Ads by Google Ads by Google

Tala I Vaifanua

Pago Pago, AMERIKA SAMOA

 

FA’AMANATU LE 90 TAUSAGA AUFAIPESE EFKAS I VAILOATAI

 

O le sauniga matagofie na fa’atinoi i le malumalu Ekalesia Fa’apotopotoga i Amerika Samoa i Vailoatai i le aso Sa na te’a nei, sa fa’atino ai ma le fa’amanatuga o le atoaga o le 90 tausaga o le latou Aufaipese Tele, talu ona fa’avae mai lea galuega mo vi’iga o le Atua i le afio’aga ma lea ekalesia.

 

O le aso 10 o Aukuso i le 1930 na fa’avaeina ai le  aufaipese lea ua le toe i ai se tasi o le afio’aga o totoe na auai i le taimi na amatalia ai le galuega, peita’i ua i ai sui tino i matutua ua tumau mai. 

 

O tina nei e to’alua o Luamalae Mapu ma Tuapa Elisara Meaole, o i la’ua fo’i na sa avea ma sui e faia se Upu toe fa’amanatu i taimi ao tautua mai i le galuega tau a’oina o vi’iga o le Atua a’o talavou se’ia oo mai i lenei vaitau.

 

Ua le toe auai le tina matua i le aufaipese ona ua tino matua, peita’I e le’i taitai ona matuu ese lona agaga e fia tautua pea, O lo’o lelei fo’i lona siufofoga peita’i ua fa’atutugata o ia. O ana taulaga ua avea ma sui i lona soifua auauna i lona Atua i le tuufa’atasiga o le aufaipese i lenei vaitau.

 

I le sauniga lava fo’i lea ua tapena ai ma fa’amatu tofiga fou e galulue i le laulauatofi a le Aufaipese e galulue i le tausaga 2020-2021 ma ua tofia ai le susuga Seumalo Sofa e avea ma Peresetene, Sui Peresetene o Sopa Fualau ma le Teutupe o Penelope Lopa ma le tamaitai Failautusi.

 

I le agai atu i totonu o le malumalu o le Atua mo le sauniga i le Aso Sa na te’a nei, sa va’aia ai le foa’i a le mamalu lautele o le Ekalesia mo le fa’amoemoe o sau taulaga ua ofo mo le galuega a le Aufaipese Tele. Na i ai le avanoa o le teutupe na toe fa’ailoa mai ai le a’ao fo’i o le mamalu atoa na lafo ma sa tu’ufa’atasia ai le aotelega o le foa’i e $4,635.

 

Na i ai fa’aevagelia ma le pese fa’apitoa sa fa’atulaga o le sao o le Aufaipese i le latou polokalama fa’atino e fa’ailo ai le latou 90 tausaga ua ausia ma le fiafia, e ui inau a le toe i ai se tasi o totino na i ai i le amataga o totoe mai i le taimi nei. O le sui mulimuli sa auai i le atoaga o le 80 tausaga o le aufaipese, o le tina matua o Va’aia Laumoli, peita’i ua mapu mai i ti’asa o ia  i le atoaga o le 90 tausaga talu ona galulue lea aufaipese mo pese ma vi’iga o le Atua.

 

I le sauniga lea sa tula’I ai le susuga le Faife’au Rev. Sega Ifopo e avea ma failauga o le Upu ma sa fa’atutu fo’i lana tima’iga i le soifua galulue o le Ekalesia ina ua vala’auina i tiute eseese e galulue ai, aua le vi’iga o le Atua. Isaia 40: 31-40 na faitauina mo le upu fa’amalosi’au ia tumau i le faiva ua e galue ai, aua lava ma le mata’uleagaina, ae ia tauleleia ma maua ai le vi’iga o le Atua.

 

I le vaiaso ua te’a i galuega saili a le Laulauatofi fou sa latou sailia ai le seleni e $13,000+ e ala i le latou fiafia sa fa’atino o siva a aiga, ua fa’apea fo’I ona faia le latou fiafia i le aso Faraile e fa’afetaia ai e le laulauatofi le ekalesia atoa ona o le a’ao foa’I e ala i lea tinoitupe tele sa to’ia ai le laulau mo galuega fai a le Aufaipese i lenei tausaga.

 

Na saunoa fa’afetai le failauga e tusa o le a’ao foai ua a’apa i ai le ekalesia ma sa ia fa’apea ane, “Ai ona ua le toe i ai se Bingo i lenei vaitau, ua tetele ai seleni e sefe a tatou aiga, o se tasi lea o mea lelei ua fa’atonu mai e le Coronavirus ia i tatou uma. Ua atagia lou faasili o le galuega i le Atua e ala i lou foa’i ma le loto i so’o se vaega o lana galuega.”

 

I le timai a tina sa tofia mo se upu fa’amalosi tau le galuega i ona totino uma sa la’ua fa’apea ai,”O aso uma e faia ai pese ma a’oga pese, e o mai ma le fiafia, e fiafia e maua lelei fati o pese ia le sasi se tasi I le taimi e usu ai viiga o le Atua I sauniga, ua ese le va’ai I lenei vaitau, ua matele ina tuai mai. Ua mou malie ese atu lea naunau ma le fiafia faia’e I agaga o fanau e fia pepese mo le Atua. Ia outou ne’I malo le ti’apolo I tou olaga, ma outou fiafia ai isi ituaiga pese e leaga ai outou agaga, ae fa’amalosi mai mo vi’iga o le Atua soifua.”

 

Na fai meaalofa fo’i le Aufaipese i le mamalu o le aufaigaluega ma tama ma tina matutua o lo’o i ai i le sauniga i lea taeao i le malumalu EFKAS i Vailoatai lava.

 

ISUMU FEAVEA’IA LE LEPTOSPIROSIS MA UA TOE FA’ATETELE MAI

 

E ui o loo mita’i e le atunuu le to’ai taunuu mai o le Coronavirus, ae ua I ai fo’i le tatou fa’aftitauli tumau o le fa’ama’i o le Leptospirosis lea e masani ona a’afia ai le fanaux ma tagata uma aua e feavea’ia e meaola.

 

Lea ua fa’ailoa mai le so’otaga ma i tatou ona o Isumu ma Ta’ifau i o tatou laufanua ma   oo mai ai i totonu o aiga i le atunuu. 

 

O se fa’aaliga mai le tamaitai o lo’o fa’atautaia nei le tatou Ofisa o Tautua mo Meaola i le matagaluega o Fa’ato’aga i Tafuna, Tanya Tarasawa, ua ia toe fa’ailoa mai ai i le mamalu o le atunuu, le toe va’aia ua fa’ateteleina o lea fa’ama’i i le atunuu ona o lo ua tau’avea nei e Isumu ma oo ane ina maua ai ta’ifau, o meaola ua fa’afagafao e le mamalu lautele o le aiga ma ua oo ai ina pisia ai fanau ma tagata i lotoifale o aiga ta’itasi o le atunuu.

 

O auga o lea gasegase pe a maua ai le tagata e manava tiga, maualuga le fiva, tiga maso o le tino, oo na aupua’i, mumu mata ma gagase tino. Pe afai lava e le vave ona togafitia i le falemai, e i’u lava ina maliu ai le tagata. Ua mautinoa nei, o isumu lava lea ua tauavea nei siama o lea ma’i.

 

Ua fa’ailoa ma nei e le tamaitai sui foma’i manu i le Falema’i o Meaola i le tatou matagaluega o fa’ato’aga, “Ua matauina le tele o ta’ifau ua faaoo mai ua mama’i i le tatou nei falema’i o meaola, ua maua i le leptospirosis, ma ua a’afia ona o isumu.”

 

Ua ia fa’ailoa fo’i, “Ona o le tetele o timuga, o lea ua mafua ai fo’i ona lalafi mai isumu i totonu o maota ma laoa ma ua sailia ai latou mea’ai. Pe a oo la ina o ese mai tagata o aiga mai o latou fale ona fa’ato’a feoa’i ane lea o meaola nei mai o latou lafitaga tumau i totonu o maota ma laoa ma fa’atama’ia nai toega mea’ai o lo’o latou maua, o le ala lea o le oo ane i ta’ifau aua o mea’ai na e muamua lava fa’aaoga e aiga e fagaina ai i latou. E ono oo nei siama i tagata o aiga aua e tausia lelei a latou meaola i totonu o latou fale.”

 

“E vave fo’i le sosolo o lea fa’ama’i i isi maile o lo’o fa’atasi i totonu o maota ma laoa o aiga, pe a a’afia le tasi o i latou i lea faama’i ua tutusa lava ma tagata soifua, ona fe’avea’ia fa’ama’i fa’apenei, i totonu o tatou aiga,” o se toe fa’amanatu mai lea a Tarasawa.

 

“Ia mautinoa o pupuia lelei outou o lo’o tausia  lelei a outou fagafao mai le pesia i lea fa’ama’i, ia mautinoa lava o lo’o sesegi ese isumu mai o tatou maota ma laoa, aua ua mautinoa ua va’aia lava le tele o isumu ua lutia o tatou maota e uia mai uaea uila o lo’o feoa’i solo ai ma ulufia taualuga o tatou maota ma laoa, e aunoa ma se iloa e i tatou.”

 

Ua fa’ailoa mai i le vasega o foma’i manu, “Ia fa’aaoga totigilima ma tapuni fofoga i taimi e taumafai ai ona togafitia a tatou meaola ua va’aia ua mama’i. Ia taumafai ona le ulufia e siama mata, taliga ma o tatou isu i taimi e faia ai togafitiga o meaola. O le mamalu lautele fo’i, a va’aia loa ni auga ua ma’i lau fagafao, e sili lava le vave fa’ao’o mai loa i le tatou nei matagaluega mo togafitiga.”

 

“Manatua a i ai se mea o lou tino o fa’amanu’alia ma ua avea o se po’u, e ulufia fo’i e le siama lea ma ono afaina ai oe i le Leptospirosis, pe afai o e togafitia se meaola o loo ma’i, ua tutusa lelei fo’i ma se tasi o lo’o i tua i aiga ma tausia lana meaola ua fa’aauma’ia.”