TATALA TAOFIGA A LE MALO O SAMOA ONA O LE MISELA PIPISI

Ina ua atoa le 6 aso ae ua tumau pea le aotelega o e ua maliliu i le Misela i le 81 i Samoa, ma ua fa’ailoa mai fo’i ua atoa lelei le 95% o le faitauga o i latou na manatu le Malo o Samoa e ao ina tuia o latou tui puipuia o le Misela MMR, ona manatu ai lea o le afioga le Palemia, o le a usuia le fono a le Kapeneta, ma o le a fa’aalia ai lona taofi e tatala le fa’asa sa fa’amalosia ona o le Misela Pipisi i Samoa.

Peita’i, e ui ina ua tatalaina nei lea vavao, ae ua fa’ailoa e Tuilaepa, “O lo’o ua mae’a fa’atulaga e le Matagaluega o le Va i Fafo ma le Matagaluega o le Soifua Maloloina le latou polokalama fa’apitoa mo le fa’aauauga ona mataituina le tulaga o galuega fa’aauau ia tumau le saogalemu o le soifua maloloina o le atunu’u.”

“I so’o se galuega taumafai e a’e manumalo ina ia fa’asaoina le toatele o soifua o le atunuu ona o fa’aletonu fa’apenei, e tele fo’i galuega totoe e ao ina   mae’a fa’amautu atili ai le lelei a’ia’i o togafitiga ma malu puipuia pea le atunuu ina ua taofia le pipisi o fa’ama’i.”

“O se tasi o nei galuega fa’amae’a lelei, o le fa’aauau pea ona tuia le to’a 5% o totoe o le faitauga o le atunu’u, atoa ai ma galuega puipuia lelei o le atunu’u mai le toe a’afia i nisi pesiga o le Misela.”

Ua fa’ailoa e le Palemia, “Ua tele se lesona ua mafai ona aoaoina ai nei le matagaluega o le Soifua Maloloina, le vasega o i latou o ta’ita’i o le Malo, ae maise o le mamalu lautele, ona o lenei fo’i fa’afitauli na alia’i i le atunu’u. E so’o se mea faigata e lutia ai le atunu’u, o le a’oa’oga sili fo’i lea mo ta’ita’i ma le atunu’u atoa, o so’o se tagata ua soifua ma maua ane ai i lea fa’afitauli matuia ua maumau ai le soifua o lenei to’a 81 o tagatanu’u, ae tusa o le 90% o i latou na o fanau iti e i lalo ane o le 5 tausaga le matutua.”

O fa’amaumauga mautu ua fa’ailoa mai ua fa’amauina le 5,667 i latou na a’afia i le misela, to’a 1,846 na tili ane i le falema’i ma taofia mo togafitiga. Toe 45 o i latou o lo’o taofia pea mo togafitiga ae o le 93% o i latou na va’aia e foma’i ma toe te’a i tua i aiga mai lea 1,846 tagata na taofia i le misela.

Mai le 45 o taofia pea lava i le taimi nei, e to’a 37 i latou o taofia i le Nofoaga fa’apitoa i le Motootua Tupua Tamasese Meaole Hospital, ma o isi e to’a 9 i latou o lo’o taofia i le ICU i Moto’otua e aofia ai se tama’ita’i o lo’o ma’itaga ma isi o pepe uma lava.

O le isi lea vaega o le fa’afetai tele a le afioga le Palemia, “Fa’afetai tele i matou uma na latou fesaosoani mai i ala eseese ua fa’afaigofie atili ai le taua a Samoa ma le ma’i misela pipisi, ae maise ai le usoga i Amerika Samoa i ala eseese, le seleni ma pusa oloa o mea eseese e aoga tele mo aiga ua lutia i lenei ma’i pipisi  i lenei tausaga. Fa’afetai alofa ma le a’ao mafola, fa’afetai fa’atino le alofa o le Atua. Tau ina ia toe fa’amanuia le Atua ia te outou uma ae maise i o outou malo, ina ia fa’asalafa atu le manuia tulu’i o le Atua ia te outou.”

TAPUNIA MALAE VA’ALELE I FAGALI’I - TESEMA 31, 2019:

O le fuafuaga fa’ataoto a le Malo o Samoa mo le tausaga fou 2020, ua amata fa’amalosia fo’i i le toe aso o le 2019 le tapunia aloa’ia ai o le Malae Va’alele i Fagali’i mo fealaga’iga o va’alele laiti, ae o le a fa’ase’e uma atu nei malaga e tautuaina i le Malae Va’alele tele o Faleolo lea ua mae’a lelei.

E le o fa’alauiloa fa’alaua’itele i le taimi nei fuafuaga a le Malo mo se isi malae va’alele e latalata i le taulaga, ae o le to’atele o faipisinisi ua latou fa’ailoa mai, “Ua misia le malae va’alele i Fagali’i ona o le tulaueleele tonu i nofoaga o le taulaga i Apia e fa’atino ai pisinisi ma toe fo’i vave mai ai i Pago Pago nei.”

Ua na’o va’alele lava e femalaga’i i Pago Pago o lo’o tulaueleele ma fa’ae’e mai fo’i i Fagali’i Airport. O se isi lea mea sa fiafia tele ai i latou, lua, o lo’o maulalo teisi ai ma le pasese totogi mo femalaga’iga.

Mai Fagali’i i le taulaga i Apia e na’o le $5.00ST peita’i afai e te tulaueleele nei i Faleolo e fa’aopoopo le $50 i lou tupe fa’aalu i lou pasese i le taxi mai Faleolo i le taulaga i Apia, ma le isi $50. e toe taliu ai i so’o sau malaga lava.

Ua fa’alogoina se fuafuaga a le malo o le a fa’atulaga i le malae va’alele i Fagali’i, o le Ofisa o Leoleo a le Malo o le a fa’aaogaina lea nofoaga ma fa’atula’ia ai lea tautua mo le lautele.

LAPATA’IGA MO MATAGI MALOLOSI

Talu mai le aso ananafi o lo’o tumau pea lapataiga mo matagi malolosi mai le Ofisa o Vaai Tau i Tafuna.

O lea fa’aalia e oo mai i le aso lenei ma ua mafua lea tulaga ona o uiga louloua o le tau o loo i matu i sisifo o le atunuu o le a mafua ai ona malolosi matagi. O loo faatupulaia pea le malolosi o matagi o loo i totonu o nei uiga louloua o le tau a`o agai lemu mai i le atunuu. O loo vaaia foi le tele o faititili ma le agi faata`uta`u o matagi. E matagi e agi i le 30 i le 40 maila i le itulam mai matu i sisifo.

Fa’aalia foi e le Ofisa o Vaai Tau, e malolosi matagi i nofoaga o vaimauga e pei o le Fagaloa. E tatau ona faamaumau lelei meatotino o loo i fafo o le fale ina ne`i lelea ma afaina ai le soifua ma meatotino. E onommotusia uaea eletise ma vaaia foi le pauu o laau.

Ua fautuaina le mamalu o le atunu’u ia fa’autagia mai lenei fa’asilasilaga.