Ads by Google Ads by Google

Tala I Vaifanua

SAUNI KONEKERESI FESOASOANI AMERIKA SAMOA I LE CORONAVIRUS

 

Ua fa’ailoa e le faipule a Amerika Samoa i le Konekeresi, Aumua Amata, ua nofo sauni le Konekeresi e fesoasoani ia Amerika Samoa pe afaina i le fa’ama’i pepesi o le Cornovavirus, lea sa afua mai i Saina.

 

“Ua mae’a fa’afeso’ota’i e le faigamalo a le peresetene o le Iunaite Setete le vasega o foma’i fa’apitoa i fa’ama’i pipisi fa’apenei, fa’atasi ai ma saeanisi lauiloa ina ia latou feso’ota’i ma i latou o galulue fo’i i Saina ma mata’i po’o a togafitiga o le a aoga mo le togafitia o le gasegase Coronavirus, ma faailoa muamua mai ias i latou,” o se tala lea a Aumua.

 

Maua maea fo’i ona fa’atupe suesuega e le Konekeresi i lea ituaiga o gasegase e pei o le Coronavirus.

 

“O le a nofo sauni fo’i le Koenekeresi mo se fesoasoani aoga mo Amerika Samoa pe a oo ina mana’omia,” o sana tala lea.

 

Fa’ailoa e Aumua lona agaga fiafia ina ua vave ona tapena Amerika Samoa i so’o se ala ua latou fa’atinoa i le vaitau fita lenei, e tusa ai o sailiga o ni togaiftiga e faaitiitia ai le feso’ota’i o Amerika Samoa ma Saina poo isi atunuu o lo’o masani ona feso’ota’i ma Saina i vaiaso ta’itasi, ina ia vave puipuia ai le atunuu mai nei fa’ama’i pipisi.

 

E o’o mai i le aso ananafi ua oo i le to’avalu i latou ua maua i le Coronavirus i totonu o Amerika; ae silia ma le 200 i latou ua maliliu i totonu o Saina fa’atasi ai ma le sili i le 5,000 tagata ua a’afia i le corona virus. E sili ma le 12 malo o le lalolagi ua o’o i ai lenei fa’ama’i.

 

FA’ASA MA AIAIGA FEMALAGA’IGA MATAGALUEGA O LE SOIFUA MALOLOINA

 

Afai o e umia le tusi folau Samoa, ua e manatu fo’i e te malaga i Samoa, o le a le mafai ona toe fo’i mai i Amerika Samoa se’i vagana, ua maea e taulimaina se fa’amaoniga mai le Matagaluega o le Soifua Maloloina 14 aso talu ona e toe fia malaga mai ai i Pago Pago nei

 

O le tulaga lea o femalaga’iga le va o Samoa na lua, ia i latou ua usita’ia i le taimi nei, ua vevesi foi le tatou matagaluega o le soifua maloloina i le taumafaiga e puipuia le atunu’u atoa mai le Coronavirus. O le aiaiga fou lea na fa’atulaga e le DOH ia Ianuari 30, 2020.

 

O le taumafaiga lea ua fa’amalosia nei, o le taumafaiga lava ina ia tau le femalaga’i tagata i le va o Samoa ma iinei, ona o lo’o fesoota’i lelei lava Samoa ma malaga feso’ota’i ma Saina, lea e matuaina mai ai le ma’i Coronavirus.

 

“E ui ina e le’i i ai se tasi ua fa’amaonia mai Samoa ua maua i le Coronavirus, ae ua manatu le pulega o le tatou Malo ma le Matagaluega o le Soifua Maloloina e ao ina mautinoa a’ia’i e saogalemu pea le tatou teritori mai le Coronavirus ma ia taumafai atili fo’i tagata ina ia taofia le so’ona malaga i Samoa ina nei afaina mai se tasi ma toe fa’afo’ia mai iinei,” o se tasi lea o fa’apupulaga atili o lea fa’asa ua fa’amalosia nei.

 

O le aiaiga lea e le’i aofia mai i le toe soso’oga o le fa’asa na saunoa i ai le Kovana ma ua fa’atulaga ai e o’o atu ia Fepuari 28, 2020.

 

O le aiaiga fou na fa’ailoa e le Fa’atonu o le Matagaluega o le Soifua maloloina Motusa Tuileama Nua i le fa’aiuga o le vaiaso ua te’a.

 

TELE AIAIGA - LE MAUTINOA E TAGATA TULAFONO FA’AMALOSIA

 

I le aso Faraile talu ai ua fa’ailoa ai ai le tolopoina o le taimi e malaga ese ai uluai faigamalaga a va’alele a le Samoa Airways ma le Talofa Airways mo Faleolo i Samoa, ona ua le mautu mai le faasa a Samoa mo tagata malaga atu iinei e ulufale atu ae ua mae’a ona tapena.

 

O le tala mai o le kilia mai le tatou matagaluega o le Soifua maloloina mo i latou uma e malaga atu i Samoa, e tatau ona faia i le tolu aso ae le’i malaga i Samoa.

 

Ua mae’a fa’atulaga fo’i le aufaigaluega a le DOH i le Malae va’alele i Tafuna mo le siakiga o lea aiaiga a le MOH i Samoa, ma e to’atele sa taofia ona ua le usitaia lea aiaiga

Peitai, ua ese le fa’amalosiga o lo’o nonofo ma le aufaigaluega a nei Kamupani Va’alele e lua. Ua latou faailoa mai e le o mana’omia e le MOH i Samoa lea aiaiga ona fa’amalosia mo tagata femalaga’i i le latou va ma Amerika Samoa, ae ua na’o le vasega o tagata malaga sa’o mai le Iunaite Setete, po’o i latou foi sa na’o na uia Amerika Samoa ma agai atu i Samoa.

 

Fa’ailoa e se tasi o le aufaigaluega a le Talofa Airways, e lua itula na taofia ai le latou ulua’i malaga, ae se’i taumafai i latou e fa’amaonia mai le moni o le latou finauga ina ia mafai ona malaga pasese mo Faleolo.

 

Ua le tuu fo’i la le vasega o tagata galulue a le DOH i lea fa’asilasilaga mai le vasega o tagata faigaluega a Kamupani Va’alele ae ua latou fa’afesootaia fo’i latou pa’aga i Samoa i le MOH, pe o tonu lea fa’apupulaga o le fa’asa mo e ulufale atu i Samoa mai Amerika Samoa, i so’o se tusi folau lava.

 

Ina ua feso’ota’i ma le pulega a le DOH a le tatou Malo, na fa’ailoa mai ai e Motusa Tuileama Nua, “Ua iloga mai ua finagalo le MOH ina ia tuuina mai lea suiga fou o a latou aiaiga mo feoaiga i le tatou va nei ma Samoa, ae le’i mua’i fa’ailoa mai ia i matou. Ae le o se mea leaga lea ua latou tuuina mai, ua iloga mai o lo’o manatu Samoa e le’i o’o mai i Amerika Samoa le Coronavirus.”

 

O le fa’amatalaga a Motusa na ia toe fa’ailoa patino ai le fa’aiuga o a latou feutaga’iga ma le sui fa’atonu o le Soifua Maloloina i Samoa, Tagaloa Dr. Robert Thomsen, sa latou malilie ai, o le ulua’i malaga a va’alele ma va’a o so’o se ituaiga e malaga atu i Samoa e ao i pasese ma auva’a uma lava ona umia kilia o le soifua maloloina mai le Soifua Maloloina i Pago Pago

 

Ua le mautinoa nei, pe o i ai la se suiga i femalaga’iga i lenei vaiaso, ae ua lava ma totoe fo’i taimi ua tuuina mai e ao ai ona tapena le vasega o pasese uma ina ia latou o muamua e va’aia foma’i mo a latou kilia fa’amalosia ai lea aiaiga o le malaga atu i Samoa.