Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA - 

 

FA’AMANATU 116 - TAUSAGA SISIGA FU’A MANU’ATELE

 

O le aso ananafi, Iulai 16, 2020 sa fa’amanatu ai le 116 talu ona sisiina le tagavai o le Iunaite Setete o Amerika i laufanua o le Manu’atele, ma avea ai le Motusa ma vaega o le teritori o Amerika Samoa. 

 

I le fa’amanatuina o lea aso fa’apitoa i tala fa’asolopito o Amerika Samoa, sa avea ai ma aso malolo o le malo o Amerika Samoa, ma tapunia ai ofisa o le malo, ae o kamupani tua sa galulue pea i latou. 

 

I se vaega o le poloaiga a Kovana Sili, Lolo Matalasi Moliga, mo le fa’amanatuina o le Sisiga Fu’a a Manua, sa ia fa’ailoa ai le taua o lenei aso i tala fa’asolopito o Amerika Samoa, ma o le manulauti i lenei tausaga, “Samoa Muamu Le Atua”.

 

E le’i fa’ailoa fa’alauaitele e le malo sana polokalama fa’apitoa mo le Manu’atele, ae o tausaga ua fano sa faia ai sauniga i Fale’ula, i Ta’u, Manu’a.

 

FONOTAGA KOMITI CORONAIRUS IA IULAI 26, 2020

 

Ua taofia fonotaga a le Komiti Fa’afoe a le Coronavirus se’ia fa’atoa toe faia le isi fonotaga ia Iulai 26 ma le le’i faia se fonotaga i le aso Sa ua te’a.

 

O nisi o sui tofia mo lea Komiti Fa’afoe ua fa’ailoa maia, o lea fa’aiuga sa fa’ailoa ane i le fonotaga mulimuli i le aso Gafua na te’a nei, ma ua fa’atulaga ai o le a faia fonotaga fa’atasi i le masina, ae le o le faatasi i le vaiaso e pei ona fa’atulaga mai ai i le amataga.

 

O le aso Gafua na te’a nei, ua mae’a ai le ta’i 14 Aso o i latou sa nofoia le Sadies by the Sea ma ua mae’a ai fo’i le toe fa’aaogaina o le faletalimalo lea i le fa’amoemoe mo e nofo va’ava’aia poo maua i le Coronavirus. 

 

O nisi sa totoe e ai ina fa’amae’a le taimi e 14 aso mo le nofova’ava’aia e le Matagaluega o le Soifua Maloloina lea sa fa’anonofo i le Sadies, ua mae’a suia le nofoaga e fa’amautu i ai, i Fatuoaiga.

 

O le aumalaga lea na aumaia e le toe malaga mai Samoa, lea sa fa’atulaga mo le aso Lua o le vaiaso nei,  ua fa’atulaga le latou nofova’ava’aia i Fatuoaiga, le nofoaga fo’i ua mae’a fa’atulaga mo lea fa’amoemoe, e sailia auiliili ai poo i ai lava se tasi o ulufale mai ma le fa’ama’i pipisi vave o le Coronavirus.

 

O le faitau aofai o i latou ua totoe i Samoa e fia malaga mai, e le’i fa’ailoaina mai lava, peita’i ua fa’ailoa mai e le Matagaluega o le Soifua Maloloina, “O le aofa’iga mautinoa lava o i latou o totoe e ao ina aumaia e fa’amautu ma fa’ailoa patino mai lea e le Ofisa o le Loia Sili. O i latou na e fa’atagaina le malaga mai o so’o se tasi ua talosaga mai i Samoa e fia toe fo’i mai.”

 

FA’AILOA E LE FETERALE - LE TATAU MAUA TUPE E SUI O LE FONO:

 

Ona o lea ua amata ona fa’agaoioi galuega a sui tofia uma o le fono faitulatono e fa’aaogaina ai latou tinoitupe na taua’aoina atu e fa’atula’ia ai latou Ofisa i o latou aiga, ona o lo’o taumafai pea ona pasia le fausaga o le falefono fou, ua fa’ailoa mai e le Sui Su’esu’e o le Vasega o Tupe a le Malo Tele, Richard K Delmar, i lana tusi ua taua’aoina nei e le Teutupe a le tatou Malo Ueleigitone Tonumaipe’a, ua le tatau ma ala o le tulafono lea mea ua faia nei.

 

O se fa’amalamalamaga lea o le tinoitupe ua taua’aoina mai mo galuega uma e taumafai ai ona puipuimalu pea Amerika Samoa mai le lutia e le Coronavirus. Ona o se faasea na fa’ao’o atu mai se tasi o lo’o alaala i Amerika Samoa, Steven Pincus Hueter, e tusa o le taua’aoina o nei vaega tupe i le faipule ma Senatoa, lea ua avea ma afuaga o le feso’ota’i mai o le Matagaluega o Tupe a le Malo Tele ma Tonumaipe’a, mo se fa’amaoniga.

 

I le tusi ua taua’aoina ua fa’atulaga mai ai se fonotaga i le va o i latou e to’atolu, Delmar, Tonumaipe’a ma Blanche Barber, e tusa o le fa’aaogaina o tinoitupe uma ua toina mai mo le Covid -19, e ala mai i le CARES Act.

 

O le isi lea vaega tele o le talanoaga, o le fa’aaogaina o tupe o le Covid -19 e tapena ai Ofisa o Senatoa ma Faipule o le Fono Faitulafono mai o latou aiga.  Ua mautinoa lelei ua leva ona amata galuega o le Maota Fono Fou a’o le’i oo mai i le taimi na fa’amamalu ai le fa’asa mo le Covid -19 ma sa faaaoga lava e ali’i Senatoa le Maota i le lotoa mo a latou fonotaga ma latou feso’ota’iga sa mo’omia mo le latou va feagai ai ma latou itumalo.

 

Ua matauina fo’i sa fa’aauau lava feso’ota’iga e ala i feso’ota’iga fa’ainiteneti a sui o maota e lua o le fono faitulafono i lena fo’i vaitau atoa a’o le’i lutia le atunuu i le fa’asa o le Covid-19.

 

Ona o le mautinoa ai sa i ai pea feso’ita’iga a sui uma o le fono a’o le’i oo mai i le taimi ua fa’amalosia ai le fa’asa o le Covid+19, ua iloga mai ai, e le o le mafuaga lea ua taua’aoina ai lenei vaega tupe tele ia i latou mai le tinoitupe o le Coronavirus.

 

“Ona o lea ua fa’amaonia nei lea tulaga, e tatau i sui tofia uma o Maota e lua o le Fono Faitulafono ona toe fa’afo’ia uma le vaega tupe na taua’aoina i le Vaega o Tupe a le tatou Malo, lea na avatu ai. Pe afai ua mae’a ona fa’aaogaina e sui na taua’aoina i ai nei vaega tupe, ua tatau loa ona fa’amalosia atu e le matou Ofisa le tulafono ua mae’a aiaia ai i latou e fa’aaoga sesenei tupe mai le CARES Act.”

 

Ua aofia i lea tusi o le talanoaina fo’i o le tinoitupe ua toina mo aumaga i afio’aga tetele o le atunuu, ia leoleoina ai o latou afio’aga pe a oo ina pipisi le fa’ama’i i o tatou laufanua.