Ads by Google Ads by Google

Tala I Vaifanua


O se vaaiga i totonu o le Fale Mataaga fou ina ua tatalaina i le aso ananafi. O lo’o teu ai measina a le atunu’u. [ata: Leua Aiono Frost]

TATALA GALUEGA E TOLU I LE TALAFATAI  O FAGATOGO

 

E tolu galuega a le malo sa tatalaina i Fagatogo i le aso ananafi lea na auai sui o le malo ae maise le Kovana Sili, Lolo Matalasi Moliga.

 

FALEMATA’AGA J.P HAYDON - AOFAGA I AI MEASINA A LE ATUNU’U

 

Na amata mai i le tatalaga i le Fale Mata’aga e aofaga i ai le tele o measina a le atunu’u e fa’amautu i ai. Sa ta’ita’ia lea e le afioga Moseniolo Viane Etuale, o ia fo’i sa sausauina le Maota atoa.

 

Sa ia fa’ailoa ai, “O i tatou o tausimea a le Atua i le olaga nei, afai ae le’i fa’aaogaina e i tatou nei mea uma ua fausia mo le fa’amoemoe e fa’aleleia ai le soifuaga o fanau i le lumana’i, se’i tatou matau muamua i le Atua, o ia na alofa mai.”

 

O le galuega lea na fausia e le Matagaluega o Galuega Lautele ma e lua lelei tausaga o fausia lava le galuega lea. O le ata o le fale, faatasi ma le fausaga, na fa’atino uma lava e le Matagaluega.

 

I se saunoga a le tamata’i faatonu o le matgaluega, Faleosina Voigt, sa ia manatu ai e fa’aalia uma lana aufaigaluega a le Maintenance lea sa galulue punoua’i i lenei galuega. “O la’u aufaigaluega lava lenei, o i latou sa tatau ona fa’aagaaga mo galuega toe fa’aleleia o isi matagaluega uma o le Malo.”

 

O le lipine na o’otia lea e le faletua Cynthia Moliga, ina ua mae’a fo’i se tautalaga a le afioga le Kovana Sili, lea sa ia fa’ailoa ai, “O nei galuega o mea e ao ina faia e le Malo. O nei galuega toe fa’aleleia atili, ina ia fa’aleleia mea o lo’o ala mai ai manuia i le atunu’u atoa ma fa’amatagofie ai le afio’aga nei i le Fagaloa, lea o lo’o taula mai uma i ai mea e fai a le Malo.”

 

“O le mea sili i nei galuega uma, a maua ai se vi’iga o le Atua, o mea lelei ma galuega lelei na. Ia le gata ai lea, ae aoga i tagata uma,” o sana saunoaga lea.

 

Na taua’aoina e Voigt le Pemita e mafai ai ona fa’aaogaina lenei fale e fa’amautu ma “Fa’aalia ai Measina a le Atunu’u.” I le lipoti na fa’aalia ai le aofaiga o le tupe na fa’aalu i le Fale Mata’aga e $800,000. e aofia ai ma le soso’oga o le faletuai e toe fa’aleleia ma e le’i mae’a lelei totonu, lea ua fa’aalu ai le $400,000. maua ai le tau aofai o le Fale Mata’aga J. P. Haydon e $1.2 miliona. O le kamupani ua latou fa’akonekarate mo lea galuega o le Paramount Builders e ese mai le Matagaluega o Galuega Lautele.

 

O le ata i le lumafale o le Fale Mata’aga sa tusia lea e le ali’i Atisi ta’uta’ua o Amerika Samoa Sven Ordquist, peita’i o le toe fa’afouga o le isi vaega o le falemata’aga ma le fale fou fo’i ua tutula’i, ua toe valia ma tusia fa’aleleia e le tama’ita’i faia’oga Atisi o Regina Meredith.

 

FALE KOLENIGA MATAGALUEGA O LE PUIPUIGA O LE SAOGALEMU

 

O le galuega lona lua sa tatala ananafi, o le Fale Koleni mo le vaega o leoleo, i tua o le Fale Tinei Afi i Fagatogo. O le lipine fo’i sa ootia lea e le faletua o le afioga le Kovana Sili. O le tatalo ma le upu fa’amalosi sa saunia lea e le susuga le Faife’au Toeaina CCJS Fa’amao Asalele.

 

Ona o le susuga fo’i le Faife’au toeaina o se tasi sa mua’i avea ma “malu o le Malo” ma sa i’u ane lana tautua ua avea ma Ta’ita’i Leoleo, o lea sa ia matua tima’ia ai le mamalu o Leoleo a le Malo, “Ia to’aga e fa’amalositino, fa’aaoga nei masini fa’aonaponei ua outou maua, ina ia avea ma ala e fa’aleleia atili ai o outou tino e feagai ai ma tiute ua mana’omia ona outou faia i so’o se taimi e vala’au mai ai le mamalu lautele o le atunu’u. Aua ne’i fa’atuai lau tali atu, ona ua le lava lou malosi.”

 

O totonu o lea fale fa’apitoa mo Koleniga a Leoleo, ua aofia ai masini tamo’e e 6 ma le masini si’isi’i tele e tasi. Ua fa’avasega fo’i ona uamea mamafa ina ia fua i ai le mamafa e ao ina si’isi’i ai le vasega o leoleo. O se faiga fou e le tau tamoe mamao ai i luga o alatele, a e ua faia ina ia i totonu o lea potu fa’aea malulu ma e koleni ma tilotilo i lou ata i le fa’ata, e iloga ai se suiga lelei mo oe.

 

E pei ona saunoa le kovana “O le maliu o le afioga le Tama a le Malo, na va’aia ai le faigata o tino ua i ai le vasega o leoleo, toetoe a le mafai ona si’i le va’a o le afioga le Tama a le Malo. E tau fa’atala sua lava saunoaga i lena aso, ae ua tu mai le mafaufau e ao ina faia se suiga lelei mo se nofoaga fa’apenei e fa’aaoga e Malu o le Malo, se’i toe fa’afo’i mai le tino pa’e’e ma le gafatia tuli tamo’e nisi e fia maua mai. Ia o le a le na’o o outou, ae maua fo’i se avanoa mo le mamalu i fa’afeagaiga o le afio’aga, e fa’aaoga ai a’o tou faigaluega.”

 

O le tau aofai o lenei galuega e $240,000. i le Kamupani sa fa’atino fo’i le galuega mo le Maota o le Matagaluega o Leoeo, le Nana’s Construction Company mai Pago Pago. O lea vaega tupe na toina mai lea mo galuega fa’apitoa a le Malo e fausia ona ua finagalo i ai le Kovana Sili.

 

TATALA LE PAVILI MA LE “MALAE O LE TALU”

 

O le toe galuega na tatalaina o le Pavili na fa’afou ma le Malae o le Talu ua fa’asima sona vaega mo le pakaga ma le fa’afaigofie o feoa’iga ma fela’ua’iga o mea e fa’aaoga i taimi e fa’aaogaina ai le Malae o le Talu i fa’atasiga a le Malo, fa’apea ma le afio’aga lea ua tatala fa’apitoa i ai le avanoa e le afioga le Kovana sili. [Tala fa’aauau lomiga aso Lua]