Ads by Google Ads by Google

Tala I Vaifanua


Lolo Matalasi Moliga, Kovana Amerika Samoa

Le va’alele a le USCoast Guard C-130 ua tulaueleele mai ma le Uta o le sapalai o loo mana’omia e fa’aauau ai galuega a le vasega o e taimua mai i le puipuiiga o le mamalu lautele mai le coronavirus. [ata: Leua Aiono Frost]

TOE TOFIA MITZIE JESSOP TA’ASE MO LE LOIA SILI A LE MALO

 

Ua toe tofia e Kovana Lolo Moliga le tama’ita’i loia o Mitzie Jessop Ta’ase e avea ma Loia Sili a le tatou Malo, e ui ina e le’i mua’i pasia mai lona tofiga muamua e le Maota o Sui ae sa pasia e le Maota Maualuga.

 

Fa’ailoa e le kovana i le toe tofia o Jessop-Ta’ase, “O le taimi nei ua matua sili atu ona mana’omia ona mautu mai le Loia Sili i lona tofiga aua o loo feagai le lalolagi ma le tulaga vevesi i a’afiaga o fa’ama’i pipisi. O le a tele atu mea e manaomia ai ona fa’amautu lelei mai i le Ofisa o le Loia sili nai lo se isi lava taimi i le atunuu ma le va ma fafo.”

 

Taua e le kovana le tulaga gaogao o ali’i ma tamaita’i loia o loo i totonu o Amerika Samoa, ma o le toatele o lo’o galulue i a latou pisinisi loia. E 23 tausaga o galue Jessop-Ta’ase i galuega fa’aloia e aofia ai i Amerika, ae maise le ofisa o le loia sili i le teritori ma le Senate.

 

“E tatau lava ona mautu mai le taiulu o le Ofisa o Loia a le Malo, ia mautu a’ia’i fa’aiuga fa’aletulafono mo tagata lautele ma tatou sootaga fa;aletulafono fo’i ma isi malo i le vaitau lenei o le a’afia fa’atasi o malo uma i le fa’ama’i pipisi ua lutia ai nei,” o se saunoaga lea a Lolo.

 

TAUNU’U VA’ALELE C-130 USCOAST GUARD MA SAPALAI MO LE MALO

 

O le vaalele a le US Coast Guard C-130 na tulaueleele i le aso Lulu i le malae va’alele i Tafuna  e aumaia sapalai o loo sili ona mana’omia i le taimi nei mo galuega uma e puipuia ai le atunuu mai le pesia i le Coronavirus.

 

O nei sapalai o mea e puipuia ai le pesia vave i le Coronavirus poo PPE e aofia ai o ofu e laeia e puipuia mai fa’ama’i o le coronavirus, pupuni fofoga ma isi ituaiga sapalai mo i latou e ta’imua i galuega tete’e i le Coronavirus. O i latou nei e aofia ai Leoleo, foma’i ma tausimai, EMS, ma isi.

 

Ua fa’ailoa mai e Samana Veavea fa’atonu o le Homeland Security, sa talosagaina fo’i ni moega ma palanikeke ae foliga mai e le o aumaia na mea i le malaga lenei. Ua leai lava se isi mea e mafai ona faia seiloga e tulaueleele lea va’alele ma siakia lana uta ua la’u mai ai.

 

VAILA’AU MO TOGAFITIGA O LE ALIIVA’A I LE VA’A FAGOTA SAINA

 

I le aoauli o le aso Lulu na mafai ai ona fa’aoo atu se fa’amomoli o vaila’au mo togafitiga o le aliiva’a o le va’afagota Taiwan lea na te’ena le ulufale mai i Amerika Samoa e le kovana.

 

O le ali’i foma’i Dr Saipale Fuimaono sa ia fa’ailoa maia, “Ua fono i matou o foma’i ma ua tatau ai ona talia le talosaga e fa’auia atu le fesoasoani e ala i le auina atu lea o vaila’au mo togaiftiga o lea sui.

 

Sa fa’aaogaina se va’a e malaga atu ma nei sapalai o vaila’au, ma o le va’a lava o le ali’i faipisinisi o loo fesoota’i ma le Kapeteni o le FV Man Fi Tsai, le susuga Herman Popeye Thomsen. O lea va’a e lesitala i Samoa, ae ua tapunia e Samoa o latou ala va’a ona puipuiga o le Coronavirus.

 

Talu mai le aso Toonai na te’a nei, ua  taula mai pea lea va’a fagota e tusa o le 20 maila le mamao mai le tatou gataifale, e tatalia ai le fesoasoani.