Ads by Google Ads by Google

Tala I Vaifanua

LE TOE MANA'OMIA SAINI PULENU'U PEMITA E ULUFALE MAI AI

 

O se tasi o mea na mana'omia ona faia pe a talosagaina se pemita e ulufale mai ai se tasi e le o se Amerika Samoa po'o se Sitiseni Amerika i le teritori, o le saini lea a le Pulenu'u, po’o Saini fo'i ma le Matai o le Aiga, po’o le Kovana Itumalo.

 

Ae o lea ua manatu le Ofisa o le Loia Sili, i le suiga fou ua fuafuaina e amata ia Aukuso 01, 2019, e le toe mana’omia ia saini.

 

I le taimi nei emana'omia ai ona saini le matai o le aiga, ma le pulenu'u i tagata asiasi mai i aiga.

 

Pau lava le mea o le a fa'amalosia nei i le faiga fou ua fa'atulaga, o le tusi folau o lo'o ua fa'amaonia lona lelei pea mo feoa'iga e aofia ai le taimi ua talsosagaina e nofo ai i Amerika Samoa, i ai ma le lisiti o le pasese e toe fo'i ai i le malo na e ulufale mai ai, po'o se fa'amaoniga o lo'o fa'aauau atu lau faigamalaga i se isi malo e ese mai Amerika Samoa, ae ua e uia le teritori i lau faigamalaga.

 

Ua pei lava ina lipotia muamua atu, o le totogi o le pemita ua si'itia mai le $40 i le $50 mo tagatanu'u Samoa Tuto'atasi mo le tolusefulu aso e alaala ai i Amerika Samoa, e mafai fo'i ona toe talosaga se isi 30 aso pe afai o le a toe totogia le isi $50.

 

E mafai ona maua kopi o lenei si'itaga fou o le totogi o pemita ma suiga uma ua fa'ailoa atu mai le Ofisa o le Loia Sili i Utulei po'o le Imei Tafailagi www.legalaffairs.as.gov/noticesdownloads.

 

Afai e i ai sou manatu e fia fa'aalia e tusa o lenei si'itaga o pili mo pemita ma tautua a le Ofisa o Femalaga'iga, e ao ina fa'ao'o atu sou manatu tusitusia ia Iulai 17, 2019, ae o le fa'amalosiga uma o nei si'itaga ua fa'atulaga mo Aokuso 1, 2019.

 

FA'ATONU FOU KOMITI FALEMA'I FA'AITUMALO AMERIKA SAMOA

 

O le susuga Kenneth Kuaea ua tofia e le Komiti Fa'afoe o Falema'i Fa'a-Itumalo - Community Health Center - e avea ma Fa'atonu fou mo lea komiti faafoe. E aofia i nei falema'i fa'aitumalo o falema'i i Leone, Tafuna, Amouli, Ta'u ma Ofu.

 

Ua mae'a sainia e Kuaea lana konekarate faigaluega i lea tulaga i le masina o Tesema 2018, ae le'i amatalia lava ona faigaluega ai i lona lea tofi, ona sa i ai nisi vaega na mua'i galue ai ma fa'amae'a i totonu lava o le malo.

 

Ona sa i ai ni faaletonu na matauina e le Matagaluega o Tagata Faigaluega a le Malo, na fa'atuai ai ona pasia lana Konekarate e amata faigaluega, ma na avea ma mea na faia ai fonotaga i le va o le Sui Kovana Lemanu Peleti Mauga, le fa'atonu o le Matagaluega o le Soifua Maloloina ma le fa'atonu fo'i o le Pulega o Tagata Faigaluega talu ai lea tofiga.

 

I le ulua'i fonotaga sa mua'i usuia i le Falema'i fa'aitumalo i Tafuna ma ta'ita'i uma o vaega ta'itasi o le Matagaluega o le Soifua Maloloina, na fa'alauiloa ai e le Faatonu o le matagaluega Motusa Tuileama Nua le ali'i fa'atonu o falema'i fa'aitumalo uma, ma sa ia fa'ailoa fo'i, "O lo'o ia te ia le agava'a ma le tomai fa'apitoa e va'ava'aia toto'a ai galuega uma ua tatou fa'atino mo le tautuaina o tagata lautele.”

 

O Kuaea e tusa ai o lona tofiga fou, sa ia fa'ailoa ai, "Ou te fa'afetaia le avanoa, ua ou maua e fa'ae'e ai se tautua mo tagata uma o Amerika Samoa. E tatau lava ona tatou galulue fa'atasi e fa'ataunu'u le auaunaga tatau ma le lelei mo nai o tatou tagata uma e afea i tatou ona o le fia maua o le fesoasoani tau le soifua maloloina. Afai e i ai se mea ua e silafia ua lape ai so'u faiva i le tatou galuega, afe mai i lo'u ofisa, pe avea fo'i le so'otaga tau Imeli e fa'ao'o mai ai ia te a'u lou fanoga. O la'u Imeli  kkuaea@doh.as.”

 

O lenei alo o le atunu'u na soifua a'e i Los Angeles i ona matua o Frank ma Mafa Kuaea, o i la'ua o nisi o tagatanu'u o le tatou nei malo, Amerika Samoa. Sa fa’auu o ia i le UC Berkley ma ua mae'a umia e ia le BScience i mataupu Pshycology. Ona sailia lea o lona Masters i le Public Administration i le BYU Marriott School of Business ma lona fa'ailoga fo'i o le Juris Doctor mai le BYU Law School, a'o avea o ia ma Epikopo i le LDS Ekalesia a Iesu o le Au Pa'ia i Aso e Gata Ai.

 

Ina ua taliu mai i Amerika Samoa sa Faia'oga i le Kolisi Tu'ufa'atasi, ma i'u ai ina avea ma Faufautua. Ona soso'o lea ma le avea ma sui fa'atonu Tagata Faigaluega i le Kolisi se'ia o'o ina fa'amavae ia Aperila 2018.

 

Ona galulue loa lea o i la'ua ma lona to'alua Louisa e fa'amautu le tele o Malaga a Foma'i Fa'apitoa e fia ulufale mai e fesoasoani i le mamalu o le atunu'u i gasegase tau le fatu, ua iloga ona a'afia tumau ai o tatou tagata nu'u, fa'apea fo'i ma le tele o isi fa'alauiloaga o gasegase tau Kanesa.

 

MAUA AVANOA FEFA'ASOA FAIFA'ATO'AGA TATOU MALO TAIWAN

 

O se avanoa na maua e le Fa'atonu sili o Fa'ato'aga Filifaatali Mike Fuiava ma le sui Fa'atonu Sili o le Komisi o Fefa'ataua'iga & Aganuu o le Malo o Taiwan, le susuga Mr Michael Tseng i le vaiaso ua te’a a'o le'i tu'ua le teritori. Sa fefa'asoa'i i ala e fesoasoani mai ai Taiwan i ni ala fou e totoina ai fa'ato'aga i Amerika Samoa.

 

Na faia sana asiasiga, ma ia ia fa'amautuina fo'i le lagona taua, e tele ala o le a mafai ona fefa'asoa'i mai Taiwan ia Amerika Samoa. O Michael Tseng e nofomau i lona Ofisa autu i Hawaii.

 

O le isi mataupu sa talanoaina o le tulaga ua matua fa'aitiitia lava le aofa'i o Va'a Fagota mai Taiwan ua afea le teritori e aumaia ‘ia mo le StarKist.

 

Fa'ailoa e Michael Tseng ua tele na'ua tulafono e fa'amalosia e le US Coast Guard, ua tau le gafatia ai e le tele o le i'a e fagotaina e latou va'a fagota, ona totogia ma fa'amautu atili i taimi uma.

 

Fa'ailoa mai e Michael Tseng, "E ioe lo'u manatu, e faigofie fo'i ona malaga nisi o le aufaifa'ato'aga Amerika Samoa i Taiwan ina ia maimoaina ala o lo'o fa'atino ai le totoina o fa'ato'aga i le matou malo, fa'apea ma ituaiga o fa'alelei eleele o lo'o fa'aaogaina, e fa'aleleia atili ai fo'i tomai mo le 'au fai fa'ato'aga iinei. O ala na e mafai ai ona feutaga'i i tatou o ta'ita'i."