FAUTUAINA LE AU AUFAIPISINISI E AUA LE FIU TALOSAGA MO NOGATUPE MAI LE SBA:

Ona o lea ua mae’a fa’amautu mai vaega tupe e lua mai le SBA e mafai ai ona talosaga atu ai le aufaipisinisi e fesoasoani ia i latou i le vaitau fita o lo’o ua i ai nei ona o fa’ama’i pipisi i le lalolagi, ua fautua mai ai le tatou Faipule i le Konekeresi, “Aua le fiu gofie i tatou, ae ia fa’aaoga le avanoa lelei lea, e talosaga atu ai ni nogatupe tetele e fa’atupeina ai pisinisi aua ua mautinoa le afaina o le latou taumaoaiga e fa’atautaia ai, i le vaitau lenei o le fa’ama’i pipisi o le Coronavirus.”

O lenei una’iga malosi mai a le Faipule o Amerika Samoa i Uosigitone na saunoa ma fa’alauiloa mai i ana tusitusiga fa’ailo mo le atunuu ina ua mae’a ona pasia e le senate a le malo tele ma ua iloilo fo’i e le Maota  e afua i le vaiaso ua te’a.

O le tinoitupe ua fa’ailoa mai o lo’o aiaia foi i le CARES Act ua fa’aopoopo ai le $321piliona i nogatupe e fa’atumau ai pisinisi ona e tatau ona totogia a latou tagata faigaluega.

O lo ua feso’ota’i lava le tatou Faipule ma le sui o le SBA, lea ua ia mautinoa ai, e vave ona mae’a lea fa’atupega pe afai e fa’atuai ona fa’aulu a tatou talosaga mai le tatou teritori, ma ua fa’ailoa mai ua i ai nisi o nai o tatou pisinisi iinei ua mae’a talia a latou nogatupe, ae tatau i le aufaipisinisi uma lava ona fa’aulu loa a latou talosaga.

O le isi pili lea fa’ato’a fa’aulu i le vaiaso ua tuana’i e $75piliona o lo’o fuafua lea mo falema’i ae $25piliona mo galuega suesue o le faama’i, peita’i ua mae’a taua’aoina le $35miliona mo le Malo o Amerika Samoa, ma isi alagatupe e maua mo le Matagaluega o le Soifua Maloloina, Matagaluega o A’oga ma Malaeva’alele.

Ua fa’ailoa mai, e le mafai ona talosaga le tatou Kamupani I’a a le Star Kist mai le SBA, peitai ua fa’ailoa mai, o le afaina o i ai le tele o falegaosi oloa tau a’ano o manu i le Iunaite Setete, e matele ina maua ai se avanoa o Kamupani I’a e talosaga ai, ma o lo ua va’ai toto’a i ai le Initeria i lea tulaga, ina ia fesoasoani mai i ai.

O lo ua faaulu fo’i le fanoga o le tamaitai Faipule o le tatou Malo i Uosigitone, ina ia ave’esea le i ai o nisi e va’ava’aia le aotelega o fagotaga i luga o va’a fagota o loo lesitala i le tatou teritori, o se mea lea e le o mafai ona faia mo isi uma va’a fagota o lesitala mai fafo.

Peita’i o le aso Tofi na te’a nei sa matua fa’afetaia ai e Aumua Amata le pasia mai o le $484piliona e vaega fa’aupufai e lua o le Konekeresi mo le PPP po’o le toe fa’atupega o totogi o tagata faigaluega a Kamupani Tumaoti laiti ma le Health Care Enhancement Act.

O le toe iloiloga lava lea o lea fa’atupega ma ua avatu fo’i lea pili pasia ina ia sainia e Peresetene Trump ia faatulafonoina, ona fa’amatuu atu fo’i lea e fa’amalosia ma fa’aaoga.

O lea tinoitupe $484piliona o le tu’ufa’atasia lea o le PPP e $321piliona o fesoasoani mo pisinisi laiti ma le $60miliona e fa’aagaaga lea mo talosaga a pisinisi fainogatupe laiti ma Credit Unions, ma e ao ina mautinoa ua mafai ona maua uma fesoasoani e pisinisi laiti i nofoaga e i ai i tatou i Amerika Samoa, teritori laiti o le Iunaite Setete.

Ua fa’ailoa mai e Aumua Amata, “Ua ou fiafia tele o le a maua fo’i se vaega tupe e mafai ona talosagaina e tatou pisinisi ma fesoasoani ai i le a’afiaga o tupe maua ona o le taofiga o i ai nei i galuega. O lo ua fa’atulaga lenei tinoitupe e le Konekeresi ina ia mafai ona tumau pea pisinisi laiti uma i le atunuu ona ua iloga le a’afia o i latou i le fa’asa o lo’o fa’amamaluina nei. Ua fa’ailoa atu fo’i i le SBA ina ia fesoasoani atu lava ma ia manatua a tatou pisinisi tumaoti i Amerika Samoa i le latou fa’asoa.”

O se tala fiafia lenei mo pisinisi uma o fa’atautaia i le atunuu, aua e oo lava i ta’avale laiti la’u pasese ma pasi la’u pasese, o i latou e masani ona maua le tamaoaiga ona o feoa’iga, ua fa’ailoa mai e i latou, ua matua afaina lava aua ua taofia le feoa’i ma le fa’atasitasi o aiga to’atele i vaitau nei o le fa’ama’i o le Coronavirus.

O nisi o pisinisi ua matua tapunia lava faitoto’a, e aofia ai le Faletifaga, ma nisi o fale’aiga sa matele ina tatala ae ua tapunia motu lava e aofia ai le Cocoa Bean i totonu o le Laufou