VAIASO TAUALOA TAUTUA  FALE O SU’ESU’EGA FA’AFOMA’I [LABORATORY]

Ua auai le vasega o Fale o Suesuega Fa’afoma’i [Laboratory] i le tatou teritori i le fa’ataua o lo’o fa’atautaia i le Iunaite Setete ma ua fa’apea fo’i ona oo atu le tatou nei tautua ina ia fa’amaumau mai fo’i nisi o tiute ua fa’amautu i tatou Potu o Suesuega Fa’afoma’i ina ia fa’ailoa vave mai pe o maua nisi i le Coronavirus pe leai.

I le Potu o Suesuega Fa’afoma’i a le Matagaluega o le Soifua Maloloina ua i ai nei i le falema’i fa’aitumalo i Tafuna, ua fa’aauupegaina le aufaigaluega ina ia mafai ona latou fa’aaogaina masini o le talutalufou mo suega o le Coronavirus, lea ua i ai nei i lea potu o suesuega fa’afoma’i, e su’ea ai nisi ua maua i lea fa’ama’i pipisi.

“O le taimi nei, ua i ai le 2 masini fou lava mo nei su’ega, le ituaiga o le “Abbott ID NID-19” ma o masini ua fa’ato’a oo mai lava mo nei su’ega, ua mae’a fa’aaogaina fo’i mo suega e lua ua tuana’i, ma maua ane ai, e le o maua nei sui i le Coronavirus,” o se tala lea a le tamaita’i pule o lea Potu Suesuega Fa’afoma’i a le DOH, June Salesa Vaifanua-Leo.

Sa ia fa’ailoa e to’alima o lo’o galulue nei i le potu o suesuega fa’afoma’i lenei, ua agava’a mo le fa’aaogaina o nei masini.

E le ua na’o nei masini ua agava’a ai i latou nei, ae ua i ai fo’i ma le masini lapo’a atu e fa suega e mafai ona sailia ai mo le taimi e tasi, le ituaiga “GeneXpert DxPCR” lea o lo’o tatalia le to’ai taunuu mai o le isi masini fou.

Fa’ailoa e Vaifanua-Leo, “I le masini tele lea e faia ai suega e fa i le taimi e tasi, le GeneXpert DxPCR, ua le na’o le Coronavirus e mafai ai ona sailia ai ona suesuega, peita’i ua mafai ona faia ai suesuega fo’i o le TB poo le fatafata vaivai, ma ituaiga o gasegase e feavea’i i feusua’iga fa’aleituaiga.”

Ua fa’ailoa mai fo’i, o le mafuaga lea na mua’i i ai le tatou masini a’o le’i oo mai le Coronavirus i le tatou atunuu ma le lalolagi atoa. Peita’i, o lea lava fo’i ua toe agavaa i tatou i le fa’atupega a le CDC, PIHOA, US Human Health Services, WHO ma le FEMA ina ia toe aumaia ai le isi masini fou o lea lava ituaiga fa’atasi ai ma suega e fa’aaogaina ai e 1200.

“I le taimi nei, e 212 suega ua i ai mo masini o le ituaiga fou e lua, “Abbott ID NOW COVID-19” ua mafai ona fa’aaogaina mo suega o nisi ua masalomia ua a’afia i le Coronavirus i le tatou atunuu. Ua na’o le 29 suega ua faia mo i latou ua masalomia ua i ai auga o le covid-19 i le tatou atunuu, ma e lua suega ua fa’aaogaina ai nei masini Abbott, ma ua leai lava se suiga ua fa’amaonia mai ua maua i lea ma’i pipisi,” o se fa’apupulaga lea a Vaifanua-Leo.

O i latou e to’alima ua agava’a e fa’atautaia suega e aofia ai Vaifanua-Leo; Catherine Montalbo; Judy Su’a Ulufale; Paea’e Tufono ma Savali Atoa Fuimaono, peita’i o le tautua atoa o lo’o i lalo o le va’ava’aiga a le Fa’atonu o Potu o Suesuega Faafoma’i a le DoH Vasiti Uluiviti.

“I le tomai ua mae’a a’otauina ai i latou uma nei fa’atasi ai ma le latou naunau ina ia faia le galuega, ua i ai le soifua  saogalemu o le atunuu i o matou lima. Pau o lea ia manatua i matou i a outou tatalo, ina ia tumau le malosi ma ia maua pea le atamai e fa’aauau ma fa’aleleia atili ai le tautuaina o le atunuu. O le fa’amaoni fo’i ma le naunau ia tautuaina le atunuu i taimi uma, ua i o matou loto lava i taimi uma o lenei tautua,,” o se tala lea a Vaifanua-Leo.

O lenei vaiaso atoa, ua fa’atulaga lea mo potu suesue fa’afoma’i i Amerika ma ua aofia fa’atasi ai fo’i ma le potu suesue faafomai i le LBJ Medical Center.

Peita’i, mo nei lava masini uma mo suesuega o le Coronavirus ua na’o le potu o talavai a le DOH ua fa’atula’ia ai.

“Talu mai ia Aperila 14, 2020 ua mafai e Amerika Samoa ona fa’atautaia suesuega e mafai ai ona vave fa’aalia mai pe o maua se tasi i le Coronavirus pe leai, ona o le foa’i o nei masini Abbott ID NOW Covid -19, ma e na’o le 20 minute e fa’atalia ai se fa’aiuga,” o se tala lea a Vaifanua-Leo.

O isi uma suega mo gasegase o lo’o va’aia e foma’i i le LBJ Medical Center o lo’o fa’atautaia mai fo’i na suesuega i lea fo’i vaega o le tautua.

FA’AMANATU SISIGAFU’A LONA 120 AMERIKA SAMOA

I le atoaga o le 120 tausaga talu ona avea o Amerika Samoa ma teritori o le Iunaite Setete, ua fa’ailogaina ai i le sisia a’e o Tagavai a le Malo tele fa’apea ma le malo fa’ateritori o Amerika Samoa i le Malaeoletalu i Fagatogo i le taeao o le aso Faraile ua te’a.

O le toe sisigafu’a fo’i lenei mo le faigamalo a le afioga Kovana Lolo Moliga ma Lemanu Peleti Mauga, ma ua le manatu ai i laua i lea tulaga, peita’i ua taofia le to’atele mai le auai i lenei fa’atasiga tele, ina ia fa’amautu le Coronavirus, le fa’ama’i pipisi ua a’afia ai le lalolagi atoa i lenei vaitau. O le manulauti o lenei sisigafu’a “Samoa Muamua le Atua!”.

“E ui ina ua le fa’ataunuuina lenei aso e pei ona fuafua mai a’o le’i fa’atula’ia lenei fa’asa ona o le Coronavirus, ae le fa’amamaina ai le taua o le atoa o le 120 tausaga talu ona tausia lelei ma malupuipuia i tatou e le Malo tele o le Iunaite Setete. Ua tatau ai ona tatou sii le fa’afetai i le Atua, ma tatou fa’ataua atili pea le feagaiga na fa’amauina e tatou tua’a ma le Malo Tele ua tatou ola fiafia ai e oo mai i lenei tausaga,” o ose vaega lea o le saunoaga a le kovana.

“Ua tatou le o mai fa’atasi e pei ona faia mai i tausaga uma taitasi.O lenei tausaga ua mafaufauina ia faia fa’apenei ina ia mautinoa o fa’ailoa i le Atua lo tatou agaga fa’afetai i lenei tele o tausaga o tausia lelei mai i tatou e le Malo Tele e ala i ana fa’amanuiaga e tele ua fa’auia mai i lea feagaiga na tapena ma fa’amautu mai e o tatou tua’a ua mavae atu.”

“Ona o lenei fa’ama’i ua pepesi mai, ua toe fa’atulaga tonu mai ai lea fa’ailo e le Atua mo i tatou i lenei fa’amoemoe. Aua nei mama ia i tatou uma le taua o lenei fa’amoemoe lelei ao tatou aga atu mo isi tausaga o lumana’i i le va lelei ma le Malo Tele o lo’o latou puipuimalu ma tausia lelei i tatou e pei ona fa’atulaga mai ai e tatou tua’a ua mavae.”

O le sauniga sa faia le tatalo e Rev. Fa’aeteete Saifoloi, Taitaifono o le EFKAS, ona soso’o lea ma le faitauga aloaia o le Poloaiga Fa’alaua’itele a le Kovana mo lenei sisigafu’a na faitauina i le gagana Peretania e Lydia Faleafine Nomura sui o le Initeria, ma le gagana Samoa e Tapa’au Daniel Aga, Ofisa o le Kovana Sili.

Talu ai ona o poloaiga o fa’asa o le coroanvirus, e le’i auai le atunu’u ae maise sui o le kapineta. O le afioga i le Lutena Kovana o loo i ai pea i Hawaii ona o se fa’atafa gasegase o se tasi o le fanau. Ua fa’apea fo’i ona le auai le afioga le Fa’amasino Sili Michael Kruse, ona o lo’o fa’agasegasea.

O ta’ta’i o le malo sa aua na’o le Peresetene o le Senate Gaoteote Palaie, Fofoga Fetalai o le Maota o Sui Savali Talavou Ale ma le Failautusi o le Ofisa o Mataupu Tau Samoa, Mauga Tasi Asuega. Sa auai foi le faletua o le kovana, Cynthia Malala Moliga.

I le sauniga atoa sa fa’aaogaina ai e Kovana Lolo ma lona faletua la’ua tapuni fofoga fa’apea fo’i ma le aufaigaluega a le Ofisa o le Kovana ma isi sa auai.