Pago Pago, AMERIKA SAMOA -

TALIU MAI LT. KOVANA LEMANU - VA’ALELE A LE MILITERI

O le aso Faraile ua te’a na toe taliu mai ai i le atunu’u le afioga le Lutena Kovana Lemanu Peleti Mauga ina ua maea le lua masina o i ai i Hawaii ona o le fa’asa talu ai le Coronavirus.

Na malaga mai o ia i se va’alele a le militeri, ina ia fa’ao’o mai le Army Medical Service Corps lea e agavaa i latou i le faiga o suega o le ma’i pipisi o le Coronavirus, fa’atasi ma sui e to’alua mai le FEMA ma se tasi o sui mamalu mai le Centers for Disease Control & Prevention (CDC).

O le sui lea o le CDCP ua fa’atulaga e galulue ma le Matagaluega o le Soifua Maloloina ina ia mataituina mea uma e mana’omia ai se leo ma fa’aiuga a le CDC, ma o le tamaita’i lea o se alo lava o Amerika Samoa, Leiema Kalili Hunt o Auto.

Ua fa’ailoa mai fo’i e Iulogolgo, o sui nei o le Medical Corp o le a galulue ma le Matagaluega o le Soifua Maloloina ma le LBJ ae maise lava i Potu o Suesuega Fa’afoma’i o gasegase.

O mea na uta mai i lea va’a a le militeri ua aofia ai le tele o isi sapalai e puipuia ai le soifua i latou e ta’imua mai i galuega fa’aola, ae maise fo’i o le puipuiga o le aufaigaluega o lo’o tagofia ma faia suega o lea fa’ama’i mo le mamalu lautele.

I le taimi nei ua taofia pea le afioga le Lutena Kovana se’ia mae’a le 14 aso o nofo va’ava’aia ai.

97 SUEGA COVID-19  MAE’A FAIA - LEAI SE TASI MAUA CORONAVIRUS

O le aofaiga o suega ua mae’a faia ma sailia ai po’o maua se tasi i Amerika Samoa i le Coronavirus ua oo nei i le 97, ma e leai se isi ua maua i lenei fa’ama’i.

I le aso Sa, 03 Me, 2020, na fa’ailoa manino atu ai e Kovana Lolo Moliga i le vasega o foma’i uma lava o loo avea ma totino o le Komiti Fa’afoe o le Coronavirus ma le Komiti Galulue fo’i, ina ia tuu fa’atasia o latou tomai ma ia fa’ailoa mai i le fonotaga muamua o lenei vaiaso fou, po’o le a le ituaiga o tagata o le atunuu e tatau ona muamua lava ona faia suega o le Coronavirus, ina ia mautinoa a’ia’i, ua saogalemu i tatou i le Coronavirus.

I le taimi nei ua matua iloga ona fesoasoani mai le USHealth Resources & Services Administrations ina ia mautinoa lava o lo’o malupuipuia le atunuu atoa mai le ulufale mai i ai o le coronvirus. O le USRSA o se vaega lea o le USDHHS.

Ua fa’ailoa manino mai fo’i e le tatou Sui i le Konekeresi Aumua Amata, o le $406,084. mai le CARES Act e fa’aalu lea i le Matagaluega o le Soifua Maloloina mo suega e faia o le Coronavirus.

“O lo’o ua fa’aauau pea lava ona fesoasoani mai le CARES Act i ala e mafai ai ona puipuia le atunu’u mai le ofi mai i ai o le Coronavirus ma a’afia ai o tatou tagata, ma se fa’amanuiaga lava lea tulaga mo i tatou i Amerika Samoa, aua e le’i oo atu lava ia i tatou lea fa’ama’i pipisi. Peita’i o lo ua tatou nofo sauniuni lelei i se taimi e oo mai ai lea fa’ama’i pipisi i o tatou laufanua,” o se tala fiafia lea a Aumua Amata le tatou sui i le Konekeresi.

“Fa’afetai fo’i ia Kenn Kuaea mo le latou galuega fesootai mai ua ala ai lea foi fesoasoani lelei mo le atunuu, fa’apea fo’i le afioga le Kovana Sili Lolo Moliga ma le latou fo’i pito la’au ma le Komiti Fa’afoe ma le Komiti Galulue, ua fa’aauau ai lava le tapenaga lelei ina ne’i lutia i tatou, ae ua tatou lava sauni atu i ai,” o se toe upu lea mai le tatou faipule i le Konekeresi.