FA’AMAUINA LE ULUAI FALE FA’ALEAGAINA E LE MATAGI I FAGATOTO

Ua amata ona gasolo le vasega o e fa’amaumau mea ua faaleagaina o matagi malolosi ua maua ane ai le ulua’i fale ua fa’aleagaina ona o matagi i le amataga o le vaiaso, ma o le aiga fo’i e ona lea fale, pe sa nonofo i le fale lea, ua mae’a fa’amautu i le nofoaga ua saunia i le afio’aga o Fagatogo, le Hall a le Metotisi.

Mai fa’amaumauga i le aso 19 Fepuari, 2020 ua maua ai le aotelega o i latou ua nofoia nofoaga saunia lelei i le itula e 4:00pm, ua atoa le 120 tagata. Mai fa’amaumauga uma o lipoti ua mae’a tuufa’atasi, ua iloga ai e na’o Fagatogo lava lea ua lisia mai ai le fale ua fa’aleagaina uma atoa.

O nofoaga e ono ua mae’a alaala ai nisi ua le toe saogalemu o latou ola i totonu o latou falenofo, e aofia ai Fagatogo Metotisi, Laulii Metotisi, Tafuna Elementary, LDS Aunuu LDS ma Pago Pago Elementary.

Ua na’o Pago Elementary lava sa leai nisi na nonofo ai i le aso Lulu, peita’i, o e uma e to’a 18 sa fa’amalutia i Tafuna Elementary na toe foi uma i aiga i le aso Lulu lava. Na mafua lea tulaga, ona o i latou sa o ane i Tafuna Elementary, na masalosalo i latou atonu ua le sefe lava o latou falenofo mo i latou pe a oo ina tetele le matagi.

HAWAII E TALIMALO I LE PACIFIC FESTIVAL OF ARTS

O le taitaifono o le Komisi o Atisi a le Setete o Hawaii, Sanetoa Kalani English, sa ia fa’ailoa i nisi o sui a le American Samoa Arts Council, nisi o a latou taumafaiga ua amatalia ona tapenapena i ai, aua le latou taligamalo mo le Fa’aaliga tele o Tu ma Aga & Galuega Alofilima a Atumotu uma a le Pasefika, le ua latou aga atu i ai ma le olioli tele.

Ua fa’atulaga lenei fa’aaliga tele ia Iuni 10-20, 2020, ma ua fa’atulaga o le a faia lea i le Hawaii Convention Center, ae o le auau o lea fa’atasiga tele, e fa’atutu lea i “Suiga Matuia o le Tau, ae o lo’o tatou folau lava i le Fautasi!”

Ua fa’ailoa mai le paketi fa’asoa mo lenei fa’amoemoe a le Setete o Hawaii ua faatulaga ai le $18miliona, ma ua fa’atupe lea e le setete o Hawaii, nisi o tupe mai Pisinisi Tumaoti ma le Hawaii Tourism Authority.

Ua fa’ailoa mai, ua na’o pasese lava o au siva mai atunuu ta’itasi e ao ina popole i ai i latou uma, ae o isi mea uma e ta’avea le totogi atoa e Hawaii.

O le talanoaga lea i le va o le Sui Fa’atonu o le ma le Taitaifono o le Komiti Fa’afoe o Turisi a le tatou Malo, Vaito’a Hans Langkilde, sui Taitaifono Teleia’i Ausage ma le tamaitai fa’atonu o le Arts Council a le tatou Malo, Tiumalualii Dr. Mary Taufete’e, ao le’i tu’ua e i latou le setete mo Amerika Samoa i le aso Lulu.