Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

SUIGA LELEI TO’ATELE I PAKA MA NOFOAGA SA FA’ASA ONA O LE COVID-19

 

Ua matauina i tagata ua toatele ua fa’aaogaina paka ma malae ta’alo mo ta’aloga ma tafaoga masani i afiafi ta’itasi, talu ona toe tatala nei le Paka Liona mo tafaoga a aiga.

 

Ua faia ta’aloga Tenisi, ua toe va’aia fo’i ta’aloga Basketball, ua tumutumu fo’i le paka mo tafaoga a le fanau i fa’alua ma siso fa’apea ma mea ua fa’atula’ia ai e tautuaina ai fanauiti. 

 

Peita’i ua va’aia ai ma le vasega o nisi ua fa’alele a latou  Kite, o se ma fou la lea ua matauina. Ua fa’aauau ona savavali nisi ia fa’amalositino, ua tetele fo’i leo o le fiafia ua lagona mai le “Evolve Center” o lo’o latalata ane i lea paka, ae ua fa’aaogaina fo’i le Malae Ta’alo a le VA Center mo koleniga a le ‘au Football a le Wild Cats, le ‘au ta’a’alo a le Nuuuli Voctech High.

 

Ua iloga afai ae fa’atimutimu le afiafi, ua le to’atele nisi e fa’atasi ane, ae maua loa se afiafi ua susulu ma pulapula lagoto ai le la, ua matua fa’afiafiaina aiga ma fanau e fa’aaoga a tatou nofoaga fa’apitoa mo le fa’amalositino a le fanau.

 

“Ua leva fo’i o misia le aumaiga o fanau e fa’aeva i le paka ma ta’a’alo ai, ua leva fo’i o taofiofia le fanau i fale, ua leai se fa’aafu, na’o le ta’alaoga lava o le otaota ma vele paepae o fale galuega tetele ia e fai, ae le lava ai se fa’aafu a tamaiti.” O se tala lea a se tasi o tina matua ua matagofie lana maimoaga i le fanau a’o fa’aafu i taupega ma fa’ase’e mo le fanauiti.

 

E le’i tatalaina le “Vaita’ele” i le Paka Liona, peita’i, afai ae tatala i le taimi nei, e matuainoga lava le tumu.

 

KONEKARATE E GAOSIA ELETISE MAI LE MATAGI 

 

O le tausaga ua te’a na molimauina ai e le atunuu le suaina o le eleele  e amata ai galuega mo le gaosiga o le Malosiaga Fa’a’eletise e afua mai le malosi o le matagi, ma o lea nofoaga e fa’atuina lea i Aasu.

 

O le nofoaga lea e fa’atuina ai poropela e faata’avili e le matagi ma o le malosi’aga lena e ta’avili ma afua ai ona fa’apunafanau mai ai le malosi’aga fa’aeletise. E le tasi la se polopela, ae tele ina ia lava ma totoe fo’i le malosi’aga o le matagi  e maua ai se aotelega o le sapalai o le eletise o mana’omia e le atunuu.

 

Ua mae’a ona fuaina le malosi o le savili ma matagi i Aasu, e lava mo lea fo’i fa’ato’aga o polopela, ia lava ai le sapalai o le eletise e fa’aopoopo ai se isi puna fou o le malosi’aga fa’aeletise.

 

O le fa’ato’aga o polopela e $100 miliona na malo ai le Kamupani a le Green Globe Solutions mai Kanata i le tauofoga.

 

O le isi fo’i poloketi e mafai ai ona maua ai le sapalai o le eletise mai le fa’ato’aga o panele e 20-megauati ma e fausia i le eleele e tuaoi ma le Veterans Memorial i Tafuna, ua manumalo ai le Kamupani a le Canadian Solar/Recurrent Energy i le tau e $42miliona. 

 

Fa’ailoa e le CEO o le ASPA, Wallon Young i le fonotaga ale  Kapeneta i le masina ua te’a, “O nei poloketi ua fa’atalia nei le oo mai o sui o nei Kamupani mo le tatalaga o galuega, peita’i o lo’o ua taofia femalaga’iga i le taimi nei, ae ua mae’a lelei ata uma o le fa’atulaiga ma le fausaga o nei fa’ato’aga.”

 

FA’AMALOSIA TULAFONO AFIO’AGA O VAITOGI - TAOFIA AI SOLIGATULAFONO

 

O se tasi o matai fo’i o le saofa’iga a le afio’aga o Vaitogi, Mase Akapo Akapo, ua ia fa’ailoa, “O aiaiga uma o tulafono ma le vavao a le afio’aga o Vaitogi, ua manatu ai le mamalu o ali’i ma faipule o lenei afio’aga e pasia lelei ina ia taofia ai ma fa’aititia lava le tele o soligatulafono ua masani ona fa’alele i le ea ma tusitusiga, e afua mai i Vaitogi. Peita’i ua autasi agaga o sui uma o le Saofaiga a le matou nuu, ia fa’amalosia le mitamita i mea e ta’uleleia ma lauiloa ai le igoa o Vaitogi i Amerika Samoa nei, ma atunuu i fafo.”

 

Ua ia fa’ailoa fo’i, “Ua tula’i mai nei le Saofaiga a Ali’i ma Tulafale, Faipule ma Pulenuu ae maise le malosi o le afio’aga i lona aumaga, ina ia toe fa’afo’i Vaitogi i se tulaga ta’uleleia aua ua matele ina lauiloa ma matilatila a’e le igoa pele o lenei afioaga i malelega i le ea ma tusitusiga i nusipepa, o  Vaitogi le afio’aga na tutupu ai soligatulafono, o Vaitogi le afio’aga o lo’o alaala ai nisi o fa’ataunuuina nei soligatulafono, ma ua fa’alogoina ai se lagona maasiasi ma le matamuli.”

 

Ua fa’atula’ia nei le fa’asa i Vaitogi mai ia Iuni 07, 2020. 

 

“I le taimi nei, ua iloga mai se suiga lelei, fa’afetai lea i le alofa o le Atua ua musumusina tagata, e utagia lenei leleiga ia fa’aauau pea. O le taofiofia o nei soligatulafono, o se fa’ailo sili lea ua mafai ona faia e tagata uma o Vaitogi, ua soifua fo’i i se olaga mata’u lelei i le Atua,” o se tala lea a Mase.

 

Ua fa’atulaga le 6:05pm ua tatau ona faofale uma sui o aiga mo sauniga lotu afiafi. O le itula e 9:00 i le po, ua mae’a ona le toe va’aia nisi o fanau talavou uma i le afio’aga ua momoe ma malolo lelei, e le tatau fo’i ona toe va’aia nisi o feoa’i solo i le afio’aga.

 

Ua pasia i tulafono a le afio’aga, “Ua fa’asaina ai le Ulu uumi o tama ma ‘ava ua fa’aola ae o le vasega o tamaitai ua fa’asa ona toe ofuvae pupu’u i totonu o le afio’aga se’i vafana o taimi o ta’aloga. Ua mae’a pasia i le fonotaga o le saofaiga atoa a le afio’aga, ma ua fa’amoemoe o le a utagia e le mamalu atoa o e alaalata’i i Vaitogi nei tulafono uma.” 

 

“Peita’i o le mea sili ona manatu ina ia faia e tagata Vaitogi uma lava, aua ne’i toe faia ni fa’apotopotoga e ono fa’ama’ite ai misaga ma fevaevaeaiga i totonu o le nuu.” O se toe tima’i mai lea a Mase Akapo i le mamalu o le afio’aga, ae maise i le malosi o le nuu.

 

Ua fa’afetaia e Mase le utagia mai e le pa’ia maualuga o aiga uma o alaala i Vaitogi o le tima’iga a le Saofaiga o le pulega a Ali’i ma Faipule i Vaitogi, aua ua va’aia le oo ane o taulele’a uma o le afio’aga mo le leoleoga o le Sa, ua matua mama mai auvae ma ao.

 

O isi tulafono e aoga fo’i ona iloa patino e i latou uma o e malaga atu i totonu o Vaitogi, ua aofia ai ma le leai o ni ta’avale e so’ona saoasaoa ma fa’aleotetele a latou la’au pese i totonu o Vaitogi, le toe i ai ni inugapia ma pati e faia i Vaitogi. Ua le toe fa’atagaina ai ni fefa’ataua’iga o ni fuala’au fa’asaina ma vaila’au o’ona poo Majuana ma ‘aisa. Le toe i ai ni taelega e faia i lea afio’aga i le aso Sa. Ua le toe fa’atagaina nisi o le afio’aga po’o tagata Vaitogi lava ia ona tia’ia ni a latou lapisi i autafa o magaala, ua na’o kalone Lapisi lava ua fa’ataga mo lapisi o so’o se ituaiga.

 

O aiga fo’i e nofo lumafale i le alatele, ua fautuaina ina ia fa’amama talaluma ma autafa o maota ma laoa ia matagofie Vaitogi i maimoaga a so’o se tasi e pasia ane i le ala.