Ads by Google Ads by Google

Tala I Vaifanua


O se va’aiga lena i le suiga ua i ai nei i totonu o le VA ma ua taofia ai le to’a 40 o le pasese a le Hawaiian Air na tulaueleele mai i le aso Tofi mo suesuega maeaea i le 14 aso. [ata: Leua Aiono Frost]

O le va’aiga i le VA Center lea ua mae’a galueaina mo le fa’amoemoe e fa’aaogaina e le pasese na malaga mai i le malaga a le Hawaiian Air i le aso Tofi na te’a nei ma ua maea nofoia le 40 o i latou i lea nofoaga fou. [ata: Leua Aiono Frost]

42 PASESE HAWAIIAN AIR TAOFIA I LE VA CENTER

 

Mai le to’a 42 o le pasese a le Hawaiian Airlines i le po o le aso Tofi ua taofia mo le nofo va’avaaia mo le 14-aso, e to’a 40 o i latou ua nonofo i le VA Center i Tafuna, ae isi vaega ua nofo va’avaaia i le falema’i fa’aitumalo i Leone.

 

O le aso Tofi ua te’a i le aoauli na ma’ea ai galuega fa’aleleia o le VA Center aua lea fa’amoemoe.

 

O le to’atele o i latou ua taofia mo le 14-aso nofo va’avaia i nei nofoaga a le malo, na malaga mai setete ua sasao atili ai le Coronavirus, Washington ma California, ma ua fa’ailoa e le ali’i fa’atonu o le Soifua Maloloina, Motusa Tuileama Nua, “E tau va’aia loa ia te oe se auga lava se tasi o le gasegase lenei, e le taitai lava alofia oe mai taofia loa o oe mo suesuega auiliili ia le 14 o aso i nofoaga ua tapena mo lea fa’amoemoe.”

 

O le isi to’a 103 o le pasese ua nofo va’ava’aia i o latou aiga, e asia lava fo’i e foma’i i latou i o latou aiga, ia ia mautinoa e le o alia’i ane ai auga o le Coronavirus.

 

Pe afai e iloa e soo se tasi se tasi fa’ato’a malaga mai, ae ua va’aia ua i ai le suiga i o latou soifua maloloina, e ao ina lipotia mai i le Matagaluega o le Soifua Maloloina i numera feso’ota’i a i latou ma le mamalu lautele, 633-5871/72.

 

SUIA FALETAALO KOLISI - SIITIA NOFOAGA VA’AVAIA I FATUOAIGA

 

O le aso Faraile na te’a ua suia ai loa le nofoaga sa fa’atulaga i le faleta’alo o le Kolisi Tuufa’atasi e suesuea ma nofo va’ava’aia ai tagata malaga mai i le atunuu, ina ia mautinoa e le o afaina  latou i le coronavirus.

 

O lo ua siitia atu nei lea nofoaga i Fatuoaiga i le Potu fa’apitoa mo le Aufaigaluega a le Atua a le Ekalesia Katoliko.

 

Ua fa’ailoa mai e Samana Semo Veavea o le Homeland Security, o lo ua i ai potu ua mae’a saunia i lea lava nofoaga ua fa’atula’ia nei, ma ua tofu fo’i ma faleta’ele, ma ua mafai ona fa’aaogaina e i latou o lo ua nonofo puipuia ia mae’a le 14 aso o le latou suesuega o manaomia ona kilia ai i latou.

 

O i latou o lo’o nofo va’avaaia mo le 14-aso i Fatuoaiga ma le DYWA, o nisi o tagata nu’u o Amerika Samoa sa auina fa’anatinati mai Samoa i le amataga o le vaiaso ua te’a, ona ua tapunia e Samoa le alava’a i le ma o Samoa e lua.

 

I le taimi nei ua atoa le 233 o i latou ua nofo va’ava’aia mo le 14 aso e fa’atautaia latou suesuega pe o maua i le coronavirus.

 

Ua tufaina atu fo’i e le Malo o Amerika Samoa mea tausami mo i latou uma o lo’o taofia mo nei suesuega o le Coronavirus.

 

E to’a 49 sitiseni Amerika na malaga mai Samoa ma e tatau fo’i ona malaga ese atu i Hawaii i le malaga i le aso Tofi mo Hawaii. Na nonofo i latou i faletalimalo ae totogi e le malo fetarale.