Ads by Google Ads by Google

Tala I Vaifanua


[ata: foa'i]

 

Pago Pago, AMERIKA SAMOA - 

 

MALAGA VA’ALELE MAI SAMOA - 65 I LATOU TAOFIA MO SUESUEGA

 

E talu mai malaga a va’alele mai Samoa e toe aumaia ai nisi tagatanu’u o Ameirka Samoa sa taofia i Samoa ona o aiaiga tamau a le Coronavirus, ua atoa nei le to’a 65 o i latou ua taofia mo suesuega o le COVID-19 mo le 14 aso i le DYWA i Pago Pago. 

 

Peita’i mai lea to’a 65, e to’atasi lava sa tatau ona nofo fo’i i lea nofoaga, o se tasi e tatau ona tausia fa’apitoa, ua fa’amatu’u atu e nofo va’ava’aia mai lona aiga, ona o tulaga ogaoga fo’i i le tausiga o lona soifua maloloina lelei.

 

O le fa’atuai ona malaga mai o isi malaga faatulaga e aumaia ai pelega o i Samoa ona o taofiga o le Covid-19, ona o latou kilia mai le OK Board o le tatou Ofisa o le Loia Sili.

 

I le matau atu, sa mua’i faia siakiga ma suesuega o le Coronavirus i totonu o fale’ie i le malaeva’alele i malaga muamua mai a va’alele mai Samoa, ae o lea la ua vave tapena lea potu e faia lelei ai suesuega uma ma siakiga o pasese.

 

O le aso Lulu fo’i ua mae’a fa’atulaga ai le Sadies by The Sea ina ia avea ma nofoaga fa’apitoa e nofo va’ava’aia ai le toatele mai malaga nei e lua a va’alele mai Samoa. O le aotelega ua fa’amautu mai e to’a 80 i latou o malaga mai i nei malaga ta’ilua a va’alele e lua.

 

O nisi fo’i o lo’o alaala nei i le DYWA, o le a toe sifi atu i le Sadies aua o lea ua mae’a tapena lelei ia tusa ma aiaiga o le fa’asa o le Coronavirus. O i latou nei o tagata matutua e ao ina tausia lelei i latou, ona o auga o latou gasegase ma ua alagatatau i nofoaga nei.

 

Ina ua fesiligia fo’i le fa’atonu Motusa Tuileama ini fa’afitauli na alia’i i ulua’i malaga ulufale mai i totonu o le atunuu mai le amataga, ae ua faailoa mai e ia, “O lo’o i ai le suesuega auiliili a le Ofisa o le Loia sili ia i latou uma lava o lo’o ua fia ulufale mai, ma ua matua mana’omia lava ona ulufale mai lava na’o tatou tagatanuu ma i latou ua fa’ataga fa’aletulafono e ulufale mai ma nonofo mau i inei. Ua na’o i latou lava tagatanuu o Ameerika Samoa ma i latou ua fa’ataga fa’aletulafono e nonofo ma faigaluega i le tatou atunuu ua malaga mai.”

 

“O i latou nei ua lisia e le mafai ona o mai i vaalele nei, o e le o ni tagatanuu moni ma ua leai fo’i ni o latou faila ua fa’amauina i le falema’i tele i Faga’alu mo a latou talavai i le taimi nei.”

 

Ina ia silafia e le mamalu lautele, e matua le mafai lava ona fa’afeiloa’ia e le pa’ia o aiga le soo se sui e malaga mai i malaga nei mai Samoa, e oo lava fo’i i latou uta na aumaia, e le mafai lava ona fa’aoo mai i aiga, ona o le puipuiga lautele lava o i tatou uma mai lenei fa’ama’i pipisi i a’afia ai se tasi.

 

MALIU TAMA SAMOA - AVE TA’AVALE I TA’AVALE A LE FED EX I HAWAII

 

I se lipoti mai Hawai’i o lo’o fa’ailoa ai o se tama Samoa e 46 tausga lona soifua, ua maliu i le ala ina ua faaletonu lana ta’avale tufa meli a le Fed Ex sa ia fa’afoea i alatele o Hawaii e latalata i le Freeway i Kapolei.

 

Ua fa’ailoa  le taavale na ia faafoea sa fa’afuase’i ona so’aina le tasi taavale i luga o le Highway 1, ma fiki ese mai Ioane mai lana ta’avale ma pa’u tonu i luga o le laini o isi ta’avale o loo femasaua’i ma ua solia ai o ia i lena laini o ta’avale.

 

I lana fanau ma le tina o le aiga, ua latou fa’amatalaina le latou tama o se tasi e galue malosi i le tausiga o i latou uma. “Ole taimi lava e oo mai ai le matou tama i le fale, e le fa’apea mai ua tigaina i se mea pe a, e sau loa fesoasoani loa i le matou tina aua ua umi le taimi o feagai ma i matou ma matou fanau.”

 

O le tala a le tina o le aiga, Cindy Tafaovale, “O le alofa faavalea o lenei tama i lana fanau, ua toe fa’aopoopo mai fo’i ma le tausiga o le fanau a le ma fanau e to’afa i le matou aiga, ae le fa’afiti ai e faigaluega i aso uma, mo le tausiga o i matou uma lava.”

 

O lenei aiga e alaala i latou i Waianae, ma o le tama lenei e fa’amoemoe i ai le tausiga atoa o si latou aiga e ala i lana galuega lea i le FED Ex. “E le o se tama e fa’alogoina e i matou sana fa’asea ona ua vaivai pe le fiafia ia i matou mai le mamafa o lana galuega i aso ta’itasi. E oo mai lava i le fale i le fiafia e ta’a’alo ma matou fanau, ma fa’amama avega ia mom i le tausiga o le fanau,” o se tala lea a Imiah, lona afafine e 20 tausaga le matua.

 

E mautinoa mai lipoti a alii leoleo e le o fa’asua’ava o ia ma fa’afoe le ta’avale, ma e le’i saosaoa tele fo’i le taavale e sili atu i lo le saoasoaa fa’atulagaina i lea ituala o le setete o Hawaii.