Ads by Google Ads by Google

Tala I Vaifanua

2021 MAE’A GALUEGA TOE FA’ALELEIA MALAEVAALELE I TAFUNA:

 

O le galuega toe fa’aleleia atili o se tasi o vaega tele (apron rehabilition) o le malae va’alele i Tafuna, e  fa’ato’a mae’a i le ogatotonu o le tausaga 2021.

 

O le galuega lea ua patino i le suaeseina atoa o le laualuga o le sima o le malae e tutu ai vaalele, ae ona autafa, ma toe fa’atulaga alapaipa i lalo o le malae, mo le suauu o va’alele. O lea galuega a ma’ea o lona tau aofa’i e $34 miliona - fa’atupeina e le fetarale.

 

I lenei galuega pitosili ona tele ua fa’atautaia mo le Malae Va’alele, ma ua vaetoluina i ona vaega patino.

 

O le Vaega Muamua o le galuega o lo’o faia e le McConnell Dowell, vaega lua e le  Paramount Builders ae o le vaega tolu, o lea e le’i faia lona tauofoga i le taimi nei.

 

 Ua fa’ailoa mai e nisi o sui o Kamupani sa tauofo muamua lenei vaega 3 o le galuega, tatala fo’i tauofoga, ae uma ane o lea ua toe manatu le Matagaluega o Uafu ma Malaeva’alele e toe fa’aulu mai nisi ofo ma toe faia le tauofoga mulimuli e iloa patino ai le Kamupani o le a fa’atautaia lea galuega.

 

ISI GALUEGA TOE FA’ALELEIA I LE MALAE VA’ALELE

 

O le poloketi fa’apitoa tau moli o le malaeva’alele ua maea nei ona fa’aleleia ma ua suia atoa i ituaiga moli e agava’a mo le galuega e tau fuafua mai i ai le sese’e mai o va’alele, ma o ituaiga moli nei ua laina tutusa ai fo’i i tatou ma la’asaga mo’omia mai e le FAA, tau i moli e faaaoga i malaeva’alele i le Iunaite Setete atoa.

 

O le tausaga ua te’a ua mae’a ai ona folasia le malae sese’e o va’alele 5/23 o le ulua’i malae sese’e lava lea o va’alele a le tatou Malo talu ona fa’atula’ia le Malae Va’alele i Tafuna. Ona o tulaga leaga tele o le malae sese’e lea sa mua’i faia ai lea galuea e tusa male 3,000futu le umi

 

Ua mae’a fo’i ona fa’aleleia le vaega o le malae va’alele lea e tautuaina ai tagata femalaga’i i le nofoaga tonu e to’ai taunu’u mai i ai atopa’u ma piki ai e tagata o le pasese latou atopau ma fa’amomoli.

 

Ua va’aia ua mae’a i ai le masini e fa’ase’e mai ai lava le atopau ma ave’esea mai e le pasese a latou ato ma uta ua tutusa lelei lava fo’i ma malae va’alele i fafo, ma ua toe fa’aleleia atoa fo’i ma le ea malulu o lea itu atoa o le malaeva’alele.

 

O lea itu atoa o galuega atoa na toe fa’aleleia sa fa’akonekarateina ai le Paramount Builders.

 

Ua toeititi fo’i mae’a lelei le toe fa’aleleia o le Hanger lea na faaleagaina i le Afa o Gita ia Fepuari 2018. O lea galuega sa tuuina lea i le Kamupani Faufale a le H & H Construction, ua faailoa mai ua fa’atulaga e mae’a lelei ia Mati 2020.

 

2017 NISI O PISINISI UA ILOGA UA LAUOLAOLA

 

O nisi o pisinisi ua matauina ua amata lauolaola e ala lea i a latou fa’amaumauga o a latou fefa’ataua’iga, ma ua aofia lea i le lipoti o fa’amaumauga o fefa’atauaiga a le DOC i le 2017. O vaega o lea lipoti e aotelega i ai pisinisi ma fefa’ataua’iga tau le tautua lasi mo  le soifua maloloina o le atunu’u, o tulaga o nofoaga e alaalata’i ai ma le tulaga o galuega fausia i Amerika Samoa.

 

O le tulaga o fefa’ataua’iga i oloa ma fa’amaumauga tau feso’ota’iga e na’o le $15,612 i le 2012 e aofia ai fefa’ataua’iga i luga o le initeneti, ae oo mai i le tausaga 2017 ua siitia maualuga i le $38,753. I le tulaga o pisinisi ma tautua fo’i o lo’o aga atu ina ia tausia lelei mea’ai paleni ma vaisuamalie e gaosia fa’apitoa ina ia fa’alalo ai le fa’atetele o le mamafa o le tino ua matauina sa na’o le $10,728.

 

I le tinoitupe fa’asili ma ausia i le tausaga e 2012, peita’i i le 2017 ua si’itia maualuga i le $40,680.

 

I tautua fo’i e talimalo ai le atunu’u i le tele o tagata asiasi mai fafo, ua fa’amauina le $28,924. i le tausaga 2012, ae oo ane i le 2017 ua si’itia lea fuainumera i le $35,302.

 

O tulaga o galuega fausia i le atunuu ua matauina ai le si’itia mai le $31,403 i a latou fa’atauga i le 2012, ae ua si’itia nei i le $34,086 i le tausaga 2017.

 

Ua maea lipotia mai o le aotelega o fa’atauga i Amerika Samoa i le tausaga 2017 e $1.079 Piliona, peita’i i fa’amaumauga i le tausaga 2012 sa i ai i le $1.153 Piliona, ma o se pa’u teisi lea ua fa’amauina.

 

O le aotelega o le tinoitupe fa’aalu i le totogi o aufaigaluega mo Pisinisi uma i le teritori ua fa’amauina lea e $143miliona i le 2017, ma o se si’itaga mai le faitauga o le 2012 e $114miliona. O le aofaiga o tagata faigaluega na fa’amauina mai i pisinisi uma i le tausaga 2017 e 8,767 tagata ua siitia mai ai fo’i le fa’amauga sa i ai i le 2012 e na’o le 7,070 tagata faigaluega.

 

FESILIGIA FCC TUPE TOTOGI A LE 911 AMERIKA SAMOA

 

Ua fa’ailoa e le Komesina o le 911 a le Malo Tele, Mike O’Rielly i sana tusi ia Kovana Lolo Moliga, pe aisea ua le tapena ma fa’ao’o atu ai se lipoti o pili totogia mo le laina feso’ota’i a le 911 i le tausaga 2018, e pei ona faia i isi tausaga uma ua tuanai.

 

O na o Amerika Samoa e le’i tuuina atu lea lipoti i le vaega a le fetarale, Federal Communications Commission (FCC).

 

Ua fa’ailoa mai e O’Rielly, ua i ai fa’amaumauga patino i le laina 911 e ao ina fa’amauina i tausaga ta’itasi ma tapena ai le lipoti e taua’aoina lelei i le Konekeresi, peita’i o le lipoti  mulimuli lava ua maea taua’aoina lea ia Tesema 2019.

 

I le tusi a O’Rielly sa ia fa’ailoa ai nisi o fesili e tatau ona fa’amalamalama atu e Lolo:

 

“Aisea ua le maua atu ai se tali maumaututu a Amerika Samoa i le talosaga ua fa’ao’o mai e le FCC ina ia avatua se aotelega o le tautua ma le fa’aaogaina o tupe na maua mai le laina 911 mo le tausaga 2018.

 

“O a ni ala ua fa’atulaga e le tou teritori e mafai ai ona aotelega fa’amaumauga nei e mana’omia mai e le FCC e pei ona talosagaina?”

 

“Poo aoina e Amerika Samoa pili o le laina 911 ma fa’aaoga i nisi mea ua fa’atulaga. Afai o lo’o fa’apena tupe maua mai le laina 911, e fia aotelega o le tupe ua fa’aaoga faapea ma o a nei mea ua fa’aaogaina i ai tupe?”

 

O lo’o ta’apena le tali atu a le kovana i lenei tusi.