Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

FUAFUA MALAGA TOGIPAU MO FANAU AOGA SIKOLASIPI MALAGA I AMERIKA

 

I le fonotaga a le Komiti Fa’afoe o le Coronavirus i le aso Sa ua te’a, sa fa’ailoa ai e Kovana Lolo Moliga fuafuaga o lo’o tau tuufa’atasia nei i se malaga togipau a le Hawaiian Airlines avatu ai a tatou fana a’oga e tatou aoaoga i Iunivesite ma Kolisi i fafo ae maise i latou e ulufale i le militari. 

 

O le ali’i Sui Fa’atonu o le Matagaluega o le Saogalemu Fa’alotoifale Alfonso Pete Galea’i, lea sa ia fa’aalia mai e tusa ma le 120 i latou, e aofia ai fanau sikolasipi o lo’o fia malaga i Hawaii. 

 

Sa fa’ailoa e Lolo fuafuaga o lo’o i ai nei mo se malaga togipau a le Hawaiian Airlines. Ae o se tulaga o lo’o mamafa i le kovana o le saogalemu o alo o le atunu’u i fafo lea o lo’o pepesi ai le coronavirus. 

 

 Sa tima’ia le kovana i le Fa’atonu o A’oga, Dr. Ruth Matagi-Tofiga ina ia toe fa’amanatu i matua lenei mea e ono feagai ma i latou pe afai ae pesia latou fanau i fafo i nei fa’ama’i.

 

I se tali a le fa’atonusili, sa ia fa’ailoa le ma’ea on talanoa i matua ma ua ma’ea foi ona fa’ailoa i matua aoga i Kalefonia ua fa’amoemoe e fa’aaoga le internet mo le tausaga aoga fou. 

 

Afai o le tulaga lea, atonu e mafai lava e fanau ona fa’aaoga le internet mai Amerika Samoa. 

 

VAEGA #12 SIAKI LAFOGA UA TUFATUFAINA ATU- EOB DISBURSING

 

O le Aso Lua na te’a nei, sa tufatufaina ai le Vaega #12 o siaki lafoga a le mamalu na faila latou lafoga totogi i Amerika Samoa mai ia Aperila 6 se’ia pa’ia Iuni 02, 2020.  Ua fa’ailoa mai, o i latou uma o i ai latou tuatusi o pusa meli e maua mai latou siaki i a latou pusa meli mai ia Iuni 30, 2020, le aso ananafi lea.

 

I latou e leai ni a latou pusa meli e maua mai a latou siaki i le Ofisa o le Disbursing i Utulei. O le aofai o le tinotitupre ua fa’aaluina i lenei aofaiga o lafoga totogi e $1,072,195 mo fanau ae 939,737 mo lafoga a tagata taito’atasi.

 

O le aotelega o lafoga uma ua totogia pe a tuufa’atasi atu i ai ma lenei vaega o siaki lafoga #12 ua oo ai le aofaiga i le $14,045,235. O le aotelega o ACTC ua i ai i le $8.5 miliona ae o lafoga ta’ito’atasi e $5.2 miliona.

 

O lo ua fa’ailoa atu i le mamalu o le atunuu  pe afai o le a oo ane e piki a latou siaki i laina uumi e pei ona matauina, ia alofagia tautuana le fa’avavamamao mai le isi i le tasi ma ia faia a tatou pupuni fofoga.

 

Pe afai e le o maua lau siaki ae o le taimi lea sa faila ai lau lafoga, e tatau ona e toe fa’afeso’ota’i  le ofisa o lafoga ma fa’afesiligia le mafuaga ua le maua ai lau siaki. Pe afai e te oo ane mo le taua’aoina atu o lau lafoga e ao ina e taulimaina sou pepa fa’amaonia, o le kopi o lau lafoga na faila ma le numera saogalemu.

 

NAO LE 13,000 PAUNA O I’A E FA’ATAGA ONA FA’AGOTAINA

 

O le isi lea mataupu o lo ua tautalagia nei i le fonotaga a le WPRFMC lea sa faia i feso’ota’iga fa’ainiteneti ina ia fa’ataunuu ai latou fonotaga sa tatau ona fa’atasitasi ai i latou, ae ua fa’aletonu ona o taofiga o femalaga’iga i fa’asa o le Coronavirus, o le tulaga lea tau le fa’aitiitia lava o le aotelega o le i’a o lo’o fa’ataga ona fa’agotaina mo le fofoga taumafa o le atunuu ua i ai nei.

 

Ua toe taumafai nei ona fafau se isi aiaiga fou ina ia le oo lea aotelega o le i’a o matai’ai a Amerika Samoa, i le tulaga e fa’aitiitia atili ai, peita’i e fa’aititia ai le so’ona fagotaina o le sone fa’ataga mo tatou faifaiva.

 

O le lipoti fa’amaumau mai le vaega a le National Marine Fisheris Services ua fa’ailoa mai ai le aotelega o le aofai o le i’a lea e fagotaina mo le fofoga taumafai o Amerika Samoa ua so’ona fagotaina ma ua tatau ai ona toe va’aia toto’a e taofia lea tulaga, o le so’ona fagota o le sone lea.

 

O le vasega o Faifaiva ma le matagaluega o le Gataifale ma le Vaomatua a le tatou Malo ua latou talitonu o le tele o nei fa’amaumauga ma le fa’amatalaga ua fa’ailoa mai ua fa’aitiitia le tele o le i’a o lo’o avea ma mataiai a le atunuu i o tatou ogasami fagota, ua o se manatu e le o tonu ona e le o lava fa’amaumauga ua fa’avae mai ai lea fa’aiuga.

 

O lo ua fa’amauina mai fa’afanua ua fa’aalia i le fonotaga, o le tele o nei fagotaga  e faia lea i le 0-3 maila mai le aloalo o le atunuu, ma ua faia mai fo’i fa’amaumauga i lea mamao o le sone fagota. 

 

I le fuafuaga ua fa’atula’ia nei, ua fa’amauina ai, e na’o le 13,000 pauna o le i’a o lo’o fa’aaogaina e le atunuu i le tausaga e tatau ona toe fagotaina ma fa’aaoga, mai le tatou sone fagota fa’apea ai ma le vasa loloa o lo’o fa’ataga mo fagotaga a vaa fagota tetele, pe afai ae le lava lea fa’asa, o le a oo atu lava ina taofia  nei fagotaga uma seia matauina ua toe fa’ateleina le i’a.

 

O le tulaga sa oo i ai le aotelega o fagotaga o lea ituaiga o o’a Bottom Fish, mai le tausaga 2013 i le 2017 ua fa’amauina ai le 21,139 pauna o le i’a.

 

 

Ua faailoa mai o le a fa’aauau ona galulue fa’atasi le Council ma latou pa’aga o Saeanisi fa’apitoa ma le Komiti Fa’amaumau fa’atasi ai ma le Matagaluega o le Gataifale a le Malo o Amerika Sa oa ina ia sailia isi ala, ma ia fa’alauiloa atili i tagatanuu uma o Amerika Samoa lea taumafaiga, ia fa’ateleina ma toe fa’alauuluola le i’a o le fofoga taumafa o le atunuu i o tatou ogasami. Ia talanoaina lava le tulaga fa’aitiitia o le sapalai o lea ituaiga o i’a i o tatou gataifale.

 

Ia fa’atautaia ni suesuega e mafai ai ona mata’i ala e toe faaleleia ai le sapalai o le i’a lea i totonu o le sone fagota a le atunuu, ma fetufa’i ma fa’ataunuu ala uma e mafai ai ona taofia le so’ona fagotaina o nei i’a i le tatou sone. Ia lava ala e fa’amaumau mai ai fagotaga ina ia mautinoa lava fa’auga ua faia ua fa’aatagia ai le tulaga tonu o i ai le tele o le sapalai o le i’a, le fofoga taumafa o le atunuu.

 

Ua talosagaina fo’i e le Council le fesoasoani malosi a le Komiti Fa’afoe a le Kovana mo Faigafaiva ma le Gataifale ina ia latou galulue fa’atasi e faailoa atu lenei fa’aiuga ua fa’ailoa i fa’amaumauga e le Council i le mamalu lautele o le atunuu. O iina fo’i e mafai ai ona tutu fa’atasi i latou uma nei e fafau fa’alelei se gaoioiga e fa’atino e le atunuu ma ana pa’aga ia fa’afo’ia le fa’aletonu ua mataituina nei e le WPRFMC.