Pago Pago, AMERIKA SAMOA

FA’AMAUMAUGA AOFAI TAGATA I LE AFA O LENEI TAUSAGA – 57,637:

O le faitauga aofai o tagata ua nonofo i le teritori I le afa o lenei tausaga o le tausaga 2020 ua tamau mai ai le 57,637 tagata, ma o se faitauga ua pa’u maulalo lava.

O lo ua fa’alauiloa nei lea faitauga mo le afa o lenei tausaga e le Matagaluega o Fefa’ataua’iga. 

Ua mautinoa o le suiga tele ua i ai nei le aofaiga o i latou e fananau mai, ma i latou fo’i ua tu’ua i tatou ona ua maliliu, fa’atasi ai ma le taofiga o femalagaiga ona o le fa’asa o loo fa’amamalu nei a le Covid-19, ua fa’amauina ai nei se pa’u maulalo o le faitau aofai o le teritori o Amerika Samoa.

O le aotelega o pepe ua soifua a’e i le atunuu ua fa’aitiitia lea i le aotelega e 900 o i latou, ma ua siitia fo’I le aotelega o pelega ua maliliu i le atunu ile silia ma le 300 o i latou o le isi lea 1200+ o tagata ua misia mai le faitauga ua fa’amauina nei. O le to’atele o e masani ona fa’amautu mai i le atunuu ona o avanoa faigaluega ma le asiasi mai i aiga, ma le fia nonofo mau fo’i i le atunuu, o lea ua misia atoa i le faitauga lenei.

O se tala tau fa’atusatusa o lena faitauga e ao ina maua mai le aotelega o i latou e talosaga mo le nonofo mau i le Ofisa o femalaga’iga i vaiaso ta’itasi i le atunuu a’o le’i taofia femalaga’iga mai i totonu ma malaga atu i fafo a le mamalu fegasoloa’i. Ua fa’ailoa mai e tusa o le 600 se tuusaogalemu o lena faitauga i le tausaga.

O le to’atele o aiga ua toe masii atu i fafo e fa’amautu ai ona o togafitiga o gasegase tumau atoa ma aoga a le fanau ma galuega a nisi o aiga ua fa’amautu lelei i fafo.

I le taimi nei e 20,138 alii ua faamauina ae 26,241 tamaitai ua faamauina i le atunuu. O le faitauga lenei e sili lava ona to’atele i latou ua i le va o le 25 – 64 tausaga le matutua, lea ua maua ai le aotelega e 26,501 tagata ua I ai.O le vaega e 19 – 24 tausaga e 5,140…O i latou fo’I na ua mafai ona palota. 14-18 tausaga e na’o le 6,464 ma le 6-13 tausaga ua maua ai le faitauga e 9,976.

MAE’A TIMA’IA MATUA SILAFIA ALA O A’OGA FANAU – FAGAITUA HIGH

Ua faailoa mai e le vasega o faia’oga uma sa galulue ina ia matua mautinoa e matua le fuafuaga fa’ataoto a Fagaitua High e fa’atautaia ai a’oga ia Aukuso 31, “Ua sauni matua e feso’ota’I ma faia’oga ma latou fanau i potu aoga.”

O se fiafiaga sili lea i le vasega o faia’oga galulue aua ua mae’a lelei ona fa’asolo i tua i afio’aga uma ua lisia fanau a’oga i Fagaitua. “Ua iloa e i latou e i ai le sootaga o i latou ma taimi o vasega a latou fanau i potu aoga, ae maise fo’i o aoga a latou fanau mai tua i latou aiga. O aso e fa’atulaga ai lea suiga i a’oa’oga ua latou iloa lelei, ae maise fo’i o ala e feso’ota’i ai ia mafai ona latou siakia togi o latou fanau,” o se tala lea a le tamaitai sa fa’auluulu i ai le polokalama lenei mo matua ina ia soofa’atasi ma aoga a latou fanau, ma ala o le a fa’atautaia ai i le isi tausaga a’oga fou.

Ua fa’aigoaina lea sootaga fa’aupega tafa’ilagi o le Google Classroom Zoom, ma o le itulau lea e feso’ota’i ai matua uma ma latou fanau ma faia’oga i le potu a’oga ma latou vasega fo’i o le a fa’atautaia mai tua i latou aiga.

I le taimi fo’i o le a fa’atautaia mai ai vasega mai tua i aiga, o le a mafai ona fa’alogologo matua i vasega a latou fanau o fa’atautaia ma latou faia’oga, ae maise o le a mafai fo’i ona siakia e i latou vasega a latou fanau a’o fa’atautaia i potu aoga ma latou faia’oga, e ala i lea lava sootaga.

E lua lelei vaiaso o fa’asolo a’oa’oga fa’apitoa nei mo matua uma o fanau a’oga i le a’oga maualuga a Fagaitua. Ua masii uma lava faia’oga ina ia latou fa’ataunuu nei taumafaiga ma tufatufaina ai fo’i tusi pasi o matua uma sa fa’aalu o latou taimi e mautinoa ai ua latou iloa nei ala e fa’atautaia ai a’oga a le fanau mai aiga ma totonu o potu aoga.

“Ua mae’a iloa e matua taimi o le a nonofo ai fanau ma faia latou meaaoga fa’atasi i le fale, ma aso foi o le a o ane ai i le a’oga mo latou vasega. Ua mae’a iloa lelei ua mafai ona latou iloa siaki togi o latou fanau. O le tele o nei mea uma ua fa’aaogaina ai lava le sootaga fa’ainiteneti,” o se tala fiafia lea le tamaitai pule o le polokalama feso’ota’i ma matua.

“E le gata i lea ae ua iloa lelei e i latou e ao lava ina lavalava lelei le fanau ma sauni mo latou aoga i taimi Masani o a’oga I aso ta’itasi, ma e pei lava ua faia a’oga i potu aoga i aso o le a nonofo ai mo vasega i le fale,” o se tala lea a Jose Afu Muasau.

LEAI SE MALAGA A LE “MV FOTU O SAMOA” MAI APIA I LE VAIASO UA TE’A

Ua fa’ailoa mai e le Kamupani Va’a a le Polynesian Shipping i Fagtogo mo le mamalu lautele o le atunuu, sa leai se malaga fa’apitoa mai a le MV Fotu o Samoa i le tatou atunuu i le vaiaso ua te’a.

Ua lipotia mai i le fa’aiuga o le vaiaso ua te’a, ua i ai le fa’aletonu i le isi enesini o le va’a lea, ma ua le mafai ai ona fa’ataunuu mai lana malaga sa fuafua e faia i le va o Apia ma Fagatogo.

Peita’i ua toe siakia atu nei fo’i i le tatou ofisa autu o le Polynesian Shipping e le o fa’amautu mai lava se tali i lea fanoga mai Samoa, o lona uiga, o uta uma sa tuu e aumaia e le malaga o le vaiaso ua te’a, e le o mautinoa fo’I pe oo mai i lenei vaiaso.

O loo I ai le isi fuafuaga e mafai ona faia e le Samoa Shipping, aua o lo’o i ai le “MV Lady Naomi” e mafai ona sau, ae mafai fo’i ona fa’aofi uma i ai uta o vaiaso e lua a le “MV Fotu o Samoa” ona tau agatonu ai lea ona sau le Lady Naomi i lenei vaiaso e fa’aoo mai uta a tagata ma pisinisi ua mae’a totogia e fia aumaia mai Apia i Pago Pago nei.

Ina ua vala’au atu mo se tali mai a le Ofisa o Va’a a le Polynesia Shipping, ae ua fa’ailoa mai, “E le’i oo mai se tali o se fuafuaga mautu o le a faia e le Kamupani Va’a a le Malo o Samoa, peita’I e mautinoa lava atonu e i ai se malaga e sau I lenei vaiaso, ae fa’ato’a mautinoa lava i le aso po’o taeao lea tulaga. Pau o le mea mautinoa, e lei lelei le Fotu o Samoa i le vaiaso ua te’a.”

MAUA TINO MALIU ALII FAGOTA - UAFU O VA’A STAR KIST

Ua fa’aauau pea suesuega i se afuaga na maliu ai se tasi o ali’i fagota mai Indonesia e maua a’e ua maliu i le sami i le nofoaga e taula ai va’a a le Kamupani I’a a le Star Kist Samoa i Satala.

Na maua le tino maliu o lea ali’i fagota i le aoauli o le aso Lua na te’a nei.

Ina ua fesiligia nisi o lana auva’a, peita’i sa faailoa e nisi o le latou auva’a, sa mulimuli va’aia lea ali’i fagota i luga o le va’a e fagota ai i le po o le aso Gafua, peita’i o le taeao loa o le aso Lua ua le lipoti ane o ia e faigaluega.

Na sailia o ia i nofoaga lava e faigaluega ai i le Uafu e taula ai va’a e le’i maua ai, peita’i ina ua fa’afaigaluega nisi e maulu e sailia lona tino, ona fa’ato’a maua a’e lea i le nofoaga lava e taula ai va’a fagota.

Ua faailoa mai, “Sa maua atu lona tino i lalo ane o le va’a o lo’o taula i le Uafu o Va’a Fagota a le Star Kist.”