Ads by Google Ads by Google

Tala I Vaifanua

LIMA TAUSAGA JPS I AMERIKA SAMOA - MAUA TATOU LE SIAMUPINI

 

Ua fa’afiafiaina le vasega o fa’atonu, faia’oga ae maile o Matua ma aiga ae maise fo’i o le tatou atunu’u atoa ina ua mae’a le Ta’amilosaga JPS lona lima, ae ua sola mai Amerika Samoa ma le siamupini o le JPS Classic. O se faamoemoega na tulitulimatagau maia talu le amataga o lenei taumafaiga.

 

I le taumafaiga a Amerika Samoa i lenei tausaga na latou mua’i faatoilaloina ai le ‘au malosi a Hawaii i o latou ‘ai e 14-12. O le ‘au lea a Hawaii ua fa’aigoaina i latou o le “Afi”.

 

E tusa ai ma le fa’amatalaga mai le taitai o le Offensive o le tatou ‘au, Pooch Ta’ase, sa ia fa’ailoa mai ai, “O le manumalo i lenei tausaga o le galuega faifa’atasi a le tatou ‘au fili. Ua iloga e le tagata lona tulaga ma le gaoioiga e ao ina faia i le taimi atoa o le ta’aloga. Ua latou tutu fa’atasi ma so’o fa’atasi latou loto, ua tali fo’i le Atua i le taumafaiga, ua ausia le manumalo ma le siamupini a’ia’i o lenei tausaga.”

 

O nisi o sui o lo’o avea le ‘au i Hawaii e aofia ai Pati Pati, Kevin Magalei o Tafuna High ma Will Lobendahn mai Nuuuli Voc Tech.

 

E tolu ta’aloga a le tatou ‘au na manumalo ai i a latou ta’aloga e fa faitaulia mo lenei ta’amilosaga. O le ‘au a i tatou lea ua siamupini nei, o lo’o i ai le vasega o fanau fa’au’u i lenei tausaga, ae o le ‘au laiti a i tatou na malaga e ta’itasi latou malo ma le faiaina e tasi, ma ua taliu mai ma le tulaga tolu i le latou fo’i ta’amilosaga i lenei tausaga.

 

LEOINA O LE GATAIFALE MO FEOA’IGA SOLITULAFONO

 

Ona ole Alia fagota mai Samoa na maua mai i sailiga ma leoleoga o va’a e taula solo mai i tatou gataifale, ua afua ai ona manatu le Matagaluega o le Puipuiga Fa’alotoifale o Amerika Samoa, e ao lava ina i ai se puipuiga o va’a nei a le tatou Malo.

 

Ona o le pepesi o le Misela i le atunu’u ae maise Samoa, ua mafua ai ona matua leoleoina so’o se ituaiga o ala e mafai ai ona sofa’i mai lena saogalemu e ala i feoa’iga i totonu o le atunu’u. O nei lava ala e afua mai i va’alele ma va’a e malaga mai i le sami. O le isi ala o va’a fagota ma ua aofia ai i lea lisi i va’a alia fagota, sa masalomia lava o lo’o o aga’i mai Samoa, ma taula sa’o i tua i afio’aga.

 

I le suesuega lenei ua maua ane ai o le Alia Fagota lea na malaga sa’o mai Samoa ae leai ni pepa na kilia mai ai e le tatou Malo ma Samoa fo’i, o le alia ua fa’atau e se tasi i le afio’aga o Vatia. Peita’i e ui la ina ua mae’a fa’atauina lea alia ae le’i i ai fo’i se laisene ua lesitala ai i Amerika Samoa ma o le ala lea na taofia ai lea alia.

 

Fa’aalia e le faatonu sili, Samana Veavea, ua ma’ea nei ona lesitala lea Alia i le teritori.

 

FAUSIA E SAMOA - OFISA TUTOTONU MO A’OGA A VASEGA LEOLEO

 

Mai le malo o Samoa, ua fa’ailoa e le Komesina o Leoleo Fuiavalili Egon Keil, “ua mae’a fa’ataoto le fausaga o le Ofisa Tutotonu o Leoleo uma a Atumotu o le Pasefika, o se mea sa talanoaina ma pasia i le fonotaga mulimuli a le Asosi o Matagaluega o Leoleo a le Pasefika” lea sa talimalo ai Amerika Samoa i le tausaga ua te’a.

 

O le nofoaga fou lenei ua mae’a fa’atulaga e fausia i le Nofoaga sa tu ai le Falepuipui i Tafaigata ma ua fa’apa’aga nei e le Malo o Samoa le Malo o Saina latou te auau faatasi i le fausaga o lea nofoaga.

 

O le tinoitupe amata mo lenei poloketi ua fa’ailoa mai e $158,073. ma ua mae’a pasia mai i le fonotaga mulimuli a le palemene i le tausaga ua te’a.

 

Ua mana’o fo’i ta’ita’i o Samoa, “Ia avea lenei Nofoaga e A’otau ai Leoleo uma o le Pasefika atoa ma nofoaga e tua i ai so’o se matagaluega o Leoleo a atunu’u o le Pasefika i tulaga tau a’oa’oina fa’apitoa ia leoleo.”

 

O le aoga fo’i o le aoao fa’atasi o ali’i ma tamaitai “malu o le Malo” e mafai ai ona galulue fa’atasi i latou uma i ala e fa’afaigofie ai ona maua nisi e solia tulafono uma fa’avaomalo ae maise i soligatulafono e faia i le va o malo tetele ma malo o atumotu o le Pasefika.”

 

Ua aofia i lenei nofoaga tutotonu mo a’oga a leoleo, ua fa’ailoa mai e i ai malae ta’alo, potu mo koleniga fa’apitoa mo le ausia o le malosi tau le tino ma le mafaufau o ali’i ma tama’ita’i malu o le malo.