Ads by Google Ads by Google

Tala I Vaifanua


Le tama'ita'i 10 tausaga ae ua fa'aalia lona alofa naunau tele i meaola, Ms Rylie Katina, le alo e fa'asino ia James Mose Katina & Chrissy Conway Katina o Nashville Tennessee, lea ua faia lana foa'i taua fa'atasi ai ma lona mana'oga i le lumana'i e fia avea o ia ma se Foma'i o Manu, e toe taliu mai e togafitia gasegase o meaola ma lo latou tausiga lelei. O lo ua tutu fa'atasi ma o ia ma nisi o sui uma o le Sosaiete a le "Alofa mo Meaola" i Amerika Samoa nei. [ata: Leua Aiono Frost]

RYLIE KATINA - FOA'I MO LE "ALOFA MO MEAOLA"

 

O le foa'i a le tamaita'i o Rylie Katina mo meaola o lo'o tausia fa'afagafao a le atunu'u i totonu o aiga, na fa'atautaia lea i le Faletalimalo o le Sadies by The Sea i le aoauli o le aso ananafi. O lana foa'i e aofia ai le tele o mea e aoga i le tausiga lelei o lau fagafao po'o le meaola i totonu o lou aiga. O nei mea ua aofia ai Kola, o vai ma fuala'au e fa'ape ai utufiti i maile ma pusi, o le tele o vaila'au ma tui e aoga i ma'i masani o meaola. O nisi o latou ituaiga o mea'ai e aoga i le soifua maloloina o lau ta'ifau po'o lau pusi o lo'o tausia fa'alelei i totonu o lou fale. O moega o pusi, ae maise o meata'alo e fiafia i latou e ta'a'alo ai, e fa'amalo ai latou nifo. O ituaiga o vaila'au e fa'ata'ele ai maile ma pusi, ma latou palanikeke fa'apitoa mo meaola ma latou ipu e a'ai ma inu mai ai.

 

O nei mea uma, oloa tau le tausiga lelei o meaola, ua taua'ao atu i le Sosaiete a le "Alofa mo Meaola!" ina ia latou taua'aoina i le Ofisa o le Foma'i o Meaola, po'o nisi fo'i ua latou va'aia e i ai le mana'omia e fia maua mo a latou fagafao.

 

E le na'o Rylie na malaga a'e e faia le foa'i. Ona sa molimauina e si ona tina le galuega tele a Rylie sa faia i Nashville Tennessee, o lana sailiga tupe sa ia fa'atuina ai le laulau Fa'atau Vaitipolo ma ana oloa e fa'afiafiaina ai fanauiti, ina ia mafai ona fa'atauina mea foa'i mo meaola i Amerika Samoa nei.

 

"O a'u na ou mana'o e faia le foa'i lenei mo meaola, aua e tatau ona tausia lelei meaola, so'o se manu lava o tausia i lou aiga, aua e tatau ona tausia lelei i latou ma le alofa. O i latou fo'i o meaola na faia e le Atua e i ai lo latou aoga i le tatou soifua fa'atasi ai i lenei lalolagi,” o sana tala lea ma le fiafia.

 

O Rylie e 10 tausaga le matua. O ona matua o James Katina ma lona tina o Chrissy Conway Katina mai Nashville Tennessee. O le tala fo'i a lenei tama'ita'i talavou ma le sogasoga i mea lelei mo meaola uma i Amerika Samoa, "Ou te mana'o e avea a'u ma foma'i manu i le lumana'i, afai fo'i ou te toe sau i Samoa nei, e toe taumafai fo'i mo se isi taimi e foa'i ai."

 

O le tama'ita'i o Tina Tofaeono sa avea ma sui o le Alofa mo Meaola e avatu le fa'afetai ia Rylie ma ona matua ona o lenei foa'i taua. Sili ona fa'afetaia, e i ai le agaga o Rylie e avea ma se foma'i manu mo le lumana'i.

 

TAPUNIA GALUEGA KAMUPANI STARKIST I LE VAIASO LENEI

 

Ua fa'ailoa mai o le a tapunia galuega a le StarKist Samoa mai ia Iuni 29, se'ia o’o ia Iulai 7, ona toe amata lea o galuega ia Iulai 8.

 

Fa’ailoa e le so’oupu a le StarKist, le tamaitai ia Michelle Faist, o le tapunia o galuega mo lenei vaiaso atoa, o se fuafuaga ua ma’ea fa’atulagaina mo le masina o Iulai ina ia toe siakia lelei masini ma le fa'agasologa o le galuega.

 

"O le mea taua fo'i lea e ao ai ona matua toe va'aia fa'alelei mea uma e fa'atautaia ai galuega a le Kamupani pe ua lelei atoatoa mo lea fa'amoemoe se'ia o'o atu ai i le fa'aiuga o le tausaga ma ona aso malolo fo'i."

 

TU’UA E KOVANA LOLO IA SEATTLE

 

O le vaiaso ua te’a na taunu’u ai le afioga i le Kovana Sili, Lolo Matalasi Moliga i Honolulu, ma o lo'o malolo ai mo nisi o talavai ae le’i toe taliu mai i le atunu’u, i se vaitaimi o le masina lenei.

 

Na tu'ua e Lolo le teritori i le masina o Fepuari, ina ia auai i sana fonotaga i Uosigitone D.C. peita'i o lana faigamalaga lena na fa'atutu atu ai mo ana talavaii Seattle Washington ma o lea fa'ato'a toe taliu mai ai ina ua mae'a lelei lona taotoga, ma toe fa'ataga mai e ana foma'i.

 

Ua fa'ailoa mai fo'i i le taimi nei e se tasi o le aufaigaluega i le Ofisa o le Kovana, "O lo ua i ai fo'i togafitiga o fatuga'o ua faia mo ia i lenei vaitau, peita'i o le fa'afetai o lo'o malosi lava le loto o le afioga le Kovana e toe fia fo'i mai i le atunu'u ona o tiute e ao ina faia ma fa'auma lelei lana nofoaiga."

 

E ui ina nofo le tino i fafo, ae o taimi uma lava i aso faigaluega ta'itasi, o lo'o feso'ota'i Lolo ma le afioga le Sui Kovana Lemanu Peleti Mauga ma lana au faigaluega sinia, i le tele o fa'aiuga e tatau ona faia i le fa'atautaiga o le Malo.

 

TATALA LE FALEPUIPUI FOU O SAMOA I TANUMALALA

 

I se lipoti mai Samoa, o lo’ fa’ailoa ai o le aso Faraile i Samoa na tatala ai le Falepuipui Fou i Tanumalala e pei ona mae' fa'atulaga ai e le Malo o Samoa.

 

Ua fa'ailo i se saunoaga a le afioga le Palemia lea falepuipui, “O se nofoaga e fa’amalosiau ai ma toe fausiaina ai olaga ma tu’uitiitia ai le solitulafono.”

 

O le tele o lea falepuipui e aofia ai i totonu le 6 sela, lea ua fa'atulaga e 4 sela mo Ali'i ae tasi fa'aavanoa mo tama'ita'i ma le isi mo isi o lo'o faao'o atu e taufia le tumau, ma le isi vaega atoa o lo'o fa'atulaga mo pagota ua matuia tele a latou soligatulafono ua saisaitia ai.

 

O le Falepuipui atoa lenei, o lona tau aofai e $18.miliona (Tala Samoa), ma sa fausia lea e le Kamupani Siamani o le Schwarz Construction Samoa. Ua fa'ailoa mai fo'i e tusa ma le 500 eka ua fa'amatu'u atu nei i le Samoa Prison Correctional Services ina ia latou fausia ai lenei falepuipui fa'atasi ai ma le eleele e fa'atautaia ai nisi o polokalama fa'apitoa mo pagota, e toe tau fa'amasani ai i le olaga sa masani a'i a'o nonofo ma latou aiga, a'o le'i nofosala.

 

O le tinoitupe lea na fa'aalu e Samoa mo le falepuipui e ese mai le sao o le malo o Iapani na fesoasoani ane ai ia Samoa e tua lea ma le 10%o lea aotelega.