TAGATA LAVEA APA FELELEA’I I LE UAFU FAGATOGO

Ua fa’ailoa mai se tagata fagota i le auva’a a le “FV Karlinna” o se tasi o va’a fagota o lo’o taula i le Uafu i Fagatogo, sa lavevea ona vae ma ona foliga, ona o apa felelea’i i le malosi o le matagi i le taulaga. O nei apa ua fa’ailoa mai o se vaega fou o le soso’oga o le Ofisa o le Port Administration ua fa’aleagaina i matagi malolosi, i le aso Sa na te’a nei.

I le taimi nei ona o manu’aga o lea tagata faigaluega, ua le toe mafai ona savali ua fa’aaogaina to’oto’o i ona luma e lua.

Na fa’aleagaina fo’i se vaega o le FV Karlinna, aua e tusa ma le 12:00 i le po o le aso Sa lava lea, ae toe laveia fo’i se vaega o lea va’a fagota ina ua toe matala ese mai le vaega lona lua o apa o lea vaega lava o le Ofisa o le Port Administration, pa’u tonu fo’i i lona "shooter". O le vaega lea e taula mai i ai laina o fagotaga a lea va’a fagota.

Fa’ailoa e le tamaitai e ona lea Kamupani Fagota, Christinna Lutu Sanchez, “E i ai le faanoanoaga tele ona sa lava le taimi e toe faia ai se galuega e tau taofiofi ai apa nei mai lea vaega fou o le Ofisa o le Pulega o le Uafu, ae le’i faia se galuega, lea ua fa’aopoopo le fa’aletonu, ua laki e le o se tagata fo’i ua toe afaina ai.”

E le’i fesoasoani ane foi nisi o le aufaigaluega ale Uafu i le taumafaiga e fa’asaogalemu le na fa’amanu’alia i nei apa felelea’i. Na vala’auina e Lutu Sanchez le Ofisa Tutotonu mo Fa’alavelave Fa’afuase’i [EOC], ona fa’ato’a o’o ane ai lea o nisi o le aufaigaluega o le Pulega o le Uafu e siakia nei mea ua fa’aleagaina.

AMATALIA SUESUEGA MEA FA’ALEAGAINA I MATAGAI MALOLOSI

O le taeao o le aso Lua na te'a nei na amata ai ona fa’agasolo suesuega i tua i aiga ua lipotia mai ua fa’aleagaina falenofo ona o le malolosi o matagi. O mea totino ua fa’aleagaina o le a suesueina lelei ma lisia e i latou ma e amata mai lava i falenofo o aiga i nu’u ma afio’aga.

O nisi o i latou ua suesueina muamua, ua fa’amauina ai i latou o lo’o ua mae’a nofoia nofoaga fa’apitoa ua tapena e le Malo mo le latou nofoia i lenei vaitau, seia mae’a toe fa’aleleia o latou falenofo.

Ua fa’ailoa mai e le EOC, ua mae’a fo’i ona fa’atalanoaina i latou uma ua amata tu’uina mo lea faiva ina ia latou siakia lelei nofoaga o lo’o nofoia e aiga nei, ia mautinoa ua mae’a siakia mai o latou falenofo ma lipotia lelei mai mea uma ua fa’aleagaina.

E to’a 102 i latou ua fa’amauina mai i le aso 18 Fepuari, 2020 ua nofoia nofoaga fa’apitoa nei mo sina vaitaimi, ae se’i tapena lelei o latou falenofo. Ua fa’amauina fo’i i le afiafi o le aso Lua na te’a nei, ua amata ona vaivai le malosi o matagi i le ao, peita’i i le po e aga’i atu i le vaveao o le aso Lulu o le a toe oo ai le malosi o matagi mai le 30-60maila i le itula.

O le aso Lua sa toe tatalaina ai le Malae Va’alele i Tafuna ma le malae va’alele i Fitiuta, ae le’i iloa i le taimi nei, le aso e toa tatalaina ai le malae va’alele i Ofu.