Pago Pago, AMERIKA SAMOA - 

FA’AU’U TO’A 19 FA’AIUASO IAKINA ACADEMY

Na fa’ataunuuina le fa’au’uga na fa’atulaga o le A’oga Maualuga a Iakina Academy i le latou Laumua lava i le aoauli o le aso Sa na te’a nei, 14 o Iuni.

O se faiga fou fo’i na fa’atino ai lea fa’amoemoe aua sa auina atu i totonu le fanau fa’au’uina i a latou ta’avale , ma ua na’o le vasega fa’ai’uaso fo’i ma sui iloga na vala’aulia mo le fa’atautaiga o le fa’au’uga na auai mo le fa’amoemoe.

O aiga uma o i latou na fa’au’u, sa papa a’ao lelei mai lava i a latou ta’avale ma maimoa mai ai i le sauniga na fa’atautaia. O nisi sa fa’aaogaina so’o se vaipanoa lava o fafo o le malumalu tele i le lotoa ma isi fo’i nofoaga i totonu o le laumua, e maimoa ai le fa’auuga. 

Na fa’atutaia le sauniga e le susuga le Faife’au, Pastor Uili Solofa. O le mau na tuuina e le failauga mo le vasega fa’au’u - Ioelu 2: 28: “Mulimuli ane, e iu ina ou liligi ifo ai lou Agaga i luga i tagata uma, ona perofeta ai lea o outou atali’i ma o outou afafine, e fai miti fo’i o outou toeaina, e iloa fa’aaliga e o outou taulele’a.”

E fa vaega ua fa’avasega ai lana fa’amalosi: Moemitiga, Itulagi e aga’i i ai, Mautinoa lelei lau savali ma le Alu Loa. O le Moemitiga ua fa’ailoa mai, e iloa fo’i fa’ailoga e outou taulele’a. A leai se moemitiga o toeaiina e fano le nuu, o latou fa’ailoga i nei moemitiga e iloa ai fa’aaliga e outou taulele’a ma tamaitai talavou. O i’ina e mapuna mai ai manuia o latou lumana’i. Afai ua e maua le Agaga o le Atua e mafai ona e iloa patino lelei mea ua ia tuuina i lou loto e te tausailia i lou lumana’i, e te aoga ai i ou matua, i lou aiga, lou nuu ma le ekalesia ae maise o le tatou Malo ma le atunuu atoa.

O fea le itulagi e ao ina e alu aga’i i ai, ia mafai ai ona a’otauina oe mo lau moemitiga ia tulitulimatagau? O le ala e te savalia e te vave oo ai i le fa’atinoga o lau miti, e ao ina e tu’ua aiga ma aga’i atu i fafo, pe fa’aauau iinei ae ia e mautinoa ma faia loa.

O lou mautinoa lelei o se mea, e fa’amoemoe atoatoa lea i le musumusuga lilo a le Agaga o le Atua i lou tagata, e te iloa lelei ai le mea ua e naunau e te fia sailia ma a’otauina ai oe, ia fa’aleleia atili ai ou tomai e te tautuaina ai le to’atele o le a mana’omia lau fesoasoani. A mautinoa loa e lou mafaufau le mea ua e naunau i ai, ua toe tasi lava le mea e ao ina e faia, tuutoina loa lou loto atoa ia e faia.

O le mea mulimuli o le alu loa ma le to’a lelei o lau fa’aiuga ua mae’a faia o lea mea ua mae’a tuuina fo’i e le Atua i lou loto, o lena le ala e te alu ai ma le manuia, ma e tausaili ia maua.

Ina ua maea lea ma le tatalo na si’itia e Pr Uili Solofa, ona tuuina lea o le avanoa i le tamaita’i peresetene, Cailyn L. Ponausuia, o le vasega fa’aiuaso mo lana saunoaga fa’apitoa ma foa’ia ai le meaalofa na tapena e le vasega fa’aiuaso.

O lea meaalofa o le atuga nofoa e alaala ai le fanau a’oga ma maimoaina ta’aloga e faia i le latou malae ta’alo, pe fa’aaoga lava i so’o se taimi e alaala ai ma faitau tusi. 

Na talia lea meaalofa e le tamaitai pule aoga, Emma Solaita - Malele, ma sa ia fa’ailo ai, le faigata tele o lenei tausaga a’oga ma le lutia so’o o a’oa’oga a le fanau i le tele o fa’asa o le COVID-19. Ma ua taumafai ai fo’i nisi auala e le vasega o faia’oga ma le a’oga lava i Iakina, e fa’aoo atu pea a’oga a le fanau, e ui ina o lo ua nonofo lava i aiga ma faia ai a’oga.

“Peita’i e ui i le faigata, ae ua a’e malo faiva o le fanau lenei e to’a 19 i latou, o lea e ao ai ina tatou fa’afetaia i latou i le sogasoga ma le taumafai, ae maise fo’i o le vasega i faia’oga, i lo latou naunau ia a’oa’oina lelei fanau i le tatou nei Laumua,” o se vaega lea o lana saunoaga.

Ina ua mea’a ona taliaina e le afioga le fa’atonu sili o aoga a le Malo, Dr Ruth Matagi Tofiga le vasega fa’aiuaso ona latou taua’aoina atu lea o tusi pasi ma fa’ailoga fa’apitoa.

Togisilia o le vasega faaiuaso e to’alua, ma ua mauaina le GPA e 3.92: Cailyn L. Ponausuia ma Selena M. Sionesini ae o le tulaga lua Senerita L. Fua. O latou nei e to’atolu o totino o le National Honor Society ma ua fa’auu uma fo’i ma togi maualuluga.

Fa’ailoga o le Amio Lelei ua maua e La’auoleola La’aupese ma le faailoga i le tamaititi aoga ua sili ona lelei ma aga’i i luma lana taumafaiga na maua e Victoria S. Tivao.

O nei fa’ailoga ua fa’afetaia ai e Iakina Academy le fesoasoani a aiga nei: O le fa’ailoga o le togisilia ma meaalofa na taua’aoina i tamaitai e to’alua ua togisilia na saunia e Toleafoe Semu ma le faletua o Ta Siologa Family le tasi a’o le isi na saunia lea e Emma ma Tai’i Misi Malele. O le fa’ailoga mo le tulaga lua i le vasega fa’au’u na saunia lea e le Aiga o Luagalusola Ropati Ropeti ma el Aiga; Fa’ailoga o le Amio Lelei i le vasega fa’au’u atoa na saunia lea e le laumua lava i Iakina [HASA] Fa’ailoga mo le sui lelei i aoaoga Tusi Paia na saunia lea e le Aiga Tipaalelupe Tapua’i; ae o le fa’ailoga o le Most Improved na saunia lea e le ali’i Faipule o le Itumalo o le Tuaulauta Meleisea Samuelu Meleisea. O le fa’ailoga mo le togisilia i le suega SAT na tapena lea e Alo o FCPen & Solaita Family o Nuuuli.

O isi uma sui o le National Honor Society i le vasega fa’auu ua aofia ai: Meleana Mounga; Carina Elisara; Janzen S. Muasau ma Victoria S. Tivao.

O le vasega atoa i lona fa’asologa na taua’aoina ai tusi pasi ma fa’ailoga: Angela Misiluti; Cailyn L. Ponausuia; Carina Elisara; Chrisoebrown M. Leota; Denise F. Tui; Jalena Filiva’a; Janzen S. Muasau; Jasmen Jr. Aiolupotea; Jennifer S. Hume; La’auoleola La’aupese; Latrell J.T. Ierome; Meleana Mounga; Mosese V. Delai; Sakaria Meafou; Selena M. Sionesini; Senerita L. Fua; Tiane E. Corpuz-Tuilaepa; Victoria S. Tivao ma Vika Takitaki.

FA’ASOLOGA O FA’AU’UGA A’OGA MAUALULUGA A LE MALO

Ua fa’ailoa e le Matagaluega o A’oga a le malo le fa’asologa o fa’auuga a’oga maualuluga a le malo i lenei vaiaso. Ua mae’a fa’au’uga o le Laumua i Segaula Manu’a i le aso Faraile ua te’a, ae ua fa’apea fo’i ona mae’a le fa’au’uga o le Samoana, Laumua o le Malie i Utulei i le aso ananafi, ae ua oo mai nei i le Laumua i le A’oga Matata Eseese i Nuuuli VocTech High i le aso.

O le aso Lulu ua fa’atulaga mo Leone High, soso’o ai Tafuna High i le aso Tofi, ae fa’aiu ia Fagaitua High i le aso Faraile. 

Ua ese lenei tausaga i le fa’atautaiga o fa’au’uga ona o aiaiga tamau o le fa’asa mo le fa’ama’i o le Coronavirus.

Ua fa’asoloina atu le fa’au’uga atoa i le televise aua ua mae’a pu’eina uma ata o matua ma fanau fa’au’u e le televise a le tatou Malo, e tuu fa’atasia ai o latou fa’au’uga lea o le a maimoaina i alaata feso’ota’i fa’ainiteneti: livestream.com/KVZKTV/events/8163162 or livestream.com/kvzktv

Ua fa’afetaia tele e le tamaita’i fa’atonu o a’oga a le tatou Malo, Dr Ruth Matagi-Tofiga le taumafaiga ma le galuega mae’ae’a a le vasega o faia’oga ma pulega o a’oga maualuluga taitasi ina ia mafai ona fa’atautaia fa’au’uga o le fanau fa’aiuaso o lenei tausaga, e ui ina lutia le atunuu ma a’oga a le fanau ona o omiga o le Coronavirus i le lalolagi atoa.

Fa’afetai fo’i i matua ona o le alolofa i fanau fa’auu o lenei tausaga, ua latou manatu i mea uma lava ua tapena ma fa’avasega atu e faia’oga ma pulega o a’oga ta’itasi, ona o le alolofa ma le naunau i le fa’amoemoe o fanau nei ae a le lumana’i.