Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

26 TOLOPO LE FA'AALIGA O TU & AGAIFANUA A LE PASEFIKA I LE 2024

 

O le taligamalo sa manumalo ai le Setete o Hawaii mo le Fa’aaliga Tele o Tu ma Agaifanua a le Atumotu o le Pasefika 2020 ua tolopoina nei e fa’ato’a fa’ataunuu i le tausaga 2024. Ole fa’aaliga lenei sa fuafua e fa’ataunuu i le masina o Iuni 10-21, 2020.

 

E tele fo’i mea na fa’atulaga e le Setete o Hawaii mo le latou taligamalo, ma sa matua fa’afiafiaina fo’i au malaga a malo uma o le  pasefika o le a fa’atasia i lea setete tele, peita’i ua toe tolopoina nei  ona o lenei fa’ama’i o a’afia atoa uma ai atunuu o le lalolagi.

 

O le ali’i Taitaifono o le Komisi a Hawaii mo le latou taligamalo sa fuafua mo lea fa’amoemoe i lenei tausaga,  Senatoa Kalani English, sa ia fa’ailoa, “E tele mea sa fa’amoemoe tele i matou e fa’aalia, ae le gata i lea, sa fa’atulaga fo’i le matou taligamalo ina ia avea ma se tasi o avanoa taua mo i latou uma o Atisi a le vasa pasefila e fetufa’i ai latou taleni, fa’aleleia atili ala e mafai ai ona fa’aalia latou galuega alofilima, ma galulue fesootai lelei ma isi o i latou mai atumotu eseese o le paseefika.”

 

“O lea la ua toe fafau nei le upega tautai ma ua fa’atulaga le isi fa tausaga e afuafua ai se faiga saogalemu mo le mamalu o le a pa’au mai i Hawaii e fa’aalia latou tu ma agaifanua i le 2024 pe afai ae tumau pea lava le coronavirus ia i tatou.” O se toe fa’aopoopo mai lea a Senatoa Kalani English.

 

O le talosaga a le Komisi o le Faaaliga Tu ma Agaifanua a le Pasefika a le Setete o Hawaii na fa’aulu ina ia tolopoina le fa’aaliga mo le isi 4 tausaga a’o taumafai e fa’amautu se fuafuaga e puipuia ai le to’atele e gasolo atu i le setete mo lea fa’amoemoe mai le Coronavirus i le lumana’i, ua talia lelei mai e le CPAC ia Me 20, 2020, ma ua fa’atulaga ai loa e avea ma tonu mautu o lea lava fa’aaliga tele a atumotu o le Alamoana po’o le Pasefika.

 

26 FANAU A’OGA MAUALULUGA SIKOLASIPI MALO AOOGA I AMERIKA

 

E to’a 26 fanau a’oga maualuluga ua maua sikolasipi a le Malo o Amerika Samoa e fa’auau ai aoaoga i kolisi ma univesite i Amerika. O i latou nei sa tuuina atu i ai a latou sikolasipi i le vaiaso ua te’a i se fa’atasiga i le Potu Fono o le ASDOE i Utulei.

 

O lea fa’ataisga sa auai le taitaifono  o le komiti o Sikolasipi a le malo, Faiivae Alexander Godinet ma le tamaitai fa’atonu o Aoga a le Malo, Dr Ruth Matagi Tofiga. O i la’ua na sa avatua le fa’amalo ma le tima’iga i fanau ina ia taumafai atili e fa’amautu aiaiga uma o le maua ai o lea fesoasoani mai le Malo a’o taumafai e sailia o latou tusi pasi maualuluga i a’oa’oga i fafo. 

 

Sa talanoaina foi ma matua le tulaga o lo’o pepesi ai le COVID-19 i Amerika, ae atonu e togai i le amata o aoaoaga i le Kolisi Tuufaatasi a Amerika Samoa i lenei vaitaimi. 

 

O i latou maua sikolasipi: Baby-Serenalia M. Iona, Daryn K.T. Lauti, Dorvida F.G. Fuiava, Ellen Li, Emily K. Kennach, Erin P. Jessop, Eveline Suani, Finiana J. Finau, Jada L. Fepuleai, Jane T.F. Pula, Jaylanni E. Vaoalii, Luafataalae T. Voigt, Lynell Mareko, Mavaeao F. Tili, Mei Ling Aga, Merry Christmas Vaa, Micha Faumuina, Michell Lo, Molila’auifoga’a Salavea, Noelani H. Nomura, Noelle Lei Sam, Paul Cassens, Talofa Fe’a, Tuiolo F.A.Aumua, Uelese Patu, Yasminna L. Sanchez.