Ads by Google Ads by Google

Tala I Vaifanua

TATALA DAYCARES MO FANAUITI - I AI FO’I AIAIGA TAMAU

 

Talu mai ona tapunia nofoaga uma e tausia fa’apitoa ai fanauiti - day care centers - ona o le poloa’iga fa’alauaitele a le Kovana e puipuia ai le pipisi o le Misela ia Tesema 08, 2019, ua toe fa’ataga nei ona tatalaina nei tautua i le aso ananafi.

 

Pe’itai ua fa’ailoa mai ua na’o le 20 day care centers mai le 22 o le aofaiga sa agava’a ona toe tatala.

 

Ua mautu fo’i le aiaiga, ua na’o le fanau lava ua mae’a faia tui MMR e tete’e ai e o latou tino le misela o le a mafai ona auina atu ma talia i Day Care e afua ia Ianuri 13. E le gata i lea, a e o tagata faigaluega uma fo’i i Day Care e ao ina mautinoa ua umia lou pepa tui ua mae’a fo’i le 14 aso talu ona mae’a tuia lou MMR, e mafai ai ona e faigaluega i le Day Care.

 

O aiaiga nei o le tatalaga o Day Cares. Ua na’o le fanauiti lava e afua mai le 6 masina le matutua se’ia o’o i le 13 tausaga le matutua e mafai ona tausia i Day Care i le taimi nei. O fanau uma e le’i atoa le 6 masina, ma e le’i mafai fo’i ona faia tui MMR, e ao ina nonofo pea lava i aiga.

 

I se lipoti a le malo, o lo’o taua ai ua na’o le 97% o i latou e faigaluega i Day Cares uma ua mae’a faia tui puipuia nei o le misela, ua maua ai le aofa’iga e 185 i latou e tausia  860 o fanau o tausia fa’apitoa i Day Cares uma e 22 i le atunu’u.

 

Day Care e 20 ua mafai ona toe tatala: 1. Airport (Tafuna); 2. Blessings (Leone); 3. Busy Bees I (formerly Ds Matu’u); 4. Busy Bees II (formerly Ds Leone); 5. Boys & Girls Clubs of AS (Tafuna); 6. Catelaya’s (Tafuna); 7. Jacey’s I (Nu’uuli); 8. Jacey’s II (formerly Jayce’s, Nu’uuli); 9. Kana’s (Vaitogi); 10. Kiki & Sam’s (Tafuna); 11. Lanialofa (Pavaiai); 12. Little Angels (Vailoa); 13. Levalasi (Nu’uuli); 14. Manumalo (Malaeimi); 15. Miracle (Malaeloa); 16. Munchkins (Ili’ili); 17. Noa’s (Onesosopo); 18. Slickers (Pago Pago); 19. Sunbeam (Auto); 20. Victory Chapel (Pava’ia’i)

 

Ua tapnunia pea le Christmas Day Care i Leone ma le Hope House Day Care se’ia mae’a ona toe asia i latou ma ua mae’a fo’i ona kilia mai mea ua faatonuina e usita’ia ona a’ato’a tatalaina lea mo le tausiga o le fanai iti.

 

FUAFUA LOIA SILI FA’AMAVAE I LE MASINA FOU

 

I le fonotaga a le kovana ma lana kapineta i le aso Faraile ua te’a, sa fa’alauiloa ai e Kovana Lolo Matalasi Moliga fuafua a le Loia Sili, Talauega Eleasalo V. Ale e fa’amavae mai lona tofi i le amataga o le masina fou, pe a ma’ea ona ia finauina se tasi o matatupu i le fa’amasinoga fetarale.

 

Saunoa Lolo e le’i fa’ailoa atu ia e ia e Talauega pe o le a le tofi palota ua fuafua e tauva ai i le palotaga o le 2020, pe o le tofi kovana pe o le lutena kovana. Ae pau lana tala, “se’i tapena lana fuafuaga” i lenei tausga.

 

O le fa’afetai na tu’uina atu e le Kovana sa ia fa’ailoa atu ai fo’i ma lona fa’amoemoega tele sa tu’uina fa’atasi atu ia Talauega. “Na ou iloa lelei le agava’a o Talauega i le tofi na ou filifilia o ia e tula’i mai ai, ae o lea ua le gata ina ia ausia lea matati’a, ae ua ia iloa lelei ona tautua i tagatanu’u o Amerika Samoa, ua ia faia ona tiute ma le alofa ae ua le avea ma ala e solituina ai le tulafono tamau a le malo,” o se tala lea a Lolo. “Ia fa’amuamua tagata.”

 

“Pe ete tatuua mai i pisinisi tumaoti pe ete tautua i le malo, afai e te fa’amuamua tagata, e au lava au taumafaiga uma, e tino mai ma aoga,” ose fautuaga lea a Lolo.

 

FA’AITIITIA TAGATA E O ATU E FAI TUI MISELA

 

Ua matauina le faaitiitia o i latou e asiasi ane i falema’i ua mae’a fa’atulaga e faia ai tui puipuia o le misela, e le gata i fanauiti ae fa’apea fo’i i tagata matutua ma fanau a’oga.

 

“I le vaitaimi lava o lo’o fa’ato’a amata ona faia tui puipuia nei, na tula’i mai sa ta’i 2,000 tagata e mafai ona tuia i le aso e tasi, ona fa’asolo mai lea i le ta’i 1,000 i le aso e tasi, peita’i i le taimi nei ua na’o le ta’i 400 ma aga’i i lalo le faitauga atoa o tagata ua aga’i ane i nofoaga uma ua fa’atulaga e faia ai tui puipuia nei i le aso e tasi,” o se lipoti lea a le ali’i foma’i fa’apitoa o gasegase pipisi i le Matagaluega o le Soifua Maloloina, Dr Aifili John Tufa.

 

I le lipoti mulimuli lava ua fa’amauina ia Ianuari 06, 2020 ua fa’ailoa mai ai e le DOH , “Ua mae’a ona tuia nei le 13,195 o i latou ua mae’a fa’amoemoe e tuia o le atunuu, ae o le aotelega e ao ina o’o i ai lea faitauga e 15,841 i latou e ao ina tuia MMR.” Ua fa’ailoa mai fo’i, “O le vasega o fanau e le tatau ona tuia, lea e i lalo ifo le matutua i le ono masina, ua lelei atoatoa lava lea taumafaiga, o i latou na e vave lava ona o’o ane i le taimi lava e atoa ai loa le 6 masina fa’ato’a faia ai latou ulua’i tui MMR.

 

AOAOGA TAUSIA FA’APITOA MATUA MATUTUA UA FAIGATA ONA FEOA’I

 

Ua fa’auau pea ona faia a’oa’oga fa’apitoa mo i latou ua mae’a filifili e fia faia le faiva o le tausia fa’apitoa o matua matutua fa’apea ma gasegase fa’apitoa ua feoa’i tumau i nofoa fa’ata’avalevale, fa’aaoga fo’i to’oto’o ma uoka ina ia mafai ona savavali.

 

O lenei vasega ua fa’aigoaina o le “Tausi Feagaiga” ma ua fa’atautailua e le Pacific Youth Community & Development  ma le Ekalesia Katoliko Pule’aga Samoa Pago Pago.

 

O le kosi lea ua faia e latalata i le to’a 50 i latou ua mae’a sainia pepa e auai. O a latou a’oa’oga e ao ina faia a’oa’oga i potu aiga o vasega ia a’oa’oina ai tomai e mana’omia ona agava’a ai i latou, fa’atasi loa ma le fa’atinoga o a’oga e fa’ao’o ai le tausiga lelei o e gasegase, fesi’ita’i mai le moega i le nofoa fa’ata’avalevale, po’o le uoka ma lifi.

 

Ua le gata ai i le feavea’i i le nofoa fa’ata’avalevale, ae ua fa’asinosino fo’i le fa’aaogaina o le to’oto’o ma le uoka. E ese ese mea faigaluega, e eseese fo’i lo latou fesoasoani ia te oe i le galuega o le tau fa’afealua’i ai o lau ma’i. Ua i ai fo’i le lifi e fa’aaoga mo le tagata ua le mafai lava ona toe nofo umi i luga, pe mafai fo’i se nofo umi i luga o lona moega. O nei tagata tausia fa’apitoa e ao lava ina feavea’i i lifi, fa’ala mo sina taimi ma toe faafo’i mai i lona moega. O lifi nei ua i ai i totonu o le falema’i i Hope House.