Ads by Google Ads by Google

Tala I Vaifanua

AUINA ATU ULUA’I SUESUEGA FOU I FAFO E FA’AMAONIA AI

 

O ituaiga suesuega sa fa’atalitalia e le vasega o foma’i e mafai ai ona vave sailia pe o maua nisi o le Coronavirus ua to’ai taunuu mai ma ua fa’atautaia i se tasi o tama’ita’i na suesueina po’o maua i le coronavirus, ma ua auina atu nei fafo mo le fa’amaoniga.

 

O le ulua’i taimi lea ua fa’atautaia ai lea ituaiga o suesuega i le teritori ma auina atu i fafo.

 

O le tina lenei, o se tasi o tina mai le atunu’u, sa malaga atu i Niu SIla ma taliu mai i Samoa nofo va’ava’aia ai ma faia suesuega mae’ae’a i le Coronavirus ma ina ua mae’a ona mautinoa ua kilia o ia mai lea fa’ama’i pepesi. Na ulufale mai o ia i Amerika Samoa ia Mati 14, 2020.

 

Fa’ailoa e Dr. Aifili John Tufa, le Epidemiologist a le Matagaluega o le Soifua Maloloina, “Ua mae’a va’ava’aia toto’a lea tina, ua mae’a fo’i ona faia ai le suesuega e auina atu i fafo, ma ua ia fa’ailoa mai, e tusa o le lua aso ae le’i malaga mai i Amerika Samoa, ae ua amata ona taletale ma fiva teisi o ia, peita’i o lea na maua i le masini fua fiva a le tatou Malaeva’alele.”

 

Ua mae’a fo’i ona nofo va’ava’aia o ia mo le tolu aso i Samoa e pei ona fa’atulagaina ai e le MOH. E le’i leva mai le aso na ulufale mai ai i Amerika Samoa ae amata ona fa’alogoina e lea tina le fufusi mai o lona fatafata ua faigata ona manava ma ia vala’auina loa le Matagaluega o le Soifua Maloloina ma ua ia fia va’aia i latou mo se isi suesuega mae’ae’a.

 

Fa’ailoa e Dr Tufa na o atu sui o le Matagaluega o le Soifua Maloloina na o atu ma faia sailiga auiliili i ona auga ua va’aia ma ua iloga ai, e le mana’omia ona taofia o ia i le falema’i.

 

Peita’i ua taofia ai lava o ia ma suesuega ma fa’amaumauga i lona fale e pei foi o nisi na ulufale mai i le teritori ma ua masalomia i le fa’ama’i pepesi. Ua fa’anofo to’atasi fo’i i latou i lona aiga ma ua fa’atulaga i latou e tautuaina mea e mana’omia e ia, ma ua nofo va’ava’aia atoa foi sui uma o lona aiga, peita’i ua solosolo manuia lava o ia i le vaitaimi nei.

 

Ua tula’i mai foi e le o toe mamao ona mae’a lea o le 14 aso e nofo va’ava’aia ai o ia, ma e tauau e le o a’afia o ia i lea fa’ama’i pepesi ona ua solosolo manuia nei.

 

I le taimi nei ua fa’auia atu le swap test a le fafine lea i le CDC i Atlanta, Georgia ma ua tatalia nei le faamaoniga mai pe o maua pe leai, ma o le aso Tofi talu ai na avatua ai lea suega. Ua fa’ailoa mai o le umi e tatalia ai le mai le 3 i le fitu aso.

 

E lua fo’i isi suega na auina atu i Honolulu ina ia fa’atautaia ai suesuega, ma ua fa’ailoa mai, afai ae le manana’o Hawaii e fa’atino ai iina suesuega, o le a fa’aauau loa ona auina atu i Atlanta mo le fa’amaoniga.

 

SUIGA POLOAIGA PUIPUIGA MAI LE CORONAVIRUS

 

Ua fa’alauiloa e le Matagaluega o le Soifua Maloloina nisi o suiga fou, sa amata i le aso Gafua, Mati 23, ona o le coronavirus.  O i latou uma e faimalaga i tusi folau Amerika mai atunuu ua mae’a i ai le Coronavirus, a ulufale mai i Amerika Samoa e tatau ona nofo va’ava’aia mo le 14 aso atoatoa, pe a mae’a ona siakia lo latou soifua maloloina poo maua i le Coronavirus, ae va’ava’aia i latou i o latou aiga.

 

E fa’apea fo’i i latou e malaga mai isi atunu’u eseese ua maua ai le Coronavirua, e tatau ona latou fa’atautaia uma suesuega ua fa’atulaga e sailia ai nisi o lo ua mae’a maua i le Coronavirus ma nofo va’ava’aia fo’i mo le 14 aso.

 

E fa’atumu fo’i le latou pepa e fa’ailoa ai atunuu sa latou oo i ai ma suesuea auiliilia fo’i i lo latou to’ai taunuu mai i le malae va’alele i Tafuna.

 

O lo’o taofia pea le toe talosagaina o ni pemita mo tagata mai isi malo e ulufale mai ai, se’i vagana ai tagata nuu o Amerika Samoa lava ia e fia talosaga mai latou OKBoeard e mafai ona faia lea tulaga i le taimi nei. Ua taofia fo’i malaga i le va o Amerika Samoa, ma Samoa ae maise Tonga.

 

E lua malaga fa’apitoa a le Samoa Airways i le aso Gafua ma le aso ananafi na  fa’atulaga e la’u mai ai tagata Amerika Samoa ma i latou e galulue ma nonofo mau i Amerika Samoa o lo ua i Samoa ae mana’omia ona toe taliu mai i fanua.