A’OGA VOLLEYBALL FANAU 7-13 TAUSAGA - SOUTH PACIFIC ACADEMY

Ua ma’ea le polokalama Volleyball na fa’atula’ia mo le A’oga a le South Pacific Academy (SPA), mo le fanau e 7 tausaga seia o’o i le 13 tausaga le matutua. O le umi o lea polokalama e fa vaiaso sa fa’a’iu ia Mati 6.

O le polokalama sa fa’atalosagaina ai le sao o le susuga le Peresetene o le Asosi Volleyball a Amerika Samoa (le ASVA), Ben Sauvao e na te fa’atautaia a’oa’oga uma mo le fanau, ia fa’aosofia lo latou naunau e ta’a’alo i lea fa’agatama, lea e matua masani ai le vasega o fanau talavou a Samoa.

“O le amatalia o lea aoaoga amata mo fanau talavou i le Volleyball, o se miti ua tino mai, aua o le taumafaiga o lo’o ua fa’aa’e nei i le Volleyball, o le taumafaiga lava e amata mai a’o laiti tamaiti, ona silafia pasi lelei le polo, tali lelei le polo, ma seti fo’i le polo ina ia mafai ona tu’i e se tasi ma au atu i le isi itu o le neti, ae silisili ia maua ai se ‘ai. Ua i ai ala e le talia ai nei ituaiga pasiga o le polo, pe afai o le a le tusa ma tulafono ua fa’aaoga i le laufaliina o ta’aloga volleyball,” o se tala lea a Sauvao.

O le taimi atoa, sa fa’ata’ita’ia i le fanau aoga ala e tatau ma tulafono e taulia i le pasiga o polo i lea faagatama. Ia sa’o fo’i le mea e aga’i i ai le pasiga o polo. Ia mafai fo’i e le isi o le a soso’o ma oe, ona pasia lelei le polo mo le sui e tu’ia le polo i le isi itu o le neti.

“Na va’aia le fiafia tele o le fanau i lea aoaoga mo le fa vaiaso, ua iloga mai e mafai e i latou ona fa’aleleia atili lo latou iloa ua maua nei i le ta’aloga, ma afai ae fa’aauau ai pea ona aoaoina lelei i latou, e matua aoga tele lea taumafaiga ina ia siisii i luga le tomai o fanau e tauva ai i le Volleyball i le lumana’i,” o se tala fiafia lea a Sauvao.

Na taua’aoina tusi pasi i le aso Faraile ua te’a o fanau ua mafai ona fa’amae’aina e i latou le fa vaiaso o nei a’oa’oga fa’apitoa. Ua tofu fo’i ma le pine e faamau fa’ailoga ai le latou ulua’i taumafaiga ua mae’a i le volleyball, ma ua va’aia fo’i le matua fa’afiafiaina o i latou i lea tausinioga ua fa’aiu ma le manuia.

O mea e fa ua mae’a mautu nei i tomai o le fanau: Ua lelei le serve o le polo; ua lelei le pasiga o le polo i le isi sui ta’alo i lana ‘au; ua iloa lelei seti le polo ma ua mafai fo’i ona po ova e i latou le polo i le isi itu o le neti, i le isi au ta’a’alo.

10 SUI PASIA ULUA’I KOSI KOMIPIUTA ALE TAOA

E toavalu tina ma le to’alua o tama ua mae’a pasia le ulua’i Kosi Komipiuta na fa’atautaia mo le 6 vaiaso a le TAOA. Na amata lea kosi i le fa’aiuga o le tausaga ua te’a, peita’i e tele na’ua mea ua lutia ai, ona o le fevesia’i fo’i o le mamalu o le atunuu i faamai pepesi, ma ua fa’atuai teisi ai le latou kosi ma fa’amae’a ai.

Peita’i, ua fa’aalia e le tamaita’i faia’oga o lea Kosi, Lorelei Haleck - Fifita, “O le fa’atuai lea ua lava ma totoe ai le taimi, e fa’amasani atili ai le vasega lenei ina ia mautinoa ua latou iloa lelei faaaoga le mouse o le Komipiuta, ma fa’aatoatoa ai le latou iloa lelei ona fa’aaoga le Komipiuta e faia nai latou emeli i a latou fanau i nuu mamao, ae maise fo’i, ua iloa lelei ai ona faia latou Facebook e feso’ota’i ai ma fanau ma aiga i so’o se vaipanoa o le lalolagi.”

E i ai se tasi o tama’ita’i feso’ota’i ma Haleck Fifita mo lea kosi, lea na fa’atupeina mai e le CDBG - mai le Matagaluega o Fefaataua’iga a le tatou Malo, e fa’atauina ai le 11 o masini Komipiuta, e 10 mo le vasega, ae tasi mo faia’oga o lea kosi.

Ua fa’aaupegaina se potu fo’i i le Ofisa Autu i Pago Pago ina ia fa’atautaia ai nei a’oa’oga fa’apitoa mo lea ulua’i vasega, ma ua faailoa mai e se tasi o tina, Siliafai Sioeli Falevai, “O le mea sili ona fa’afiafiaina ai a’u latou, ua mafai ona feso’ota’i ma si a’u tama teine lava e to’atasi o lo’o ua nofo mamao mai ma faigaluega mo le tausiga o si matou fo’i aiga. O lo ua maua le avanoa e fa’aaoga ai le telefoni mo feso’ota’iga tau initeneti e tali ai ma talanoa ai i so’o se taimi, ua va’ai atu fo’i i ona foliga o talanoa mai i le facebook messenger. Fa’afetai mo nei auala, o aso ta’itasi lava ua maua ai le talanoaga.”

Ua tauaaoina tusi pasi o lea vasega, ae ua le mautinoa nei pe toe soso’o lenei kosi i se isi vasega fou, ona o le tulaga si’itia o le Ofisa o Tagata Matutua i le nofoaga fou i Tafuna.

Saunoa le tamaita’i fa’atonu o le TAOA, Evelyn Lili’o-Satele sa ia fa’amalosi’au atu ai i le ulua’i vasega lenei, “Ia fa’aaoga le tatou potu o masini Komipiuta, aua ne’i muta ai i le mea ua e iloa lelei ona fa’aaoga ai komipiuta, ae fa’aopoopo i ai isi mau mea e mafai ona faia e fa’aaoga ai nei masini. O le tatou so’otaga lena ma le lumana’i o fanau.”

MAUA LE CORONAVIRUS I HAWAII - FA’AMAONIA IA MATI 06, 2020

Ua amata ona toe fa’atulaga le suiga e tatau ai ona taga’i totoa le tatou malo ia i latou uma e ulufale mai i Amerika Samoa mai Hawaii, ona o le aso Faraile ua fa’amaonia mai ai le maua o le ulua’i tagata i le Coronavirus i Hawaii.

Fa’ailoa e le Faatonu o le Matagaluega o le Soifua Maloloina, Motusa Tuileama Nua, “Ua tatau ona toe taga’i toto’a le matagaluega e suia fo’i tulafono tamau mo femalaga’iga i le va o Hawaii ma Pago Pago”.

O lo ua feutagai nei le ali’i fa’atonu ma lana aufaigaluega, fa’atasi ma le pulega o le falema’i i Faga’alu ae maise o le Kovana fo’i, ina ia fa’amaonia lea suiga tele i le tulaga o femalagaiga i le tatou va ma Hawaii.

Fa’alauiloa aloa’ia e le alii Kovana o Hawaii, Kovana David Ige, i le aso Faraile ua te’a le tagata muamua i Hawaii ua maua i le coronavirus ma o se tasi lava o Hawaii sa alu malaga i le Meli tele lea ua mae’a mautinoa ua to’atele lana pasese ua maua i le Coronavirus.

I le taimi nei ua taofia lea sui i lona fale ma ua suesueina atili o ia, ae ua le o toe lamatia lona soifua.

FA’AMAONIA SENATE TOFIGA A LE KOVANA MO LE LOIA SILI

O le vaiaso ua te’a sa fa’amaonia ai e le Maota Mauauga, le tofiga a Kovana Lolo Matalasi Moliga, le tamaitai loia ia Mitzie Jessop Ta’ase e avea ma Loia Sili o le malo. O le palota fulisia a le Senate e 18-0. O le taeao nei e iloiloina ai e le Maota o Sui lea tofiaga a le kovana.

Ao le’i faia le filifiliga a le Kovana Sili, sa mua’i fesiligia e le Kovana ia Jessop-Ta’ase pe o i ai sona fa’anaunauta’iga o le tofiga loia sili. E fa’alua ona fesiligia e le kovana le tamaitai loia, ona fesoota’i lea o ia ma le afioga le Peresetene o le Senate,  Gaoteote Palaie, sona taofi, aua o lo’o faigaluega o ia, o le Loia a le Maota Maualuga.

“O la’u tali ia te ia, va’ai aua e le fa’alua ona sau fa’amanuiaga fa’apea i le tele o taimi, ae afai e fia avea o ia ma se ulua’i tama’ita’i Loia Sili a Amerika Samoa, ua tatau ona ia talileleia lea avanoa. Lea ua faia nei lana filifiliga, ma ua o’o mai ia i tatou o tama o le atunuu mo lana fa’amaoniga,” ose fa’apupulaga lea a Gaoteote i le taimi o le iloiloga a le Maota Maualuga.

“O se tasi lenei o avanoa ua tatou toe fa’amaonia ai se tasi o alagaupu a le atunuu, “E au le Ina’ilau a tina”, se isi lea fa’aopoopo a le ali’i peresetene.