Ads by Google Ads by Google

Tala I Vaifanua

LEAI SE ISI MAUA CORONAVIRUS - SUESUEGA E 3 TOLU AVE I FAFO

 

O suesuega e tolu sa auina atu i Amerika e sailia pe fa’amaonia mai se isi ua maua i le Coronavirus, ua fa’ailoa e le Matagaluega o le Soifua Maloloina e matua leai lava se tasi.

 

Ma ua fa’aauau lava fo’i ona tuuina le mamalu o lo’o nofo va’ava’aia i ni auga o le Coronavirus i nofoaga ua fa’atulagaina e le malo, VA Center, Fatuoaiga, Kanana Fou, ma le falema’i fa’aitumalo i Leone. Ua tapunia le nofoaga i le DYWA i Pago Pago.

 

“O le te’ena mai o le maua o nisi na auina atu suesuega i fafo mo le fa’amaoniga, o se mea lelei tele lea mo le atunuu ma ona tagata lautele,” o se tala lea a le ali’i fa’atonu o le Soifua Maloloina Motusa Tuileama Nua.

 

O se tasi tina lea na masalomia lava ua ulufale mai ma le Coronavirus, ua taofia fa’atasi i latou ma nisi o lona aiga, o nisi sa latou feso’ota’i i lona to’ai mai i le atunuu, aua lava le taumafaiga ia tausia le soifua maloloina o tagata uma mai fa’ama’i pipisi.

 

Mai Guam ua lipotia ai le to’alua nisi o e na maua i le Coronavirus i Guam ua maliliu. O i la’ua nei o se tama e 42 tausaga le matua ma le tina e 49 tasuaga le matua.

 

O suesuega uma o lo’o fa’atautaia ina ia fa’amaonia pe o maua sui i le Coronavirus pe leai, ua auina atu lea i Honolulu, o nisi fo’i ua auina atu sa’o i Atlanta Georgia.

 

Ua oo atu nei le sosolo a le Coronavirus i le Northern Mariana Islands ua maua ai le to’alua ma ua fa’amauina fo’i i la’ua nei.

 

I le taimi nei ua maea sainia nei e Peresetene Trump le fa’atagaga ma fa’ailoa ai ua a’afia Guam i le Coronavirus, ma ua agava fo’i i latou i so’o se ituaiga fesoasoani mai le fetarale.

 

MALAGA PEA SAMOA AIRWAYS VA O TUTUILA MA MANU’ATELE

 

E ui ina ua le toe faia i malaga a le Samoa Airways i le va o Amerika Samoa ma Samoa, ae ua toe fa’aauau malaga a le kamupani va’alele i le va o Tutuila ma Manu’a.

 

E i ai malaga togipau mo le aso Tofi ma le aso Faraile o le vaiaso ua te’a, ma fa’atulaga ai foi malaga o lenei vaiaso.

 

“O malaga uma e tolu o lenei vaiaso ua fa’atulaga mai e le Ofisa o le Kovana, ma ua fuafua nei malaga e totogia fo’i e le Malo malaga uma fo’i ua fa’atulaga,” o se tala mai lea a le tama’ita’i ofisa o le va’alele i Tafuna.

 

O malaga fa’atulaga mo Manu’a - aso Gafua, Aso Lulu ma Aso Faraile e malaga ai le vaalele mo Fitiuta, ae o le aso Lua ma Aso Tofi e malaga ai le va’alele i Ofu. Afai e mana’omia ni malaga fa’aopoopo e fa’atulagaina mai lea e le Ofisa o le Kovana, lea foi e totogi i ai pasese o i latou e fia malaga i Manu’a.

 

I tasi le va’alele a le Samoa Airways, fa’atasi ai ma pailate ma inisinia o va’alele ua fa’amautu nei i Tutuila mo le fa’afoeina o malaga i Manu’a.

 

MAEA VAIASO O A’OGA FANAU MAI AIGA - FA’AAUAU PEA MO FAIAOGA

 

Ua mae’a le ulua’i vaiaso talu ona nonofo le fanau i aiga, ma ua taumafai fo’i faia’oga ina ia fa’auia atu a latou meaa’oga e ala i sootaga o le Initeneti. I le taimi nei, e le o tofu aiga ma le initeneti, ua le mailoa la poo fa’apefea lena vaega tele o le fanau a’oga, poo faia ni latou vasega pe leai.

 

Ua mautinoa le faigata i matua ona malamalama tonu i mea e ao ina faia, sa tatau ona faia se sootaga a matua ma faia’oga e tusa o meaaoga a latou fanau i le vaitau lenei.

 

I a’oga maualuluga ua fa’aaogaina telefoni, ma o se mea e mafai ona faia, ae o le faigata, e i ai matua e le iloa fa’atasi ma se faaaogaia o Telefoni mo feso’ota’iga a fanau ma faia’oga aua le aumaia o fa’atonuga i le fanau i meaa’oga e faia i lenei vaitau o le motusia o vasega i potu a’oga ona o le coronavirus.

 

O nisi o faia’oga ua fa’ailoa mai, o le meaa’oga ua fa’atonu i lana vasega, ia latou fa’amaumauina mai uma mea o lo’o latou iloa o tutupu i o latou aiga, ae maise o latou ekalesia ma le Malo fo’i, a’o lutia fa’atasi ai i tatou i le Coronavirus lea e le o mana’o ma se tasi e ulufale mai.

 

O se talatalaga lea e avea o se tala tusia i aso ta’itasi ma e maua ai togi o le fanau ona o lea galuega i aso ta’itasi. Mai le Ofisa o a’oga tulaga muamua i le atunuu, ua fa’ailoa mai le faiga o lo’o faia ai mea’aoga mo le fanauiti nei, “Pe afai ua leai lava se sootaga fa’ainiteneti i le fale o se aiga, ua maua paketi o meaaoga mo le vaiaso atoa a le fanau, Afai la ae o mai matua e avatu mea’ai a le fanau a’oga, ua mafai ona piki atu ai ma meaa’oga mo le vaiaso atoa a le fanau.

 

A mae’a fo’i ona faia na meaaoga, ona toe fa’aopoopo atu lea o le isi paketi mo le vaiaso fou ae fa’afo’i mai meaa’oga ua uma na faia pe a o mai e piki mea taumafa a le fanau.

 

O tusitusiga nei o le a mautinoa lava le fa’aalia ai o mea e tolu, “Ua matua le fiafia ua leai se mea e faia i aiga! Ua misia le olaga i totonu o le aoga e sootaga ai ma latou uo mamae, a’o nisi ua tauau e fa’ailoa mai ai le fiafia ua nonofo i le fale ma faia nisi o fe’au e fesoasoai i latou aiga, ma tusia latou fa’amaumauga o mea o va’ai i latou o lo’o faia e tagata i lenei vaitau o le fa’ama’i pepesi.”

 

O nisi o le fanau i a latou galuega ua fa’aoo mai ua latou fa’aalia ai, e leai ma se fesoasoani ua maua mai e i latou i o latou matua mai le taumafaiga e faia latou meaa’oga, lautogia i lena vaiaso ua te’a.

 

Ae o nisi ua fa’ailoa mai o nisi o mea e le o ni meaaoga nei e masani ona latou faia i potu a’oga.

 

Ua fa’ailoa e nisi o le fanau a’oga, e sili atu ona faigata ia i latou ona fa’atino latou meaa’oga pe a nonofo i o latou aiga ma a’o’oga mai ai.

 

Ua fautuaina faia’oga ina ia latou muai tu’uina se avanoa i le fanau a’oga, aua e moni lava a latou fa’asea, sa le masani tele i latou i le a’o’oga mai i tua i o latou aiga, o le usu mai lava i le a’oga e masani ai i latou ma faia fa’atasia latou meaa’oga ma isi uso a tamaiti a’oga, ma le fesaosoani tele a le faia’oga i a latou fa’afesili.