FA'ATAUA FITAFITA MALILIU MA LITAEA MAI TIUTE - VFW

O se tasi o galuega mo lenei tausaga a le vasega o Fitafita sa tau i Taua ua litaea ua mafuli e faia i lenei vaiaso, o le tufatufaina atu lea o fugala'au "Buddy Poppy" o le fugala'au ua fa'amau fa'ailogaina, e fa'aaoga e le vasega o Vetereni o Taua, e manatua ai pea lo latou fatuatia i taua, ae maise o le aualofa atu ai i fitafita maumau ai lo latou soifua, a'o fa'atino tiute e fa'amau ai le saogalemu o tagatanu'u o Amerika ma isi malo uma o le lalolagi.

O le vaitau lenei e tatau ai ona faia e le VFW Sosaiete a Vetereni o Taua, a'o loma fo'i le aso Tu'ugamau, i le aso Gafua a sau nei. Ua faia ai fo'i foa'i e so'o se tasi e fia foa'i, ina ia fa'aaogaina e le VFW Vetereni o Taua, e fa'aleleia atili ai le tautuaina o Vetereni o lo'o soifua ma manu'aga tumau o le tino po'o le mafaufau, ona o a'afiaga o taua sa tiute ma tau ai.

"Talu mai le tausaga 1922, na mua'i faia ai lenei galuega fa'ailo ma fa'amanatu mo fitafita o taua i le setete o Texas, peita'i i le tausaga 1924 na lesitala tumau ai loa lenei fugala'au ‘Buddy Poppy’ e avea  ma fa'ailo tamau a le VFW Vetereni o Taua, ma o se latou fo'i lea aga tumau a'o lumana'i ai le Aso Fa'amanatu o e ua maliliu lea ua avea ma aso malolo i le Iunaite Setete o Amerika fa'atasi ai ma ona teritori."

Na fesiligia fo'i le faletua o Igafo Maria Brown-Va'a, aisea lea fugala'au? "O le fugala'au lenei, i le malae o taua, sa maliliu ai ma masa'a ai le toto o le anoanoa'i o fitafita, o lea se fugala'au ma toe ola mai ma fuga muamua mai ai lava. O se va'aiga uiga ese lea, aua o lea fugala'au e lanumumu pa'auli lelei, e tali tutusa ma le toto sa masa'a i le eleele ona o fevaevaea'iga. Lea ua agatonu ai ona faaaogaina e le VFW Vetereni o Taua i le lalolagi atoa, e fa'ataua ai le auaunaga na fatitoto ai lea ogaeleele ma toe tutupu mai ai Buddy Poppy.”

"Afai sa e va'ai nei fitafita tuai o latou faia se galuega fa'ailo mo latou uso ua maliliu, ia e tu ma faailo sau fa'afetai, ae maise sau foa'i mo se taumafaiga e toe fa'aleleia atili tautua mo i latou ua soifua pea ma manu'aga tumau, ona o nei taua sa tau ai mo le tatou sa'olotoga,” o se isi lea vaega o le latou fa'amoemoe.

O le Neil's ACE Home Center, sa latou talia fo'i lea tautua a le VFW e faia i lumafale o le latou pisinisi i Malaeimi mo le ulua'i aso ua fa'atino ai e le VFW Post 3391 Amerika Samoa. O lo'o avea le VFW i Hawaii ma fa'auluuluga fo'i o le tatou lala iinei.

Ua fa'afetaia e i latou na fai ma sui e tutula'i i lumafale o le Neil's lo latou agaga fa'afetai ona o le alolofa tula'i o le mamalu lautele o le atunu'u sa foa'i. Na fa'amaumauina atoa lea lisi, mo le auina atu i le Ofisa Ulu o le VFW i Hawaii ina ia fa'amauina tumau ai.

O i latou na auai sa aofia ai, Brown-Va'a o le sui ua toetoe mae'a lona tofiga o galue ai, Senior Vice Commander, Department Hawaii VFW, ae o le masina o Iulai o le suia ai lona tofiga e galue ai mo le VFW i le State Department Hawaii VFW Commander, lea e tautua ai mai ia Iulai 2018-Iuni 2019.

Lona lua o Vetereni o le susuga Va'aelua Asosi Ah Ping, o lea o le a suia fo'i lona tofiga e tautua ai i le VFW Post 3391 e afua mai Iulai 2018 se'ia o'o ia Iuni 2019, e avea ai ma Commander VFW Post 3391, lea lava e va'ava'aia mai e le VFW Hawaii.

Na auai fo'i le tofa Ali'ioaiga Manu Talamoa lea o le a tautua o le Senior Vice Commander o le VFW Post 3391, Amerika Samoa. O le tofa Muaimalae Taga'imamao Masaniai, lea o le a tautua nei o le Chaplain mo le VFW Post 3391, faatasi ai ma le sui Vetereni o lo'o soifua ma manu'aga tumau ona o a'afiaga mai taua, Paulo Silao, Asiasi Tinae ma Raff Togia'i.

Ua fa'ailoa mai, o lea avanoa ua tu'uina mai e le Neil's ACE Home Center, o se avanoa e fa'apito augafa i lo latou agaga e sapaia e i latou so'o se taumafaiga e fa'ataua ai le auaunaga mo Fitafita Tiute i Taua, fa'atasi ai ma Fitafita o Taua ua litaea mai a latou tautua i so'o se vaega lava o le Vaega Au a le Malo tele.

KOMITI GALUEGA FA'ALELEIA PE A MAE'A PAGATIA FA'ANATURA

O le Potu Fono o le Ofisa o le Koluse Mumu i Tafuna ua avea ma nofoaga ua fono fa'apitoa ai le Komiti na mae'a tofia ma fa'atulaga e le Malo ina ia latou mata'i, fa'atautaia ma tapena fo'i mo le lumana'i, se Fuafuaga Fa'ataoto mo Amerika Samoa i galuega toe fa'aleleia o le atunu'u pa mavae puapuaga fa'anatura pe fa'aosofia fo'i e nisi o terarisi ae maise o fa'alavelave tutupu fa'afuase'i e ono ogaoga tetele ona afaina i le to'atele o tagatanu'u o le atunu'u.

O latou fonotaga ua amataina nei talu mai ona mae'a galuega uma a le FEMA mo Amerika Samoa, ma e faia i afiafi o Aso Lua ma Aso Tofi ta'itasi i lona itula e 3:00 i le afiafi.

Peita'i o lo ua i ai fo'i se isi fa'alapotopotoga fou ua fa'atula'ia, ma ua faia fo'i latou fonotaga fa'apitoa i le potu fono lava lea o le Koluse Mumu i Tafuna i Aso Lulu ta'itasi, ma e vala'aulia ai so'o se tasi e fia Galue Foa'i Fua! O lona uiga o le tagata volenitia. Ua fa'atuina le latou sosaiete e latou te ofoina atu tautua eseese e fa'atino ai galuega lavea'i, ma ua fesoasoani tele fo'i i le fa'amoemoe o le komiti fou lenei, e fa'aauau ona faao'o atu se fesoasoani pe afai o lo'o mana'omia pea.

I le taimi nei, ua fa'ailoa mai e le Koluse Mumu Amerika Samoa, "O le matou lava tautua e fa'atino uma e le vasega o Tagata Volenitia, ofo mai le tautua ae le totogia, o lea ua avea ai lea ituaiga tautua ma se 'auro mama lava i so'o se galuega fa'aola, lavea'i ma toe fa'aleleia mo so'o se atunu'u i le lalolagi." O se tala fiafia lea a le tama'ita'i o Leilani Tuamoheloa, o le Koluse Mumu i Tafuna.