Ads by Google Ads by Google

Tala I Vaifanua

2 SUI SUESUEINA PE MAUA I LE “CORONAVIRUS” I SAMOA

 

I se lipoti mai Samoa, i lo’o fa’ailoa ai e to’alua seila (sailor) Samoa sa afea Saina o lo’o taofia i le Faleolo District Hospital, e su’esu’esueina pe o maua i le fa’ama’i o le  “coronavirus” lea o lo’o a’afia ai le sili ma le 2,000 tagata i le malo o Saina ae ua maliliu ai tagata e 81 i totonu lava o Saina - lea sa amata mai ai lea fa’ama’i.

 

Fa’ailoa e le Ministry of Health a Samoa, o lo’o mana’omia ona fa’amautu atili suesuega. O lo’o fa’ailoa i lipoti mai Apia e fa’apea, i le malaga toe fo’i a nei seila i Samoa, sa afea Saina mo aso e lua. Ma o le mafuaaga foi lea ua toaofia ai (quarantine) o suesuega pe ua maua i lea fa’ama’i.

 

O le vaiaso ua te’a sa fa’alauiloa ai e Samoa tulaga fou e tatau ona aloaia e i latou e fia malaga i Samoa, ona o le “Coronavirus”.  Ua fa’amalosia tagata uma e faimalaga i Samoa e ao ina muai faia latou tui puipuia ma atoa lelei le 3 aso talu ona faia lona tui puipuia lea fa’ato’a ulufale mai ai i Samoa, pe afai o loo malaga mai atunuu e le’i maua ai nisi i le Coronavirus.

 

Peitai, pe afai o oe lea e malaga mai i le atunuu ua mae’a ona maua nisi i le Coronavirus, e tatau ona atoa lelei le 14 aso talu ona maea faia lou tui puipuia. Afai fo’i e taumafai lea sui malaga mai i Samoa e fia ulufale ae le’i atoa le 14 aso lea e toe fa’afoi i latou i atunu’u na malaga mai ai.

 

E pei ona lipotia e le Matagaluega a le Soifua Maloloina a Amerika Samoa, e leai se tui puipuia ai le mamalu lautele mai lea fa’ama’i, o loo ua tapena le fonotaga ma le LBJ Medical Center ina ia autasia i se fuafuaga e fa’atauaia e le tatou Malo ina ia tete’e ma puipuia ai le atunuu mai le Coronavirus. Pe afai e maea lea fonotaga ma le LBJ ma ua mae’a fa’atulaga fo’i lea fuafuaga fa’ataoto mo togafitiga, ona fa’asolo atu lea e fono loa ma le afioga le Kovana ina ia fa’afofogaina e ia lea fuafuaga ma pasia mai ai e ia se faiga e fa’atautaia ai ia agatonu ma le fa’amoemoe.

 

I lipoti mai Amerika, o lo’o fa’ailoa ai e to’alima i latou ua maua i lea fa’ama’i, ma o i latou fo’i nei sa malaga i Saina.

 

TUUA LE MALO FA’AFEAGAIGA/TAMA O LE AIGA - REV. VIIGA TARRANT

 

O le tuua ai e le susuga le Fa’afeagaiga Viiga Bryant Leatitagaloa Tarrant, ia Ianuari 02, 2020 ma ua tu’ua ai fo’i e ia le galuega a le Atua sa la’ua galulue mai ai ma le faletua, le tina o le galuega, le faletua mo le 53 o tausaga, ia Filigataula Leota Sotoa Tarrant.

 

O le susuga le Fa’afeagaiga na soifua a’e i le afoiaga o Fagali’i i Samoa i ona matua o Leatitagaloa Leiua ma Anila Peka Leiua, ia Aukuso 14, 1943. O lenei tausaga ua maliu ai o ia, ae ua atoa le 76 o ona tausaga.

 

Na fa’atamafai o ia e avea ma alo e fa’asino ia Harry B. Tarrant ma le faletua o Fa’alasia Fuamatu Tarrant lea na i ai ona tuafafine e to’a fa ma uso e to’alima.

 

I le vaitau o lana taumafaiga ia faatupula’ia le galuega a le Atua sa talosaga ai o ia e avea ma se tasi o totino a le Aoga Fa’aevagelia a Billy Graham, ma o iina fo’i sa ia mauaina ai le isi vaega tele o tomai na mana’omia e fa’aleleia atili ai lana auaunaga i lona Atua.

 

I le tausaga e 2004 na fa’atuina ai e ia le ekalesia fou ua fa’aigoaina nei o le “All People’s Pentacostal Church” i Siufaga Pago Pago. O lea ekalesia ua lauuluola mo le tala’iga o le fa’aolataga mo tagata uma. Ua mae’a toe fa’atula’ia le isi lua lala fou talu mai lea amataga fou.

 

“O le  matou tama o se tasi e le iloa tuai i se fa’atasiga taua, ae maise lava o le taimi o sauniga o so’o se ituaiga i le Atua. E le faigofie ia te ia ona fa’amatu’u i matou le fanau i so’o se taimi e leai se fa’atonuga. O lana a’oa’oga e faasino ai i matou le fanau, Ia faia le mea sa’o, fa’alogo ma usita’i, o le ala i le atamai sili mai le Atua,” o se fa’amatalaga lea a se tasi o lana fanau.

 

“E amata mai le amataga o le matou olaga i le li’o o le matou aiga, ua taumafai lava o ia ina ia savali e tusa o le a’oa’o atu. E fiafia tele i vi’iga o le Atua ma e lelei tele lona siufofoga. Na ia fa’auia fo’i le tele o ana lauga o le Upu i alaleo fa’asalalau  i le Leitio 92.1FM.”

 

I lona tu’ua ai o le mafutaga mafana ma ona aiga, o se avanoa e le fa’atumugofie e soo se tasi. Ua malolo nei o ia, ae ua ia tu’uina mo lona aiga ae maise o le faletua ma le fanau, o se tala’aga ma se’evae e faigata ona toe savalia e se tasi, e ala i lana tautua i le ekalesia ua mae’a fa’atuina ma aoga i le to’atele o tagata o le atunuu i lo latou soifua fa’atuatua ma tapua’i i le Atua.

 

I le mafutaga ma le tina peleina ia Filigataula, e toa ono la’ua alo e to’a 20 a la’ua fanau a fanau ma le to’afa o fanau a fanau a la’ua fanau.

 

Na amata suia le tautua a le susuga le Fa’afeagaiga ina ua po’ia o ia i gasegase ma i’u ai ina saili togafiti i Amerika.

 

Mo ona toe sauniga, o le a to’ai taunu’u mai ai lona Va’a i laufanua ia Ianuari 30, 2020 mai Hawaii. E faia se sauniga puupuu i le Malumalu o le Falema’i i Faga’alu ia fa’atasia uma ai aiga. O le a toe fa’amautu atu le aso ma taimi o ona toe sauniga i se faasalalauga fa’alaua’itele a le pa’ia o aiga. O ona toe mana’o ina ia lagomau o ia i lona oliolisaga tumau i le la’ua maota i Vaitogi.