Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

FA’AMALO LE TAUTUA - FA’AMASINO FA’AU’UGA TO’OTO’O - ALO AMERIKA SAMOA

 

O le tatou Faipule i le Konekeresi Tali Aumua Amata na muamua lava ofoina ai lana fa’amalo ma lana fa’afetai fa’alaua’itele e fa’ailoa ai fo’i lona agaga fiafia i le tulaga ua oo i ai le tautua a lea alo o Amerika Samoa, ao tofi maualuluga fo’i i le Setete o Hawaii i lana vaega o Fa’amasinoga.

 

“Fa’amalo atu i le susuga le Fa’amasino Fa’au’uga To’oto’o ona o lo ua toe fa’aauau lona tofiga Fa’amasino i le Setete o Hawaii. O ia o se alo o le tatou afio’aga o Nuuuli. O lo ua iloga fo’i lona agava’a i tomai mo’omia e fa’atino ai tiute uma o lona tofi o tautua ai nei, ma iloga ai Amerika Samoa i lea setete. O le filifiliga ina ia fa’aauau lana auaunaga o se tasi o mea ua agatonu aua ua iloga fo’i ona fa’aea le tatou malo ona o lea alo.”

 

O le tina o To’oto’o o Paia Tago o le auaiga Sa Tago ma Sa Lavata’i o Nuuuli, ma ua vavalalata fo’i i lona auaiga i Sa Poloa o Leone, lea sa aoga ai o ia i lona olaga talavou i Leone High ma fa’au’u mai ai i le tausaga 1976. O lona tama o La’ititi To’oto’o mai Olosega.

 

Na aoaoina le Fa’amasino Fa’au’uga To’oto’o i Missouri Valley College, ona fa’asolo ai lea o ana aoaoga i Greece, ma fa’ato’a sailia ai lona fa’ailoga i mataupu tau tulafono i le Iunivesite o St Louis.

 

I le tausaga e 2010, na filifilia ai o ia e avea ma Fa’amasino o le Fa’amasinoga Fa’aitumalo a le Setete o Hawaii ma ua tele na’ua ituaiga fa’amasinoga ua ia fa’afofogaina ma faia i ai fa’aiuga mo a latou soligatulafono. O nei soligatulafono e aofia ai le fasioti tagata, sauaga, gaoiga, osofa’i o fale ma meatotino a isi, ma le tele lava o isi ituaiga o soligatulafono ua mae’a fa’afofogaina e ia mo le 10 tausaga.

 

Sa i ai avanoa sa galue ai fo’i o ia, e avea ma Fa’amasino e fa’afofogaina fa’amasinoga a le Fa’amasinoga Maualuga a le Setete o Hawaii.

 

Talu mai le tausaga 1994 e oo mai i le taimi na tofia ai e avea ma Fa’amasino i le Circut Court a Hawaii, sa avea o ia ma fa’amasino lagolago o le Fa’amasinoga Fa’aitumalo o le First Circut, lea e fa’afofogaina fa’amasinoga o soligatulafono eseese e aofia ai solitulafono tau feoa’iga i luga o le alatele, fuala’au ma vaila’au fa’asaina, sauaga i totonu o aiga ma isi lava fa’amasinoga sa tutupu ma fa’aulu i lea vaega o le Fa’amasinoga Fa’aitumalo.

 

A’o le’i avea o ia ma Fa’amasino o le Circut Court lea e tautua ai nei, e sefulu tausaga sa mua’i avea o ia ma Sui Loia e molia tagata solitulafono i Honolulu lava.  E aofia i nei ituaiga fa’amasinoga o le tele o fa’amasinoga tau soligatulafono e faia iloiloga e nisi ua tofia latou te fa’afofogaina le fa’amasinoga poo le tiuri ma fa’amasinoga fo’i o e ua molia i le fasioti tagata.

 

O nisi o fa’alapotopotoga o lo’o fa’atasi i ai le ali’i fa’amasino o se sui totino, e aofia ai le Komiti o le Mo’okini Heiau Foundation Lumana’i Awards; Fagaina o le Vasega o Tagata o lo’o Nonofo Solo i alatele o Waianae e le Vaega a le Paris Ohana, Waimanalo Community Fair & Savali mo le Kerisimasi;  Komiti & Stone Class;  Youth Challenge; ma isi lava Sosaiete a Samoa i le tele o mea e fa’atino fa’aleaganuu e fiafia fa’atasi ai o ia ma ona tagatanuu i Hawaii ae maise ona aiga ma lana Ekalesia. O ia fo’i o le totino o le Kaneohe Canoe Club.

 

FILIFILIA FALA SUALEVAI - AVEA MA CEO - PULESILI - O LE ASTCA

 

I le aso Faraile talu ai, ua fa’alauiloa mai ai le sui ua mae’a filifilia e le Komiti Fa’afoe a le ASTCA lea fo’i e ta’ita’ifono ai Iulogologo Joseph Pereira, le tamaitai o Fala Sualevai e avea ma CEO o le ASTCA.

 

Ua fa’asalalauina fa’alaua’itele mai e le ASTCA, o lea sui ua leva fo’i ona avea ma se tasi e umia tofiga tau ta’ita’i o le ASTCA, ma sa avea ma CFO po’o le fa’auluuluga o le Ofisa o Tupe a le Matagaluega o Feso’ota’iga Tau Telefoni ma Uaealesi fa’apea le Initeneti a le tatou Malo. O lona tofiga muamua lea na galue ai i lona fa’atasi mai ai i le pulega lea a le ASTCA.

 

E i ai fo’i se vaitau na tautua ai o ia e avea ma Sui CEO, e fa’atalitalia se sailiga o se tasi e tula’i mai lea tofiga mo le pulega o feso’ota’iga.

 

I le saunoaga fo’i a le Taitaifono o le Komiti Fa’afoe o le ASTCA Iulogologo Pereira, sa ia fa’ailoa ai, “Ua matou faia se fa’ai’uga lelei i lenei aso ina ua filifili e le Komiti Fa’afoe Fala e avea ma CEO o le ASTCA, ua masani ai o ia ma lea fo’i faiva, ma ua naunau fo’i e fa’atautaia galuega ia to’ai taunuu i mea lelei.”

 

“O Fala o se tamaitai ua masani ma tofiga fa’ata’ita’i, ua lava fo’i lona iloa o lea matata ma i latou o lo’o sapalaia le matagaluega i a latou tautua, fa’apea fo’i ma tautua uma e tatau ona fa’atino e le ASTCA i o tatou tagata ma le tatou malo. Ua fiafia ai fo’i i matou ma le Komiti Fa’afoe e fa’alauiloa atu le matou tofiga o Ia e avea ma Pule Sili o le ASTCA.”

 

A’o le’i faigaluiega Fala i le ASTCA, sa muamua faigaluega o ia i le Bluesky Communications i tulaga pule fo’i ma e aofia ai le tofiga o le Financial Controller po’o le Tausitusi o Tupe.

 

Ina ua toina ia te ia lea tofiga fou, sa maua e Fala Sualevai le avanoa e fa’afetaia ai le latou tofiga ua pale ai, ma ia fa’ailoa atu lona agaga fa’afetai tele ma lona fiafia e galulue fa’atasi ma le Komiti Faafoe i so’o se mea e manatu e faaleleia atili ai le auaunaga mo le atunuu ma le malo o Amerika Samoa.”

 

“O lo ua i lo’u loto fo’i le fa’amoemoe maualuga ina ia si’itia le tautua a le ASTCA i le isi la’asaga e maualuga atu nai lo le mea o i ai nei.”

 

Mai Ofu Manu’a na fa’au’u mai o ia i le David Star Jordan High  ma fa’asolo atu ana aoaoga i le Pikes Peak Community College i Colorado Springs. O lo’o ia umia le BSc i aoaoga fa’atausi tusi mai le Iunivesite o Colorado i Colorado Springs.