Ads by Google Ads by Google

Tala I Vaifanua


Foma’i fa’apitoa o le ponaivi i le falema’i o le LBJ, Dr John Edwards, au fa’atasi ma le ali’i na malaga fa’apitoa mai le Zimmer Biomet e va’aia le tu’ufa’atasiga o le masini mo ta’aotoga ma ua ia a’oa’oina fa’apitoa fo’i nisi ina ia mafai ona malaga ese o ia. O kimberley Lutu Fuiava sa maimoaina le taotoga e aoga mo ana aoaoga o loo fa’agasolo nei. [ata: Leua Aiono Frost]

O le ulua’i taotoga o le suiga o le tulivae ua faia i le tatou falema’i LBJ i Faga’alu ua mae’a lelei ma ua sauni fo’i le sui e ona lea ta’otoga e alu i le fale i le aso e soso’o ai, ina ia talitalia ai le fa’asolosolo manuia o lana savali e ta’u aogaina ai lona taotoga.

 

O le aso Lua o le vaiaso lenei sa amata ai le taufua fou lea a le LBJ, i lalo o le ta’ita’iga a Dr. John Edwards.

 

Ua molimauina e le tama’ita’i foma’i fa’ata’ita’i, po’o se tasi o lo’o fa’agasolo ana a’oa’oga fa’apitoa e avea ai ma se foma’i pasi, Kimberly Lutu Fuiava, sa ia mauaina le avanoa e maimoaina ai lea taotoga taua, “O se taotoga vave ma le matagofie ona faatino, ona o le tomai fa’apitoa fo’i o loo i le ali’i foma’i Dr. Edwards aemaise o alii foma’i Samoa e to’alua o loo fesoasoani ia te ia, Dr Naseri Aitaoto ma Dr Akapusi Ledua.”

 

Peitai sa sili ona fa’afiafiaina o ia, ona o i latou sa galulue fa’atasi i le fa’atinoga o tiute uma fa’atasi ai ma le fa’ata’ita’i ina ia fa’aaogaina le masini fa’apitoa mo taotoga lea sa tatalia lelei e fa’ato’a amata ai taotoga nei o vae ma lima.

 

“O nisi o tatou tama fanau, Taesaliali’i Fiataugaluia Lefiti foi lea ua tula’i mai e a’otauina fa’apitoa mo le fa’aaogaina o lenei masini e le ali’i o Brent Hintze mai le Zimmer Biomet, o se isi lea mitamitaga, aua e tasi lava lo ma puiaiga mai Fagatogo. Fa’amalo atu ai i faiva o nei alo o le atunuu,” o se tala ma le fiafia lea a Lutu-Fuiava.

 

O nisi fo’i sa i ai e fesoasoani i le vaimoe o Dr. Vergara ma isi o le aufaigaluega masani a le Potu Tipi a le tatou falema’i sa auai uma lava o tausima’i o John ma lana soa, na matagofie ma aluga lelei le taotoga ona o le galulue fa’atasi o tagata uma ia vave ma sao lelei lea ulua’i taotoga, leai ma se fa’aletonu.

 

Ina ua mafai fo’i ona maua sina avanoa puupu’u e pu’e ai se ata mo le au foma’i ma latou paaga i lenei taotoga, ma toe faasolo loa galuega masani, o le taotoga lona lua sa i le lisi ua fa’asolo nei.

 

Mai le agaga fa’afetai o le aiga o le ali’i gasegase na fa’atino lona taotoga, sa latou fa’aalia ai lo latou agaga fiafia ma le fa’afetai ona o le ali’i Foma’i o Dr Edwards ae silisili i le polokalama fa’apitoa o fesaosoani mai ai le Ekalesia a Iesu Keriso o le Au Pa’ia o Aso e Gata Ai i le mamalu o le atunu’u ua fa’aauala mai ai nei foma’i faapitoa o ponaivi e togafitia le mamalu lautele o le atunu’u.