ALA UA TIA’IA AI LE SUAU’U I TOTONU O LE TERITORI

Mai le tele o tausaga, sa aoina e le Kamupani a le StarKist Samoa le suau’u tia’i a le atunuu ma latou toe fa’aaogaina i a latou poila tetele i le Kamupani, peita’i, ina ua fa’aleagaina se tasi o nei poila, ua le toe fa’aaogaina ai e le StarKist.

O nofoaga e aumaia ai nei suau’u lafoa’i e le StarKist o le ASPA, ma ua iloga fo’i, afai ae le tia’ia leleia le suauu lafoa’i lenei, e fa’aleagaina ai le suavai taumafa i totonu o le atunu’u.

I le tausaga ua tuana’i, sa taumafai mai ai le ASEPA ina ia ave’esea uma le suauu lafoa’i lenei mai le atunu’u, ma sa latou auau fa’atasi ma isi matagaluega uma a le malo.

O le vaega a le US Coast Guard na latou tula’i mai ma le ala e mafai ai ona toe fa’afo’ia le suau’u lafoa’i ina ia toe fa’aaogaina nisi ona vaega i le Kamupani Suauu lava. O le va’a suau’u o le James Cook na toe fa’atulaga e le USCoast Guard e toe fa’afo’ia ai le suau’u lafoa’i ma fa’atulaga ai le malaga a le “Jame Cook” ia Setema na toe faafo’ia atu ai le 133,082 kalone o le suauu lafoa’i. Ia Novema 2019 na auina ese atu ai le 56,285 o le suauu lafoa’i.

I le lipoti a le ASEPA i le lauga fa’apitoa a le Kovana i le amataga o fonotaga a le fono faitulafono sa fa’ailoa ai ua mafai ona soo fa’atasi le tele o matagaluega ma galueaina ai se vaifofo i le tele o le suauu lafoa’i i le atunuu.

O tulafono tau Oloa fa’atau mai i le atunu’u fa’avaomalo, ua mae’a ta mau ai aiaiga tau lapisi lafoa’i mai nei oloa ua fa’atau mai i Amerika Samoa. O i latou e la’uina mai na oloa ma fefa’ataua’i i totonu o Amerika Samoa, e ao fo’i ona latou toe fa’afo’ia esea lapisi lafoa’i mai nei oloa na fa’atau mai.

O lona uiga, o se taimi muamua lea ua fa’atino ai e le Kamupani suau’u le latou matafaioi fa’aletulafono o oloa fa’atau mai, ma ua toe fa’afo’ia e i latou le lapisi mai lea oloa, o le suauu lafoa’i.

FA’AMALOLO SALLY FAUMUINA MAI OFISA KOVANA

O le failautusi a le Lutena Kovana, Sally Faumuina, ua mae’a taua’aoina ia te ia le tusi ua fa’ailoa atu ai ia te ia ua tatau ona tulai ese mai lana galuega, ina ua fa’amaonia o ia lea sa ia fa’alauiloaina le aofai o le siaki na taua’aoina e se tamaitai e faigaluega i le Ofisa o le Medicaid a le malo i le masina ua te’a.

O lea siaki totogi ua fa’alauiloa fa’atasi uma ai fa’amaumauga aofai itula ovataimi e 70 lea na totogia o ia i le aofaiga e $1,768.69. Ma sa fa’alauiloa i luga o le Facebook lea siaki, ua solia ai nisi o tulafono tau le saogalemu. E aofia i lea sasi o le fa’alauiloa lea o le sui ma lana numera saogalemu, ma ua solitu ai fo’i ma aia tatau a lea sui i le taofiofia o ana fa’amaumauga uma e o’o lava i le aofai o lona totogi na maua.

Ona o le mana’oga o le Fa’atonu o le Medicaid Office, Sandra King Young ina ia sailia le sui ua ia fa’asalalauina fa’alaua’itele lea siaki, aua ua solituina tulafono tau fa’amaumauga patino i se tagata faigaluega, ma o se tiute tau’ave fo’i lea o le matagaluega o Tagata Faigaluega a le Malo.

Ua iloga foi e i ai se isi sui faigaluega i le Ofisa o le Kovana sa ia pu’ea le ata na fa’asalalauina o lea siaki, peita’i e le o afaina i lea fa’ate’aga.

O le tautua a Sally Faumuina i le Ofisa o le Kovana na amata mai lava i le 2013 o avea ai ma Failautusi a le Sui Kovana ia Lemanu Peleti Mauga, ma o le faigamalo foi ua tuana’i sa avea ai lava o ia ma Failautusi i le Sui Kovana, ma sa avea fo’i ma Failautusi a le Sui kovana Togiola Tulafono i le faigamalo a Tauese Sunia.

Ua leai se avanoa lelei a Sally Faumuina e saunoa ai e tusa o lea mataupu.