Ads by Google Ads by Google

Tala I Vaifanua: Loka Faleoloa TSM e le Matagaluega Soifua Maloloina


O se vaaiga i le fa’ailo i le faitotoa o le faleoloa o le TSM i Tafuna, tapunia e le Matagaluega o le Soifua Maloloaina, ma e le o mautinoa pe o afea e toe tatala ai. [ata: Leua Aiono Frost]

O le aoauli ananafi na matauina ai le tapunia pea o faitoto'a o le faleoloa a le TSM i Tafuna - tuaoi ma le ASPA.

 

I le itu i tua o le faleoloa, i le avanoa e soso'o ma le isi faletele, ua vaaia le fa'apotopoto ai o le aufaigaluega. Ua fa'ailoa mai e i latou o lo'o ua toe tatalia ai ali'i mai le Matagaluega o le Soifua Maloloina (DoH) pe ua talafeagai ona toe tatala le faleoloa mo pisinisi masani.

 

I le ta tonu ai o le 12:30 i le aoauli ananafi, e le'i maua atu lava se tonu. Ua taumafai atu fo'i se feso'ota'iga ma le Ofisa o Ali'i Pasi faleoloa a le DoH ina ia maua se tala i le mafuaga na tapunia ai, po'o a fo'i tulafono maoti ua solituina e lea faleoloa tele ma le fou, ae ua le mafai ona talanoa mai se tasi o ta'ita'i i le tatou nei nusipepa.

 

O lenei fo'i le faleoloa tele e fou ma e matele ina o i ai le to'atele ona e matua tele oloa e mana'omia e aiga Samoa o lo'o fa'atauina mai ai, ma ua matauina fo'i e matele ina lelei ma fou a latou fuala'au 'aina mata i taimi uma e tatala ai.

 

2 ASO FONOTAGA FA'ALEAOAOGA  - FA'ATALANOA SAUAGA I AIGA MA ISI

 

Ua so'ofa'atasi nei tau'au o le Pacific Island Primary Care Association (PIPCA) mai Honolulu ma le American Samoa Alliance Against Domestic & Sexual Violence (ASAADSV), le paaga mai Guam Coalition Against Sexual Assault  ma le tatou Ofisa Autu o Pulega o Falema'i fa'aleitumalo uma i Amerika Samoa ina ia faia aoaoga fa'apitoa mo i latou e muai talanoa i e ua sauaina ma ua sulufa'i mai ona o le fia maua o se fesoasoani.

 

O le fa'atalanoaga ua mua'i faia nei, ina ia tima'ia le to'atele o i latou e tatau ona aoga i ai i lenei a'oa'oga fa'apitoa, ina ia o'o mai e auai fa'atasi ma fetufa'i i ala ua fa'atautaia ai fo'i galuega tima'i a Guam ma isi teritori o le vasa pasefika, ina ia fa'aleleia atili ai le tautuaina o tatou tagata ua a'afia i nei fo'i ituaiga o sauaga.

 

O le vaega a le PIPCA, o nisi na ua mae'a fesoasoani mai i o tatou falema'i fa'aitumalo ina ia va'aia lelei o tagata e faia talavai i le Primary Care, peita'i ua fa'ailoa e le susuga le Faatonu o lea tautua, "O le taimi muamua lenei o le a latou fesoasoani ai i ala e mafai ona faufautua ma fetufa'i ai i ni fa'atalanoaga e aoga tele mo i latou e sulufa'i mai ona o a'afiaga ma sauaga tau tulaga fa'ataumaoia fa'aleituaiga i totonu o aiga po'o nisi fo'i mafutaga eseese ua faatasia i ai tagata e to'atele."

 

Ua faatulaga e le Ofisa o le CEO o Falema'i fa'aitumalo Kenneth Kuaea le fonotaga lenei mo aso e lua. O le ulua'i aso o le a talanoaina ai fa'atalanoaga amata mai i totonu o falema'i, pe afai ua matauina nisi ua sauaina e ali'i ma tama'ita'i foma'i. O ala e mafai ona sailiilia atili ai afaina, ae maise o ni fa'afesili fo'i ma ala e fa'ao'o atu ai se fesoasoani amata i le ua aafia i sauaga, ae le mafai ona talanoa mai.

 

O sauaga ua mae'a fa'ailoa mai e aofia i nei ulutala lavelave, ua a'afia ai le sauaga fa'aleituaiga o fanau ma tina i totonu o aiga. O lona uiga ua solituina fo'i aia tatau a le fanau ma tina e soifua fiafia ma le puipuia lelei i totonu o le li'o o le latou aiga.

 

O nisi o sauaga o le fa'amalosia lea ona fa'atino feusua'iga, ae le o loto i ai le tama'ita'i talavou po'o le tina. Ua i ai fo'i nisi o sauaga ua a'afia ai tama po'o ali'i i lenei ituaiga o sauaga, ma ua le va'aia na'i tama'ita'i le a'oa'oga lenei, ua soo se tasi lava, ali'i po'o tama'ita'i ma fanauiti.

 

Peita'i ua aofia mai ai ma le isi sauaga ua fa'ailoa mai nei, "Sauaga Fa'aleituaiga Fa'apa'aga" o lona uiga ua sauaina lava le tina e lona to'alua, po'o lana pa'aga e le'i fa'aipoipo, ma e ui ina musu e faia ni feusua'iga, ae ua fa'amalosia lava e fa'atino ona o le mana'o o lana pa'aga.

 

O nei mea uma e mafai ona talanoaina le aia tatau a le tagata e soifua ai ma le fiafia i lona olaga a'o soifua, ma ua faia le maga lua lea o le a'oa'oga i le aso Tofi. 

 

Ona o le ulua'i aso ananafi ua fa'atulaga lea mo le au fa'asalalau ina ia mautinoa ua silafia e le to'atele nei aoa'oga taua, ma ua na'i e foma'i ma alii leoleo o le Malo ua fa'ataga i ai, peita'i ua fa'ailoa atu fo'i mo le vasega o faia'oga, aua o i latou e nafa ma le fanau talavou i vaitaimi o a'e ai a'oga, e latou te va'aia fo'i uiga fa'aalia o fanau o lo'o sauaina.

 

Ua aofia fo'i Faife'au ma Faletua pe afai e manatu i latou e fia maua lea sosia fou ma ala ua fetufa'i ai ma i latou ua matauina o i ai fa'aletonu i totonu o aiga.

 

"O le toatele lava o nei sui e fia maua mai ina ia fa'aauala i ai se fesoasoani, o i latou e le o mafai ona tula'i mai ma fa'ailoa o lo'o latou mana'omia se fesoasoani. E matele ona o le ma ina ne'i fa'alauiloa fa'alautele le igoa o lona aiga ma ia fo'i o mafatia, ae ua le manatu ai i le isi uso a tagata ina ia toe a'afia fo'i i lea mea e tasi e matua tigaina ai,” o se tala lea a le tama'ita'i o Judy Mata'utia, o le ASAADSV.

 

Ina ua fesiligia le AADSV i se aotelega o nisi ua mafai ona latou fa'atalanoa ma ua fa'auia i ai e i latou fesoasoani ina ia le toe a'afia ai i sauaga, ae ua fa'ailoa mai, "O le matou matafaioi o le fa'atalanoa amata, matou malamalama lelei lea i le fa'afitauli, ona fa'auia loa lea o i latou na i polokalama ua mae'a saunia e le tatou malo, ina ia fesoasoani ai i le latou pagatia, ma ia mautu ai lo latou saogalemu."

 

O lenei fo'i fonotaga fa'aleaoaoga, o le a fa'alogologo ai uma i latou o le a auai, i ala ua fa'aaogaina fo'i e Guam i a latou fa'atalanoaga amata ina ia fa'auia tonu le mamalu o a'afia i sauaga i polokalama ua mae'a fa'atautaia i totonu o le latou fo'i teritori ina ia fa'ao'o atu se fesoasoani. O le tele o nei fesoasoani e maua mai i le Matagaluega o Alamanuia mo Tagata Lautele a Amerika Samoa.