sataua Tua.

Fa'ailoga mo le Taitai Lelei ma le Mata'alia ua maua lea e le tama'ita'i o Eseta Te'i. O le fa'ailoga mo le tamaititi sili ona amio lelei i le vasega atoa mo le tausaga atoa ua maua lea e le tama'ita'i Jenzel Angelica Cuison. Fa'ailoga mo le tamaititi ta'alo lelei ma le tausa'afia ua maua lea e Elliot S. Lelei ma le fa'ailoga mo le tama'ita'i ta'alo lelei ua maua lea e Adriana Puni.

O le faiaoga ua filifilia e le vasega fa'aiuaso ina ia mauaina le fa'ailoga o le "Faia'oga sili o lenei tausaga” ua maua lea e Fuaimamao Mageo-Tuvaiti.

Fa'ailoga mo le togisilia i le suega a le SAT ua mauaina e Kalinna Suluama Afoa Lutu Sanchez e 1400. O le fa'ailoga ua saunia mo le tulaga lua i togi o le suega SAT na maua lea e Danielle Taiula 1200,  ma le fa'ailoga mo le tulaga tolu i togi o le SAT ua maua lea e ene Sequile-Taulepeti Lefiti 1150.

Fa'ailoga o le togisilia mo le suega ACT ua maua lea e Karlinna Suluama Afoa Lutu Sanchez 29; tulaga lua i togi lava o le ACT ua maua lea e Lene Seaquile-Taulepeti Lefiti 22; ma le tulaga tolu ua taua'aoina lea ia Atauloma D. Sipeli'i 21.

Faailoga mo le togisilia i le su'ega ASVAB po'o le suega lea a le Militeri ua mauaina e Karlinna Suluama Afoa Lutu-Sanchez 96. Tulaga lua i le ASVAB ua maua lea e Danielle Taiula e 85 ma le tulaga tolu i togi o le ASVAB ua maua lea e Arizona Fa'api'o Sataua Tua 64.

O le fa'ailoga sili ona taua ua taua'aoina o le fa'ailoga lea mo le tamaititi a'oga e sili ona fa'afiafialoto lana amio tausa'afia i le vasega i aso uma ua maua lea e Norraine Faaaliga Aisoli.

AMATALIA KOSI A LE TAOA I TOMAI E FA'AAOGA AI KOMIPIUTA

O le ulua'i vasega a le TAOA mo le Kosi Komipiuta sa amatalia lea i le aso ananafi i le Faletusi o Feleti Barstow i Utulei.

O i latou ua auai e to'a 14 ua mae'a fa'atulaga mo lenei vasega muamua, o le to'atele fo'i o i latou o auai i le vasega lea, e le'i papa'i muamua lava i se Komipiuta i le olaga atoa. O lea la ua matua saunia i latou e susu'e le isi itulau i le olaga taumafai, ma ua fa'aalia e i latou lo latou fa'anaunauga, "Ia iloa fo'i e i matou pe aisea a o'o ina faifai mea tamaiti talavou ma vaega laiti i nei mea o Komipiuta, e te fiu e toe vala'au, ae ua matua mau ai o latou loto i a latou mea o faia ai. O le tele fo'i o tali e aumai e i latou, o lo'o faia latou mea a'oga."

I le amataga o le vasega o lo'o fa'atautaia nei e le susuga le faia'oga Komipiuta a le Faletusi, Loring Fa'iivae, sa tutula'i ai le sui ma fa'alauiloa lona igoa, ia po'o le a fo'i le mafuaga ua ia manatu ai e tau'avea lenei kosi.

O iina loa na fa'ailoa ai e le to'atele o i latou, "E fia iloa atu fo'i mea o lo'o vevesi solo ai le fanau talavou ma finau mai i le fia maua o ni latou Laptop, Ipad, telefoni omiomi e mafai ona fa'auia i ai le so'otaga o le Initeneti, o lo'o mana'omia nei masini e faia ai latou sailiga o fa'amaumauga mo le a'oga, ae o lea fa'ato'a maua so'u avanoa, a'u le matua o matua o le fanau o a'o'oga ma latou mo'omia Komipiuta."

Ina ua mae'a sa talanoa mai loa le ali'i faia'oga i le vasega, "Ia outou iloa, e moni uma mau ua fa'aalia e le fanau. O lea o le a tatou fa'ala'ititia le lalolagi, ia ofi uma lava i totonu o le masini ua e fa'asaga atu nei i ai, e matua iloilo lona fa'aaogaina, ina ia e iloa le anoanoa'i o mea sa le o'o i ai a tatou suesuega ae o le a e mafai ona maua uma i lenei masini, o mea lelei, atoa ma mea leaga!"

O lenei vasega e fa'atautaia mo le lua vaiaso, ona toe fa'ataoto lea pe soso'o le vasega, pe toe fa'atulaga se isi vasega fou, ae tasi lava le mataupu tau komipiuta e a'oa'oina, na'o le fa'alauiloaga o tomai amata o le fa'aaogaina o lau Komipiuta.

O le tama'ita'i o Merieni Gutu o lo'o nafa ma le vasega lea i lona so'otaga ma le Ofisa autu o le TAOA i Pago Pago, peita'i, ona e i ai le talavai fa'apitoa a le TAOA e faia ia Iulai 3, 2018 i le vasega o foma'i o lo'o asiasi mai le EAU Claire Medical Center mai South Carolina, e le motusia lava le vasega lenei, e fa'aauau pea le vasega, ae fa'ato'a va'aia e le foma'i fa'apitoa nei sui nei e to'a 14 ua amata le latou kosi, i le afiafi o lea lava aso.

O le vasega lenei e amatalia i le itula e 9:00am ae fa'ato'a mae'a i le 12:00 ma aga'i atu ai loa i latou i aiga, ae o le a i ai lava le sui mai le TAOA i aso ta'itasi ina ia mautinoa o aluga lelei mea uma na fa'atulaga mo sui o tama ma tina matutua, fa'atasi fo'i ma sui totino o le Faletusi ae maise le latou faia'oga o Loring Faiivae.