Ads by Google Ads by Google

Tala I Vaifanua


Ua va’aia le agava’a lelei o le tamaitai fa’atonu o le TAOA ia Evelyn Lili’o Satele I la fo’i ituaiga o fa’amalositino i le Stronger Slimmer You. [ata: Leua Aiono Frost]

Pago Pago, AMERIKA SAMOA

 

POLOKALAMA FOU FA’AMALOSITINO A LE TAOA - “STRONG SLIMMER YOU”

 

O lo ua milo nei fo’i le to’atele o i latou ua manana’o ina ia fa’alusi pauna po’o le mamafa o le tino a le TAOA i le polokalama ua pasia lelei mai lona fa’atupega e le Feterale, le Stronger Slimmer You [SSY].

 

O lenei polokalama ua le gata ina fa’alusi ai pauna, ae ua a’oa’o ai ma sui uma o le TAOA ua aofia i lenei taumafaiga, ina ia fa’apoto i latou i ala e mafai ai ona mautu a’ia’I lou soifua maloloina lelei i lona soifuaga matua ua i ai. Ua oo i le pulega ma le aufaigaluega ua agava’a e fa’amalositino fa’atasi i le SSY.

 

“O le SSY ua mae’a pasia mai e le Vaega o Fa’atupea lenei tima’iga, o le vaega lea o le Malo Tele o lo’o toina mai ai le vaega tupe mo le fa’amoemoe ia soifua laulele tama ma tina matutua o aofia i le polokalama TAOA. Ua afua lea tulaga ona ua mae’a aiaia ma va’aia le aoga o le SSY e a’oa’o lelei  mea’ai paleni, le tausiga o lou soifua maloloina, ma ituaiga fa’amalositino e ao ina faia e fa’aafu ai le tino ma ia le so’ona mamafa ai ma vave po’ia ai matua matutua i gasegase tumau ma fa’ama’i pipisi,” o se fa’amatalaga lea a le tamaitai fa’atonu Evelyn Lili’o-Satele e tusa o le ulufale fo’i o le vasega o matua matutua i lenei fa’amalositino ma aoga tau le soifua maloloina lelei.

 

Ua fa’atulaga taimi e tolu e faia ai fa’amalositino nei i aso ta’itasi. Vasega o le taeao i le itula e 5:00am se’ia oo i le 6:00am. O vasega o le afiafi pe a manava galuega ua fa’atulaga i le 4:00 seia oo i le 5:00 i le afiafi, ma le isi fo’i vasega e amata i le 5:00 se’ia oo i le 6:00 i le afiafi lava.

 

O le polokalama fa’amalositino lea ua fa’aigoaina mo i latou: “Sa le Fo’i! Auai Mai po’o Le Fafo ma le Ma’afala!” -  “Never Give Up, Give In or Get Out!” pe a fa’aperetaniaina.

 

O i latou uma o le a totogia latou fa’amalositino nei e le TAOA e ao ina mua’i lisia pe lesitala o latou suafa i le TAOA i Pago Pago, ma ua ausia le 60 tausaga ma matutua atu.

 

Manatua e le gata ina fa’amalositino ia malosi ma e tino lelei, ae ia i ai fa’atasi ma lou iloa lelei ona tausia lou tino Ia maloloina e ala i mea’ai paleni ma ia mama i taimi uma, ia le a’afia gofie fo’i oe i omiga o le loto ootia ona ua tu’ua to’atasi. O le atoaga o nei mea uma i o tatou matua matutua o le a fa’afaigata ai ona sofa’I e gasegase tumau i latou. Lona uiga ua le maua i le suka ma le toto maualuga ma isi gasegase uma o le fatu ma le kanesa.

 

“Ua iloga mai e agava’a tele le SSY ina ia tima’ia matua matutua ia fa’amalositino ma le silafia lelei o au mea’ai paleni ae le toe naunau ai e tausami i mea’ai e maua ai i gasegase. Ua matele mea’ai ua fa’atulaga mai i mea’ai Samoa moni lava e tausia lelei ai o tatou tino i lenei fa’asinomaga,” o se tala lea a le fa’atonu o le TAOA. 

 

I le SSY ua fa’ato’a mae’a fo’i le latou polokalama mo le fanauiti na fa’atautaia mo le 4 vaiaso.

 

LA’U AFI TETELE A LE ASPA I LE ATALTELE - ASO SA, AUKUSO 16

 

Ua fa’alauiloa fa’alaua’itele e le Puleaga o le Eletise ma le Suavai Taumafa (ASPA) o le a fa’aaogaina e i latou le alatele i le la’uina mai o latou Afi Moli tetele i le aso Sa nei, mai le itula e 5:00 i le taeao se’ia oo i le 5:00 i le afiafi.

 

O lenei fa’asalalauga e ao ina faia ina ia fa’autagia mai e le mamalu lautele e feoa’i i le alatele o le tatou Malo, o le a umi se taimi e fa’aaoga ai ele ASPA le tatou alatele ona o le tetele o nei afi moli e aoga fo’i i le tautuaina o le atunuu lautele.

 

Pe afai o le a mae’a fa’amautu nei afi moli tetele ma fa’aaogaina, o le a mafai ona tautuaina ai le itu i sisifo atoa o le tatou nei motu. O afi tetele nei e tutusa lelei ma ituaiga o afi o lo’o ua mae’a fa’aaogaina mai i le tatou nofoaga o afi i le lotoa a le ASPA i Satala. O se siitaga fo’i o le galuega i le lotoa o afi i Tafuna.

 

O afi tetele nei e lima lelei o le a suia ai afi moli ituaiga o Deutz lea sa tautuaina mai le teritori atoa mai le tele o tausaga. O le taimi atoa o le a fa’aaogaina ai e le ASPA le tatou alatele mo lea galuega tele, ua fa’amalulu atu ai I le atunuu femalaga’i i alatele, ona o le a I ai taimi e poloka ai feoa’iga, ma fa’atuai ai ona e oo i le sauniga po’o se nofoaga o lo’o e manatu e te fa’atasi atu i ai. 

 

Pe afai e leai lava se mafuaga tatau e te malaga ai I luga o le alatele I lenei aso Sa, o le a matua talia ma le fa’aaloalo e le tatou pulega o le eletise, lou le I ai I le alatele i lea aso, ona o lenei galuega e fia fa’ataunuuina e aunoa ma se loto o’otia pe afaina ona o le poloka o le alatele. Fa’amalulu atu fo’i le ASPA ona o lenei fa’aletonu I feoa’iga ona o tiute fai a lenei matagaluega.

 

FA’ATAUTAIA PEA LE POLOKALAMA O LE “STEAM” 

 

O le tausaga lona lua lenei talu mai ona fa’atautaia le polokalama o le STEAM i Amerika Samoa ma ua fa’atulaga le nofoaga e fa’atino ai le tele o galuega fa’atino eseese a le fanau ua auai i le South Pacific Academy ma e oo lava ia Aukuso 21, 2020 fa’ato’a mae’a lea fa’amoemoe.

 

O le STEAM ua faatulagaina o galuega e fa’atino ma fa’ailoa ai lou tomai i aoaoga tau Saeanisi, Tekonolosi, Enisinia, Atisi ma le Matematika. O le tamaitai o Edna Noga o le ASPA lea e ta’ita’ia lenei fa’aaliga ma ua ia fa’ailoa mai e 5 lelei fo’i Kosi ua fa’atulaga mo le fanau uma o aofia i lenei taumafaiga, ma ua amata lava galuega fa’atino o le fa’amoemoe lenei I le gaosiga o se Robot, Galuega fa’atino o le Siomaga, Galuega Fa’apisinisi, 4H ma le ma le STEM i Ta’aloga.

 

O le taumafaiga lenei e amatalia lava mai le aso Gafua se’ia oo i le aso Faraile, mai le itula e 8:00 i le taeao se’ia oo i le itula e 3:00 i le afiafi. Peita’i o le fa’aaliga atoa o nei galuega uma o le a fa’atautaia lea ia Aukuso 22, 2020 i le Kolisi Tuufa’atasi. Ua fa’ailoa mai e Noga, “O lo’o matua fa’afiafiaina le fanau o lo’o aofia i lenei fa’amoemoe ona o lo’o tele lava mea fou ua latou a’oa’oina ma latou taumafai e fa’atino mai.

 

O le a aoga tele lenei fa’atinoga i le toe aga’I atu o fanau a’oga i potu a’oga ma le fa’atulagaga fou ua i ai nei mo le tausaga a’oga fou. O se tasi lava o nei a’oga sili ona fa’afiafia atili ai le fanau o Ta’aloga.”

 

“O le fanau lava lea e matua tapena i le taimi nei o i latou o le a a’e i le vasega 6 se’ia oo i le vasega 1, ae ua matele ina va’ai toto’a I le vasega 7 se’ia oo i le vasega 9, aua o le lumana’i lea o nei a’oa’oga, ia lava tapena i latou mo le tauvaga fa’aomalo i le lumana’i,” o se toe fa’aopoopo mai lea a Noga.