SALA DR. MATAESE SAMUELU - FA’ATONU O FA’ATO’AGA

O le aso Faraile o le vaiaso ua te’a sa fa’amaonia ai e le Fono Faitulafono le tofiga a Kovana Lolo Matalasi Moliga, e avea Sala Dr. Mata’ese Samuelu ma fa’atonusili fou o le Matagaluega o Fa’atoaga.

I le Maota Maualuga, o le palota fulisia e 15-0, ae i le Maota o Sui o le palota e 15-1.

O le fa’amoniga a le Fono Faitulafono o Sala ua ia fa’atumu ai e ia le nofoa sa i ai Filifa’atali Mike Fuiava, lea na fa’amavae i le masina ua te’a.

O le isi fo’i tofiga sa faia e Kovana Lolo Moliga i lana Komiti Fa’afoe o le LBJ Medical Center na palotaina fo’i e le Senate ma pasia e i latou lea tofiga mo Ufagafa Ray Tulafono i lea fo’i nofoa 15-0.

I lalo o tulafono a le malo, e na o le Senate e faia fa’aiuga o tofiga mo le komiti fa’afoe a le LBJ, ae le palotaina e le Maota o Sui.

30 AGAVA’A AVEA MA TAUSIMA’I TAUTUA HOME CARE GIVERS

I le mae’a ai o le aoaoga fa’apitoa mo i latou ua naunau e fia avea ma Caregivers mo le polokalama o le Home Care mo matua matutua, ma gasegase tausia fa’apitoa e fa’aaogaina ai moega fa’apitoa, nofoa fa’ata’avalevale, uoka, ma to’oto’o, ua maua ai fo’i lea to’a 30 o i latou ua agava’a e mafai ona latou a’oa’oina nisi mo ia tomai fa’apitoa.

I le aso Tofi o le vaiaso na te’a, na faia ai le fa’amae’a ai le aoaoga fa’apitoa mo lea vasega, ae ua taua’aoina ai fo’i tusi pasi o le to’a 30 o i latou na mo lea tautua mana’omia tele mo nai o tatou matua matutua ua tausia fa’apitoa, faatasi ai ma isi fo’i o le mamalu lautele ua tausia fa’apitoa ona o laveaga i feoaiga, ma ua mana’omia tausiga i luga o moega i taimi uma.

O lenei aoaoga fa’apitoa sa fa’atautaia lea e le Pacific Youth & Community Development (PYCD) i lalo o le polokalama Tausi Feagaiga ona fa’atautaia mo le vaiaso atoa fa’atasi e le PYCD ma le Hope House a le Puleaga a Samoa-Pago Pago, Ekalesia Katoliko i Amerika Samoa.

O faiaoga o lea aoaoga fa’apitoa e o mai le Iunivesite o Hawaii John Burns Medical School ma le aufaigaluega fo’i a le Hope House, i latou ua mae’a umia tusi pasi e avea ai ma tausima’i fa’apitoa mo gasegase e tausia fa’apitoa i moega. Ua fa’ailoa mai fo’i e le pule o le Hope House, Beatrice Mageo, o le aoaoga mulimuli lenei e fa’atautaia mo lea polokalama, ma o i latou ua umia tusi pasi mai le Tausi Feagaiga, ua agava’a fo’i i latou e toe a’oa’o nisi i le lumana’i i lea lava tomai fa’apitoa.

PV2 ILAOA - BCT 1ST BATTALION 13TH INFANTRY REGIMENT TEXAS

O le tama’ita’i Toa o Samoa, PV2 Malaetele Ilaoa ua fa’amanuiaina ana taumafaiga ina ia aotauina fa’apitoa i tomai fa’apitoa e avea ai o ia ma fitafita o le 1st Battalion 13th INfantry Regiment mai le Hilton Field i Fort Jackson i South Carolina, lea ma faia le latou fa’auuga BCT ia Ianuari 16, 2020.

O i latou na fa’auu mai ae ua avea ma Soldier Leader of the Cycle ua auai ma lenei tama’ita’i Samoa PV2 Ilaoa ma e to’alima i latou na maua lea fa’aeaga mai kle vasega atoa.

E ese mai lea ua maua fo’i e PV2 Malaetele Ilaoa le isi fa’ailoga o le avea ai ma sui e lelei le fanafana, ma e to’alima fo’i ia te ia i latou o le vasega fa’au’u na ausia lena tulaga. O lona uiga i lona fa’au’uga BCT ua ausia ai e Ilaoa fa’ailoga maualuluga e lua, ma o se taumafaiga maoa’e lea mo le tama’ita’i fitafita talavou mai Amerika Samoa.

O lo ua fa’afiafiaina le Asosi a tagata Samoa o lo’o alaala i Columbus South Carolina i lea fo’i fa’aeaga ua alia’i mai taumafaiga a PV2 Malaetele Ilaoa i lenei masina.