FA’AOPOOPO $18MILIONA - TUPE MAUA MAI LE AFA O GITA

O le aso Faraile na te’a nei sa fa’ailoa mai ai e Kovana Lolo Moliga ua toe i ai le $18 miliona fa’aopoopo mo aiga lima vaivai o Amerika Samoa, sa afaina o le afa o Gita ia Fepuari 2019. O lea vaega tupe mai le Matagaluega o Fa’ato’aga (USDA) a le fetarale.

Fa’ailoa le agaga fa’afetai o Kovana Lolo Moliga ona o lenei foa’i fa’aopoopo ma ia fa’afetaia le Failautusi o le USDA Sonny Perdue fa’apea ma le ali’i Pule i le Region 9 o aofia ai fo’i Amerika Samoa, Jesus Mendoza.

O le vaega tupe lona lua lea mo Amerika Samoa. O le vaega tupe muamua e  $500,000 na agava’a i ai le 2,300 o tatou tagata.

O lo ua taoto lenei vaega tupe tele ua taua’aoina nei i le vaega a le ASNAP ina ia tufatufaina i le lautee e agava’a. O le masina fou ia Oketopa o le a fa’ato’a fa’alauiloa aloa’ia ai e le ASNAP le ala e fa’auia atu ai lenei alamanuia mo le mamalu lautele o lo ua agava’a ai.

O le a latou fa’ailoa mai fo’i mea uma e tapena atu ai mo le fa’atumuga o talosaga mo nei fa’atupega. O le a lisia mai fo’i ituaiga fa’amaumauga mo sui e talosaga e ao ina tauaaoina ma nofoaga o le a fa’atutumu ai talosaga mo nei fa’atupega.

TOATELE AIGA & UO MAMAE -AUAI TOE SAUNIGA ALEX & ANTHONY

I le aso To’ona’i na te’a nei sa fa’atautaia ai le sauniga e fa’amanatu ai le soifuaga talavou na ola fa’atasi ai Alex Peric ma Anthony Leota faatasi ma o la’ua aiga.

E ui fo’i i le faigata o lagona ootia ona o le mafutaga ua tete’a fa’afuase’i ona o le oti, ae le’i fa’avaivai ai molimau na fofogaina mo le la’ua toe sauniga. Na o mai fa’atasi aiga, o a’oga ae maise o le ekalesia ma la’ua uo mamae ina ia molimauina o la’ua soifua.

O le matafaga i Utumea i sisifo, fa’atasi ai ma le Maota Talimalo o Paepae i Utumea lava.

I se talatala a le tina, sa ia fa’ailoa ai si ana tama, “O se tamaititi e ola tuto’atasi lava, e fiafia e faia ana fa’aiuga e talafeagai ma lona ola usita’i i fa’atonuga, e le o se tasi mitavale pe so’ona saunoa ae o ia e fiafia tele e fesoasoani i isi talavou. O le a faigata ona galo ia te a’u Alex.”

I le agaga tonu o le sauniga sa fa’atulaga e matua ma fanau, ae maise o le pa’ia o aiga, sa fa’atautaia o se toe fa’amanatuga o i la’ua, o nisi ua mae’a papatisoina, ina ia silasila i ai fofoga o le Atua, ma fa’aolaina.

O le ala lea o pesega matagofie ma molimau o tautinoga soifua pea o le ola o nei fanau talavou. O le fa’afetai fo’i sa lagona i molimau a matua, ona ua mae’a papatisoina i la’ua, ua saunia fo’i i la’ua mo le ola e fa’avavau, fa’afetai na ona mae’a lava o lea sauniga, ae amia loa la’ua soifua, ua muta ai le sailiga i lenei lalolagi.

O Aukuso 18 lea na leiloa ai i la’ua i le sami, ma ua le toe maua lava o la’ua tino. Ua mae’a fo’i sailiga a le Matagaluega o Leoleo mo le 72 itula, ae ua leai lava. Fa’ailoa e si ona tina, “Na va’ai atu lava i matou o fa’aopeopea mai i la’ua, aua e na’o Anthony na mua’i a’afia i galu ma ua va’aia e Alex ua ia mana’omia le fesoasoani, ma oso atu i ai e tau lavea’i mai. Peita’i e tusa ma le 40 minute o va’aia pea i laua i gatai, ae e toe va’aia loa, ae le’i o’o atu le va’a fesoasoani mai le matagaluega o leoleo, e fa’asaoina mai i la’ua, ona e mamao fo’i Utumea i sisifo.”

Na fa’au’u Alex Peric mai Tafuna High, ua sauni mo le a’e i le Kolisi Tu’ufa’atasi, peita’i o Anthony Leota ua sauni mo lona toe tausaga lenei i le Samoana High School. O i la’ua e tau fai lelei uma i le ta’aloga Football ma e auai i la’ua i le Polokalama Football a le JPS.

SUIGA I AIAIGA - PEPA MEA’AI POLOKALAMA FOOD STAMP

Ua fa’ailoa e le ali’i fa’atonu o le Matagaluega o Alagamanuia mo Tagata Lautele, DHSS, Muavaefa’atasi John Suisala, nai suiga o le a fa’atautaia ai le polokalama a le Food Stamp i lenei tausaga fa’aletupe o le a savalia.

Fa’ailoa e Muavaefa’atasi i le iloiloga o le tupe fa’asoasoa a le DHSS i luma o le Fono Faitulafono e faapea o se tasi o aiaiga o le a suia i le tupe maua e agava’a ai le tagata i le Food Stamp. O le maualuga o le tupe maua a le tagata e agava’a ai e $1,008 i le masina.

Ae i le tausaga fa’aletupe fou 2020, e amatalia ia Oketopa 1, 2019 o le a toe suia ai fo’i le aiaiga tau le tupe maua a le sui e fia talosaga mo le polokalama a le Food Stamp. Ua agava’a nei le to’atele o lo’o maulalo le tupe maua i le $1,718.00 ma ua lagona le fa’afiafiaina o nai tagata matutua lea fo’i ua agava’a ai ona o lea suiga i le taimi nei, ma o i latou uma sa le agava’a ona e maualuga atu latou tupe maua i le $1008.00 lea ua agava’a nei.

O le tupe faasoa a le DHSS mo le tausaga fa’aletupe 2020 ua tula’i mai e $25miliona ae fa’atupe uma mai lava e le Feterale.

3 TAMAITAI SAMOA - FA’AU’U ALC USARMY FORT LEE, VIRGINIA

Ua logoitino fo’i matagi lelei ina ua logotala mai nisi alo tama’ita’i e to’atolu sa aoaoina fa’apitoa i tiute ma faiva e tautua ai i le USArmy i Fort Lee i Viginia, lea ua latou pasia a’ia’i lea ituaiga o a’oa’oga ina ua mae’a le latou Basic Training mo le ulua’i tolu masina talu ona tauto i le vaega au.

O i latou nei o Sgt. Sailelagi Manu mai Afonotele, Amerika Samoa i lana vasega o le 92A 19-008 ua mae’a nei ia Aukuso 24, 2019. O le a tiute nei o ia i Wheeler AAF, Hawaii

O le kosi lava lea e tasi na tau’avea fo’i e le tama’ita’i o Sgt Shanli Lin mai Utusi’a Fagaitua, ua mae’a lelei fo’i ma o le a tiute nei o ia i Wheeler Army Airfield Field, Hawaii.

Peita’i o le lona tolu o i latou nei o Sgt. Marcella Malufau mai Futiga Amerika Samoa, ua ausia fo’i lea la’asaga matagofie ma o le a tiute nei o ia i Camp Harold, South Korea.

O i latou nei sa vasega fa’atasi mai, ma na’o i latou fo’i alo o Samoa sa auai i lenei vasega faapitoa.

O Sgt Sailelagi Manu o se alo e fa’asino ia Manu Lealai ma le faletua o Sailelagi Manu. Peita’i o Sgt Lin, Shanli, o le alo e fa’asino i le tama’ita’i o Laula’au mai Utusia Fagaitua ma Cheun Shen Li mai Taiwan/Fagaitua.