Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA

 

TOE ASO FAILA TALOSAGA LATOU VAEA MAI GALUEGA - ONA O LE FA’ASA

 

O le toe aso e mafai ai ona fa’atumu talosaga a i latou ua manana’o i fesoasoani tupe e suia ai latou totogi sa maua ae ua soloia ona o le fa’asa a le coronavitus i le tatou malo, o Iulai 31. 

 

O i latou e agava’a i lenei alamanuia, ua na’o i latou na soifua a’e i Amerika Samoa, i latou o sitiseni Amerika ma i latou o lo’o i ai o latou pepa nofo mau i Amerika le Green Card. Ae o lo’o mafai ona fa’atumu pea lava talosaga a i tatou o lo’o i ai pepa e nofo mau ai i Amerika Samoa ma faigaluega, ae le o mafai ona mautinoa se alamanuia mo oe, ona o lo’o tatalia se fa’auluga a le tatou faipule o se talosaga fa’apitoa, ina ia aofia ai i tatou na i le lisi o e agava’a i lea penefiti. 

 

O le afuaga ua mae’a fa’ailoa atu muamua, ona ua fa’aaogaina sa’o e le tatou Matagaluega o le tulafono a Hawaii, e fa’aaogaina mo le aiaiga o tatou tagata faigaluega e agava’a i lea alamanuia.

 

E oo mai ia Iulai 15, 2020 ua faitauina le aotelega e 820 i latou ua mae’a fa’atumu a latou talosaga nei mo le PUA - $180 i le vaiaso poo le FPUC lea e $600. i le vaiaso. E na’o aso lava poo vaitau na a’afia ai galuega a tagata nei o le a totogia i lea lava alamanuia mo tagata faigaluega ua vaea mai galuega, fa’aitiitia itula e faigaluega ai, ma e fo’i ua tapunia o latou pisinisi sa faigaluega ai, ona o le fa’asa.

 

Ua le taliaina se talosaga e fa’ailoa ai na muamua vaea oe mai lau galuega a’o le’i oo ia Mati 31,2020. O nisi o le atunuu o lo’o faigaluega i Ofisa o le Malo tele ua i le tatou nei malo e aofia ai le Saogalemu, National Marine Sanctuary, Census ma isi ua mafai ona talosaga i latou i le FPUC mo latou taimi e le’i totogia ai i latou i lo latou totogi atoa sa tatau ona maua a’o tapunia latou Ofisa ona o le fa’asa, ma ua fa’ato’a mafai ona totogia lea penefiti pe afai sa ua a’afia lau galuega e afua mai ia Iulai 31, 2020.

 

O le talosaga sa fa’aulu atu i le Ofisa o le tatou Faipule i le Konekeresi Tali Aumua Amata, lea o lo’o tatalia nei se tali e fa’afiafiaina ai le mamalu lautele o i latou o lo’o a’afia galuega sa tautua ai, ae le o aofia i lea fo’i alamanuia i le taimi nei. Peita’i ua talia pea a latou talosaga e fa’atumu, ona tatalia ai lea o lea taumafaiga pe tua mai i se tali fa’amalieloto.

 

TUPE ASOSI PISINISI I AMERIKA SAMOA FESOASOANI PISINISI LAITI

 

Ua fa’ailoa mai e le Asosi o Pisinisi i Amerika Samoa, “O le matou foai o le a tapena e matou te faimeaalofa ai i pisinisi laiti ua a’afia i fa’aletonu a’o taumafai ona fa’atautaia pea, ae maise pe afai o le a leai se isi fesoasoani e maua mo i latou mai faletupe ma isi ala ua masani ona talosagaina pe a oo ina lutia i ni fa’alavelave le ma’alofia.”

 

Ua filifilia e le Asosi o Pisinisi le Pisinisi a Scanlan mo lea fa’amoemoe. O le alagatupe lea a le Asosi a Pisinisi ua leva ona fa’atulaga ina ia fesoasoani i pisinisi laiti ae a’afia le latou aluga lelei sa i ai i ni fa’aletonu fa’afuase’i, e pei o mu, lologa ma isi.

 

Ua fa’ailoa mai e le o mafai ona fesoasoani mai le Malo tele ona o le a’afiaga o le Covid-19, ma o lea la le afuaga o le fa’aiuga e avea lea pisinisi la’ititi a Scanlan ma se pisinisi e ave i ai le foa’i lea a le Asosi.

 

Ua i ai le fuafuaga a le Asosi a Pisinisi o le a fa’aaogaina lenei vaitau o le palotaga, e fa’atulaga ai e i latou ni a latou feso’ota’iga ma sui tauva o le palota, e afua mai le tofi Kovana ma le Sui Kovana, ae maise fo’i o le sailiga o le Sui Faipule i le Koneneresi, ina ia vala’aulia e fa’aalia ni o latou finagalo e tusa o tulaga o a’afiaga o pisinisi i le atunuu, ma ni a latou fo’i fuafuaga o lo’o fa’atulaga e fesoasoani ai e fa’aolaola laulelei pisinisi i le atunuu.

 

O nei avanoa e feso’ota’i ai ma sui tauva o le a totogia le ulufale ma o le tasi lea ala e saili tupe ai le Asosi o Pisinisi mo lea fo’i fesoasoani tupe mo pisinisi tau atina’e. Ae maise ina ua talosaga mo se fa’atupega mai a le Malo tele ae le talia.

 

FUA O FA’AELEELEAGA MAI FA’ATO’AGA - $44.3M LIPOTI 2018

 

Ua fa’ailoa mai nei e le lipoti mai le USDA - National Agricultural Statistics Service le fa’amaumauga o fuai numera o tupe maua mai fa’ato’aga a le Malo o Amerika Samoa e $344.3 miliona i le tausaga 2018.

 

O se fa’amaumauga muamua lea ua mafai ona toina mai e le NASS mo Amerika Samoa talu mai le silia ma le 10 tausaga talu ai. 

 

“O le faitauga lea o fua o fa’aeleeleaga a le atunuu, ua na’o le NASS e mafai ona maua ma fa’amauina  mai ai,” o se tala lea a le NASS Administrator Hubert Hamer.

 

O nisi o mea mata’ina i fa’amaumauga ua aofia i lenei lipoti ua tamau mo le tausga 2018:

 

• e 6.329 fa’ato’aga e oo i le 489 fa’ato’aga ua sili ai mai le faitauga mulimuli o le atunuu ma faifa’ato’aga galulue i le atunuu.

 

• O le aotelega o eseese ua galueaina mo fa’ato’aga e 14,404 eka ma ua fa’amauina e tusa lea ma le 2.3 eka i le faifa’ato’aga e tasi.

 

• O le aotelega o le tupe na maua e nei faifa’ato’aga uma e $44.3miliona ma e tusa lea ma le  $6,994. a le faifa’ato’aga e tasi.

 

• O fuala’u ‘aina mata ma  popo o le vaega sili lea ona tele i fa’amaumauga ma e oo le tupe na maua ai i le $20.5miliona.

 

“O le aoga o nei fa’amaumauga e mafai ai ona fa’amautu atili e le vasega o Matagaluega o feagai ma le fa’aleleia atili o tautua mo Faifa’ato’aga, le vasega o taitai o le malo, ona fuafua lelei ituaiga ala e fa’aleleia ai fa’ato’aga i le atunuu, aua e mafai ona fa’ateleina atu fo’i le tinoitupe e maua ai e le malo nai lo le fa’amauga ua fa’ailoa nei. Ua aoga tele e toe taga’i ai i ituaiga o fa’ato’aga e ao ina fa’aleleia atili ina ia aga’i i luma le tamaoaiga e maua ai, ma ia faia se faiga e fa’afiafiaina atili ai tagata faifa’ato’aga e toto ma fa’atau atu fua o fa’aeleeleaga,” o se tala lea a Hamer e tusa o lea lipoti aoga i le tamaoaiga o maua mai fa’ato’aga i le atunuu.

 

O loo maua le fa’amaumauga lenei mai le Census o Fa’ato’aga i le latou lipoti fa’amauina i le Uepesite: www.nass.usda.gov/AgCensus.