TAMAITAI A'OGA SAMOANA - TOTINO KOMITI FAUTUA MO TALAVOU DELTA AIR

O le tama'ita'i talavou o Yasminna Sanchez o le Samoana High ua tofia e le Delta Air Lines Inc., e avea ma totino Komisi Faufautua mo Talavou ua fa'aigoaina o le Green Up Advisory Board a le kamupani va’alele.

O tiute o lea Kalapu ua fa'atulagaina ina ia sailia auala e mafai ai ona fa'aleleia atili le tautua a le Delta ina ia le afaina le saogalemu o le Siomaga. O lea polokalama ua mae'a fa'atulaga, ae ao ona mataituina ala e mafai ai ona fa'atumauina le lelei o lea fo'i taumafaiga.

O Sanchez, o se tasi e fa'asino ia Christina Lutu & Carlos Sanchez o Utulei, ma o se tasi o le to'a 16 o talavou sa tofia fa'apitoa e le Delta ina ia latou femalaga'i ma mita'i, fautua ma ia latou matua'i fefa'asoa'i i mea e tatau ona faia e le Delta e fa'aleleia atili ai ni fa'aletonu o le Siomaga ona o ni sao o le Delta i na a'afiaga.

Mai le taimi na filifilia ai Sanchez, ua matele ina fefa'asoa'i i latou ma le isi vaega o le kalapu i ala e fautuaina ai ai Delta ma latou talanoaina fo'i fa'afitauli ua latou matauina o lo ua tatau ona fautuaina ai le Delta.

Ina ua fesiligia lea mataupu ogaoga ae fa'ailoa mai e Sanchez, "O le fa'afitauli tau le tele o le Kaponi ua pua'ina mai i fafo e afi o latou ituaiga va'alele o faia ai latou faigamalaga i le ea, lea ua fautuaina ina ia fa'aaogaina ituaiga o fa'amama i a latou ala kasa o mafa o latou va'alele e fa'amama ai nei kaponi, ina ia le fa'aleagaina ai le siomaga."

Ua tele foi suiga ua mae'a ona faia e le Delta ina ia mafai ona usita'ia fa'atonuga ua mae'a fa'atulaga e le Komisi fa'apitoa lenei. Ua mae'a ona ave'esea uma pepa palasitika, ma isi oloa o ipu pepa una, o isi mea uma sa fa'aaogaina e o'o i ipu e tautuina ai mea taumafa ma vai taumafa i luga o va'alele ua mae'a kilia ese uma, ina ia usita'ia ai lea fo'i tulaga ua fa'atonuina ai i latou.

I le vaiaso o lumana'i nei, pe afai ae mae'a mai le tauaofiaga o ta'aloga a le Pasefika lea e tauva ai lenei tama'ita'i i le tu'uga va'a faila laiti, ona fa'ato'a maua lea o lona avanoa e lele atu ai i le Ofisa Tutotonu o le Delta i le aai o Atlanta, i le setete o Georgia ina ia auai i le latou ulua'i fonotaga lea e poto ai le latou to'a 16 ua mae'a filifilia, ma fa'amautu atili mea uma a le Green Up Youth Advisory Group.

O le tasi o komiti fa'apitoa mo lea Komisi Faufautua ma o le a maua le avanoa o Sanchez e fautuaina ai ma ta'ita'ia le komiti fa'afoe i le uluai fonotaga fa'apitoa a i latou ia Iulai 2019.

E TUTUSA TAGATA UMA I LE TAUTUA O LE SOIFUA MALOLOINA

Ua fa'ailoa e le tama'ita'i fa'atonu o le Polokalama Medicaid mo Amerika Samoa, Sandra King Young, "O lo'o tatau fo'i i tagata Amerika Samoa ona agava'a mo togafitiga lelei o latou soifua maloloina, ona o lea e tatau ai fo'i ona agava'a i latou ina si'itaga o le aotelega o pili e totogia e le Medicaid mo i latou."

O sana saunoaga lea sa faia ina ua feagai o ia ma le Konekeresi a Amerika i lana malaga fa'apitoa e taumafai ona si'itia se tupe fa'atulaga mo Amerika Samoa pe a o'o ina mae'a le si'itaga itiiti lea ua mae'a pasia mai e uma ia Setema, 2019.

O le malaga lea na matua saili ai e King-Young se avanoa e si'itia ai le fesoasoani lea a le Medicaid ma ua ia fa'ailoa ai, o le FMAP lea e i ai i le taimi nei mo Amerika Samoa e matua itiiti lava pe afai e tau fa'afetaui i le aotelega o le Medicaid mo setete eseese ma ua tatau lava ona si'itia le pasene mo Amerika Samoa mai le na'o le 55% lea e i ai nei.

Ua mae'a fa'ailoa atu fo'i e King-Young i le House Energy & Commerce i a latou komiti laiti lea e latou te fa'afoea tupe totogia mai e le Medicaid mo le ACA [Affordable Care Act] ua amata ona fa'afaigata ona toe fa'amatu'u mai se isi vaega tupe mo Amerika Samoa ona o aiaiga tamau o lea fa'atupega.

Peita'i e le muta lea fa'atupega ona o le aiaiga o el ACA, lea e fa'ato'a muta ia Setema 30, 2019, aua e le mana'omia se tupe faafetauia mai le faigamalo a Amerika Samoa.

Ta'ua e King-Young, afai ae leai se isi tinoitupe e fa'afetauia ai le vaega tupe o totogia e le Medicaid, e tele ituaiga o togafitiga o le a le mafai ona fa'aauau ona totogia. O ia togaifitiga e aofia ai le toe fa'aleleia o tulivae ma suilapalapa, togafitiga o le Ma'i Fatu lea e to'atele na'ua fanau ua maua ai, taotoga o fanau talavou o le atunu'u ma isi fo'i taotoga o le fatu, ma togafitiga o le Kanesa, ua le aofia i lenei vaega tupe e totogia mai e le Medicaid.

O se saunoaga ua lafo nei e le tamaitai fa'atonu o le Ofisa o le Medicaid, "E ao ina tutusa lelei le ituaiga o fa'atupega e maua e i latou o lo'o alaala i setete o le Iunaite setete uma lava ma i matou o lo'o nonofo ma togafitia gasegase i teritori laiti o le Malo tele."