Ads by Google Ads by Google

Tala I Vaifanua

Pago Pago, AMERIKA SAMOA - 

 

MAUA AMERIKA SAMOA HUMANITIES $200,000. MAI CARES ACT

 

Ua agava’a le Amerika Samoa Humanities Council i le $200,000 mai le CARES Act lea ua toina mai i le NEH ona o le a’afiaga o le Coronavirus i le atunuu, ma ua mafai fo’i la ona talosagaina atu ai fa’alapotopotoga eseese i totonu o le atunuu mo lea vaega tupe e ala mai i le Amerika Samoa Humanities Council.

 

O fa’alapotopotoga e mafai ona talosaga atu o i latou lea e fa’atuina mo le manuia lautele, ae le mafai ona maua ai ni tupe tau polofiti pe o tupe faasili i a latou tautua lautele, ma ua a’afia a latou galuega fa’atino, ona o le fa’ama’i pipisi o le COVID-19.

 

Ua fa’aigoaina lea vaega tupe o le HEART poo le Humanities Emergency Assistance Relief Team, ma ua fa’aauala mai fo’i e le National Endowment of the Arts.

 

O le tamaitai fa’atonu o le Humanities Taua Niualama Taifane sa ia fa’alauiloa mai lea avanoa lelei mo tatou fa’alapotopotoga uma i Amerika Samoa ina ia talosaga atu ai mo se seleni e fesoasoani fo’i ia i latou ona ua a’afia a latou galuega faatino i le fa’asa mo le coronavirus i lenei vaitau.

 

Ua le mafai ona talosaga mai i ai tagata taito’atasi i lenei alamanuia, peita’i ua fa’avasega mo autalavou ma isi ituaiga fa’alapotopotoga e masani ona faia a latou poloketi fa’atino e a’oa’oina ai  Tu ma Aga Fa’asamoa o so’o se ituaiga.

O isi fa’alapotopotoga ua agavaa i lenei fa’atupega ua aofia ai le Laufanua Faasao ma Faletusi ma Fale Mata’aga.

 

Ona o le tele fo’i o tatou autalavou a Ekalesia ma Ausiva fo’i e mafai ona latou talosagaina fesoasoani tau tupe mai lea avanoa ua fa’ailoa mai e le Humanities. O le latou Uepesite e mafai ona e faitau ma malamalama atili i lea fa’atupega o le ashcouncil.org ma nisi fo’i fa’afesili o fiailoa atili.

 

FA’ALIMA SOSO’O FA’ASA CORONAVIRUS AMERIKA SAMOA - SE’IA OO IULAI

 

O le aso Sa na te’a nei sa fa’ato’a toe fa’alauiloa aloa’ia ai e Kovana Lolo Moliga le toe soso’oga fa’alima ai lenei o le fa’asa ua fa’amamaluina i le atunuu ona o le fa’ama’i o le Coronavirus. O lenei soso’oga ua amata fa’amamalu ia Iuni 01, 2020 se’ia oo ia Iulai 01, 2020.

 

“O lo ua tatou fa’amamaluina pea le tatou Fa’asa Lanu Moana, e le’i i ai lava se tasi i totonu o le atunuu ua fa’amaonia ua maua i le Coronavirus. O lona uiga ua toe alu lava i tatou i le fa’asa tuai, ae ua i ai suiga teisi ua tatalaina fo’i e fa’amasani ma tautua ai le mamalu lautele,” ose tautalaga lea a Lolo na saunoa i ai i le fonotaga a le komiti fa’afoe o le Coronavirus i le sa

 

O nai suiga ua saunoa fa’apitoa i ai le Kovana ua aofia ai le tatala umi atu o pisinisi ma tautua eseese ua ofoina mo le mamalu lautele o le atunuu. “Ua tatala nei pisinisi mai le 5:00 i le taeao se’ia pa’ia le 9:00i le po. Ua fa’apea fo’i ona tatala feoaiga a Pasi La’u Pasese ma taavale laiti la’u pasese mai le 5:00 i le vaveao se’ia pa’ia le 9:00 i le po.”

 

“A’o tatalaina teisi ia umi taimi e tautua ai le mamalu lautele o le atunuu, ia manatua e i ai lava tulafono tamau o le fa’asa e ao ina usita’ia e pisinisi  ta’itasi ma taavale lau pasese ta’itasi. Ua taumafai tagata uma e fa’aaogaina punifofoga, ia nonofo vavamamao, ia utagia le fa’amama lelei o nofoaga uma.”

 

E ese mai lea ua ia saunoa e tusa o le to’atele o tagata e o mai fa’atasi ina ia faia tapuaiga i le Atua poo sauniga lotu. “O le ta’ito’a sefulu sa mua’i fa’ailoa atu e ao ina fa’apotopoto ma ia nonofo vavamamao ma ia le feso’ota’i so’o, ae maise ia tausia le tulaga mama o nofoaga ma le fa’aaogaina o punifofoga, ua fa’ataga nei le aotelega e 150 tagata i le taimi e tasi mo sauniga, ae ia usita’ia lava le nonofo valavala, ia tausia foi ma le tulaga mama o malumalu ma ia fa’aaoga punifofoga.”

 

Peita’i o le mea o lo’o tulitulimatagau e tagata uma lava ona ua fai si umi o taofia nei, o tulaga i malaga a vaalele i le va o Hawaii ma Samoa ma iinei. O lo’o taofia lava pea feoa’iga nei a vaalele, se’ia toe oo fo’i ia Iulai 01, 2020.

 

“Ua taofia lava fo’i femalaga’iga i le va o Samoa na lua lea e faia e le Samoa Airways ma le Talofa Air. Peita’i e tauau e i ai se suiga ae muamua lava taga’i toto’a i lea tautua ae ao ina siakia manino lava poo a mai le tulaga mama pea o Samoa i le fa’ama’i covid -19.”

 

O le a tapunia pea a’oga, ma ua tapunia aloaia nei aoga i le atunuu i lenei vaiaso, ma o le a leai lava ni a’oga mo le tuuaga lenei o le taumafanafana, se’ia toe siakia fo’i le fa’asa lenei ia Iulai 01, 2020.

 

TOGIPAU E LE HUMBURG SUD LE JULIANA - AUMAIA LANA UTA 

 

Ua fa’ailoa mai se tala fiafia e le Humburg Sud i Amwerika Samoa nei, ona ua mafai nei ona latou togipaua le va’a oloa o le “JULIANA” na te fa’aauau ona aumaia le uta sa tatau ona sau ma le latou va’a oloa o le “Fesco Askold” lea ia toe fo’i ane i Honolulu ina ia toe fa’aleleia.

 

Ua fa’ailoa mai foi ua i ai nei le Fesco Askold i Honolulu e fa’aleleia mea ua fa’aleagaina o lona afi a’o  taumafai e malaga mai i lana malaga mai i atumotu o le Pasefika i Saute ma lana uta.

 

E tuua la e le Juliana Long Beach ia Me 31, oo mao lea o Oakland tuua iina ia Iuni 02, 2020 ma ua fa’atulaga e to’ai taunuu mai i Pago Pago nei ia Iuni 17 ma fa’asolo atu ai i Apia Samoa ma Papeete, Tahiti.

 

I ana malaga fa’atulaga mo le masina o Iulai 2020, ua fa’ailoa mai e toe tu’ua ai e le Juliana le West Coast ia Iulai 2, 2020.

 

FA’AALIGA FA’APITOA MAI LE “FALETUPE O LE ATUNU’U”

 

I se pepa o fa’amatalaga i le vaiaso ua te’a sa fa’ailoa ai e le faapea o le “Faletupe ale Atunuu”, (TBAS), ole lua vaiaso talu ai, sa mafai ai mo le ulua’I taimi ele TBAS, ona faatupeina (funded) le ulua’I Nonogatupe, e tauala atu lea ile polokalama ale SBA Payroll Protection Program. 

 

“Ua tusa nei male 50 Talosaga ua faagasolo ona galueaina ile taimi nei, 30 Talosaga ua Taliaina (approved) ma e 20 Talosaga ole a faatupeina mo lenei vaiaso” e tusa ai male ripoti a Annette Ameperosa, o le Tamaitai Pule ile Matagaluega o Nonogatupe ale TBAS. O talosaga oloo tauaaoina mai faatasi ma pepa uma oloo moomia mo talosaga, e taliaina lea ele SBA I nai minute pe a maea faagaioiina ma faafesoota’I ai lava I latou e ana talosaga ile aso ua faatulagaina e tapunia pe faatupeina ai le talosaga. 

 

Saunoa Ameperosa, “Oloo avanoa le au faigaluega, mo pisinisi ma I latou oloo faatautaia pisinisi, e latou te feiloai ma fesoasoani iai latou mo le faagasoloina o talosaga ile vave e mafai ai” Ole polokalama lenei ale SBA PPP, oloo tatalaina pea ile taimi nei ma e faatoa faamutaina ia Iuni 30, 2020 pe afai e matala pea alagatupe faatulagaina o lenei polokalama. 

 

Faafesoota’I le matagaluega o Nonogatupe: Ruth Glodowski at 633-8143 ext. 157 poo le: email rglodowski@mytbas.com poo Michelle Sasala ile ext. 191 poo le: email msasala@mytbas.com

 

E mafai ona maua atu Pepa o Talosaga ile lala I Utulei poo fesootaiga I upega tafailagi ile: www.sba.gov/paycheckprotection poo le: www.treasury.gov/cares 

 

Oloo ua saunia lava le faletupe ale TBAS, e ofoina atu auaunaga uma faa-faletupe e ala I auaunaga I tusitupe, auaunaga faa-faletupe I upega tafailagi, nonogatupe mo tagata lautele, nonogatupe mo fanua (real estate/mortgages), nonogatupe mo pisinisi aemaise nonogatupe ile polokalama ale SBA PPP, Oloo ua fuafuaina o Iulai 2020 ole a tatalaina ai le auaunaga e faaaogaina ai le MasterCard, debit/ATM card. 

 

Faamolemole asiasi ile tuatusi oloo ile upega tafailagi : www.mytbas.com pe fefaasootai mai foi ile numera (684) 633-8143 mo nisi faamatalaga. The People’s Bank – Faletupe o le Atunu’u.