FA’AAOGA LE FALE LAUMEI IA MATI - UA MAEA FA’AFOUINA

Ua fa’ailoa e le Matagaluega o Fefa’atauaiga (DOC), ua fa’atulaga e tatala le fa’aaogaina o le Gov. Rex Lee Auditorium i le masina fou o Mati pe a ma’ea ona fa’aleleia lea maota o le malo.

O galuega sa toe fa’aleleia o le Lee Auditorium e aofia ai le toe fa’aleleia o le taualuga, o ona pupuni sa toe suia atoa, o le ea malulu, ae maise ai o le lipea lava i vaega le tino o lea faletele.

Fa’ailoa e Magdalene Petaia o le DOC, lea e va’aia alagatupe o loo fa’aaogaina mo galuega toe fa’aleleia i lalo o le polokalama fetarale, CDBG, e i ai galuega ua mae’a fa’atulaga i le tauofoga e le’i mae’a lava ona lipea.

“O le lipea ma le ea e toe fa’aleleia ua tusa ma le 85% o lena vaega o le Konekarate ua mae’a, ma ua aofia ai ma le fa’atula’ia o le Projector ma lona screen e mafai ona fa’aaoga e maimoaina ai ata fa’asolo. Ma o le ala tonu lea o le a le mafai ai ona fa’aaogaina mo le mamalu lautele, peita’i mo le taimi nei, o le a fa’aaogaina mo matagaluega, ona o le mana’omia,” o se tala lea a Petaia.

Ua fa’ailoa mai, o loo sailia fo’i se Kamupani latou te fa’aauau ona tapenapena lea Maota ma va’aia fa’aleleia lona fa’atautaiga ma lona fa’aaogaina e le Malo ma le mamalu lautele.

I le taimi nei ua fa’atulaga le Fale Laumei mo le fa’aaliga o Galuega fa’asaeanisi a fanau aoga i le aso Lua ma le aso Tofi o le vaiaso a sau nei, e ui ona o lea sa manatu le Matagaluega o Fefa’atauaiga ina ia fa’ato’a tatala lea faletele i le masina fou.