Pago Pago, AMERIKA SAMOA -

PALOTAGA A SAMOA - APERILA 09, 2021

I se lipoti mai Samoa ua fa’ailoa ai e le malo e fa’apea Aperila 09, 2021 lea ua fa’atulaga mo le palotaga i Samoa.

Ua mae’a fa’aulu e le Minisita ma le Komesina o Palotaga lea fa’aiuga i le Kapeneta o le Palemene a Samoa ma ua pasia lea matatupu.

Ona o le to’atele fo’i o e i Amerika Samoa e naunau ina ia latou palota i lea palotaga ona o suafa o aiga o lo’o latou umia, ua maua ai se avanoa e fa’alauiloa ai lea palotaga mo le latou silafia.

Ua fa’ailoa e le ali’i Minisita o Fa’amasinoga Fa’aolesa Katopau Ainuu, lea tulaga i le vasega o sui fa’asalalau ina ia fa’alauiloa aloaia i le atunuu ina ia nofo sauniuni i ai sui tauva uma o manatu e fia tauva mo tofiga faipule o latou itumalo fa’apea ma tofiga o le Palemia.

Fa’ailoa fo’i e Ainuu o lenei suiga ua na’o na palotaina lava lona fa’ataunu’uina ae ua mae’a tamau lea i tulafono tau faigapalota a le malo i lona aiaiga e usita’ia ai le “Electoral Act Amendment Bill 2020.”

O se tasi o maga fo’i o lea lava tulafono ua tuuina atu ai le malosiaga i le Komesina o Palotaga e na te te’ena ai se sui e fia tauva e fa’aulu atu lona fanoga, pe afai lava o iai se mea e tasi ua aiaia i tulafono tau palota ua ia solituina, ua le agava’a ai.

Ua i ai fo’i aiaiga i lea lava pili ua aveesea ai le tulaga o taulaga lafo mo lotu, i le avea ma se tasi o monotaga po’o tautua mo afio’aga. Ua aiaia ai foi ma fa’asalaga e tatau ona fa’ae’e i so’o se tasi o le a fa’amaonia ua ia fa’amauina fa’amaumauga sese i le pepa talosaga e fia avea ma sui tauva.

E to’afa vaega fa’aupufai o malo o lo’o ua i ai sui i totonu o le Palemene o Samoa: HRPP, Tautua Samoa Party; Samoa First Political Party ma le Samoa National Party. I le taimi nei o lo’o tutula’i pea le HRPP.

MU LE SCANLAN BUILDING IN FAGATOGO

O le aoauli o le aso Faraile talu ai, Aperila 24, 2020 na tupu ai se afi tele ma mu ai le Scanlan building i Fagatogo, e aofia ai ma le nisi o pisinisi ma fale nofo totogi i lea vaega o le taulaga.

I le vaitau o le 1970, o le nofoaga fo’i lea sa fa’atautaia mai ai le “Samu’s Ice Cream” mo le tele o tausaga, ma ua siitia atu nei i Utulei le Pamu Kesi e pei ona i ai nei. O le afi na vave ona sasao, ma sa i ai fo’i se gaoioiga na faia e le mamalu o le afio’aga na latou muai va’aia le sasao a’e o le tauasuasu ma o ane ai e tau tineia le afi. O le fogafale lona lua o lea fale sa muai sasao ai le afi.

E lua loli tinei mu na malaga sa’o atu mai Tafuna e fesoasoani i le vaega tinei afi i Fagatogo.

O le ali’i faipule o le afio’aga Vailuama Steve Leasiolagi sa i ai ma va’aia fo’i le tu malosi mai e fa’aaoga le fa’aga’au e fa’apasi mai ai le suavai, e tau tape ai le sasao tele o le afi. Ua to’atele fo’i ma le au tupulaga sa latou fa’apea ona fesoasoani, ma ua va’aia ai le agaga moni fa’asamoa o tagata o le afio’aga, e le tutu valea ae ua fesoasoani i so’o se ala e maua, ia mafai ona mate le sosolo a le afi.

Ua fa’ailoa fo’i se taofi ole ali’i faipule, “Atonu e sili ai pe a amata ona tau atina’e lana tupulaga talavou ia silafia tulafono ma le galuega tai tinei afi, a oo i mea fa’apenei ia vave ona iloa e i latou mea e ao ina faia, ae maise o se nofoaga ua eseese mea na matuaina ai le afi. E vave atu le oo mai o le fesoasoani a tagata o le afio’aga tulata i nofoaga ae mu nai lo le fesoasoani a le Ofisa o Tineiafi a le tatou atunuu.”

Peita’i ua i ai nei si aiga sa soso’o le latou nofoaga na alaala ai ma le fale ua mu nei, ma ua si’itia ese i latou ona ua fa’aleagaina le latou nofoaga i le suavai  mai le tau tineia o le afi.