Ads by Google Ads by Google

Tala I Vaifanua

A’AFIAGA CORONAVIRUS I AMERIKA SAMOA - 2 MALAGA SAMOA AIRWAYS

 

Ua fa’ailoa e le Samoa Airways, ina ia fesoasoani e toe faafo’ia mai tagatanuu Amerika Samoa fa’apea ma i latou e nonofo mai i Amerika Samoa ma faigaluega, ae maise fo’i o Faife’au uma sa autova’a atu mo se fonotaga fa’apitoa, ae ua talosagaina le toe fia fo’i mai i a latou ekalesia o tausia iinei.

 

Ua fa’atulaga ai le na’o le lua malaga e fa’atagaina  i le va o Pago Pago ma Samoa. Mati 24 i le aso Lua i Samoa ae aso Gafua ia i tatou i’inei ma le Aso Lulu i Samoa  ae aso Lua i Amerika Samoa nei.

 

O nei malaga uma e lua, ua leai ni pasese e toe fo’i ma le va’alele i Samoa, ma ua faia lea ina ia usita’ia ai le fa’asa ua i ai nei i femalaga’iga i le va o Samoa ma Amerika Samoa le usoga.

 

FA’AITITIA MALAGA A LE HAWAIIAN AIR AOFIA AI MA MALAGA I AMERIKA SAMOA:

 

Ua fa’ailoa e le Hawaiian Airlines, ina ia tau taofiofia ai le a’afia o le to’atele i le fa’ama’i ua i ai nei i Hawaii, le Coronavirus, o le a fa’aauau pea le latou tautua i le taimi nei, seia oo i le aso Lulu, ae o le a fa’amalosia nei le suesuega o pasese uma e fia malaga mai i Amerika Samoa ma nofo va’ava’aia i le 14 aso a’o le’i malaga mai. O le fuafuaga lea, o le a amata fa’amalosia pe a mae’a le malaga lea o le a tulaueleele mai i Amerika Samoa i le aso Tofi nei.

 

Pe a mae’a loa lea malaga, o le a toe tagai toto’a loa le Ofisa Ulu i ala o le a fa’aitiitia ai latou malaga i le va o i tatou ma Hawaii.

 

Ua mae’a faia le galuega a le Hawaiian Air o le loto o a latou tagata uma ua mae’a totogia o latou pasese, ma ua fa’atulaga fo’i le Uepesite poo le Upega Tafailagi e faia ai lea tulaga e tagata uma.

 

Ua le gata i le taga’i toto’a ai i aiaiga o pasese totogi, ae ua fa’atulaga mai ai ma mea uma e ao ina usita’ia tau femalaga’iga e tagata uma.

 

Ua na’o le tasi lava le malaga a le Hawaiian Air i le malae va’alele i Los Angeles i aso Ta’itasi o le vaiaso ae na o le tasi le malaga mo Amerika Samoa i aso tofi.

 

SUIGA I SAUNIGA LOTU A LE EKALESIA KATOLIKO AMERIKA SAMOA

 

I se tusi na taua’aoina i le vasega o Patele, Tiakono ma Fesoasoani a le Ekalesia Katoliko i Amerika Samoa, ua fa’ailoa atu ai e le afioga Epikopo Peter Brown i le Aufaigaluega “Ua maua e i tatou le vala’au mai le Ofisa Ulu o le tatou Malo i se tatou fa’aiuga ua faia e tua o fa’apotopotoga a le Ekalesia mo a latou sauniga mamalu. Ua fesiligia ai se tatou fa’aiuga ua faia ina ia opogi le fa’atulagaga ua ki ai nei a le malo mo ona tagata uma, ina ia le pipisi tele le fa’ama’i o le Coronavirus i totonu o le atunuu pe a ofi mai. O le auala ua mae’a fa’atulaga e le Malo, o le taofia o le so’ona fa’apotopoto pe feoa’i solo le atunuu.”

 

O le ala la lea ua faia ai le faatulagaga fou lenei, ina ia tatou usita’ia i taimi uma e afua mai ia Mati 23, 2020:

 

1/ Ia taofia uma sauniga lotu se’ia toe fa’ailoa atu.

 

 2/ Ia fa’aauau pea ona faia sauniga lotu ta’itasi a ekalesia lea e to’aititi lava tagata e auai , ae aua nei feso’otai tagata i le fa’atalofa, pe fusi atu le tasi i le isi, ae tau ina fa’amasani ma talanoa, 3 futu le mamao o le isi mai le tasi.
3/ O isi sauniga uma o le fa’anoanoa e ao ina fa’ataunuuina ua soloia nei, e le fa’ataunuuina.

 

4/ O isi uma sauniga o le Koluse ia fa’ataunuuina ae ia fa’amalosia le usita’ia e leai se fa’atalofa ma aga o le fa’amasani - sogi atu ma le fusi atu i se tasi.

 

5/ O isi sauniga tetele uma sa fa’atulaga a le Ekalesia i le Pule’aga Samoa Pago Pago, o le a taofia uma e le faia.

 

6/ O maliu uma i o latou sauniga, o le a faia na’o le Patele e tasi ma le aiga tonu o le sui ua maliu, ma ia taofia fo’i le faia o le fa’asamoa i o latou maliu.

 

7/ Asiasiga uma mo e mama’i e mafai ona faia ae ia fa’atulaga e faia mask ma mea uma e ao ina usita’ia i le tausiga o le mama a’ia’i mai siama.

 

Ua faapea fo’i ona fa’ailoa fa’alaua’itele mai ma suiga o Sauniga uma o le Laupama ma le Vaiaso Pa’ia a kle Ekalesia.

 

1/ Ua taofia mneio le sauniga mamalu o le solo fa’aaloalo o le Aso Sa o le Laupama ma le Vaiaso Pa’ia, lea sa fa’atulaga e faia ia Aperila 05, 2020.

 

2) O le sauniga pa’ia fo’i sa fuafua mo le aso 7 Aperila, 2020 ua tolopoina se’iamoo i se isi aso e logoina atu e faia ai.

 

3/ Sauniga o le Aso Tofi Pa’ia ua fa’atulaga e faia lava le sauniga e tasi i le malumalu ta’itasi o le ekalesia e leai nisi o le ekalesia e auai ae na’o le aufaipese.

 

 4/ Aso Faraile o le Eseta e faia na’o le sauniga i le malumalu e le auai le eklaesia nao le aufaipese, ma le aufaigaluega tofia o patele.

 

5/ Sauniga o le tutuina o Moligao o le Eseta e faia na’o Ekalesia ta’itasi na;o le Aufaipese ma le aufaigaluega tofia.

 

6/ Sauniga o le Eseta Aperila 12, Na’o le tasi le sauniga e faia i malumalu ta’itasi na’o le aufaigaluega tofia ma le aufaipese leai se ekalesia e auai.