Pago Pago, AMERIKA SAMOA

MIFI SUIA AI LE WIFI - INA IA MAUA SO’OTAGA & TAGATA SOO SE NOFOAGA FHS:

O le polokalama ua fa’aaogaina nei e le Aoga Maualuga a Fagaitua mo a latou taumafaiga ina ia mafai ona malamalama lelei matua i le ituaiga faiga o le a fa’atautaia ai a’oga a le fanau a’oga ma suia ai e i latou le WIFI i le MIFI.

O lona uiga o le so’otaga fa’ainiteneti ua mafai ona fealua’i solo ona ua fealua’i fo’i le tagata ma lana sootaga lea.

Fa’ailoa e Jose Afu Muasau, “Ua mafai ona sainia se feagaiga a le ASTCA ma le matou polokalama i le a’oga maualuga i Fagaitua ina ia matou feoa’i ma matou rauta nei e mafai ai ona fa’aaoga e le 15 masini komipiuta i so’o se nofoaga lava e fia fa’aaoga ai. O le afuaga lea o le mafai ona matou feso’ota’i ma matua uma lava i nuu sa matou faia ai matou folasaga mo matua, ia iloa lelei feso’ota’i ma potu a’oga o le fanau ma fa’alogologo i lesona a latou fanau ma faia’oga.”

Ua le gata i lea, ae ua ese fo’i lona tau fa’apitoa e tuuina atu mo lea ituaiga o tautua ma so’otaga fa’ainiteneti mo le mamalu lautele. Ona o le to’atele o aiga e le’i feso’ota’i la ma le tautua lenei a le initeneti o latou falenofo lea e faia mai ai meaa’oga a latou fanau, ua faliu ai fo’i le Aoga maualuga e fa’afeso’ota’ia ni nofoaga fa’apitoa mo le taumafaiga, ia le maumau le avanoa lelei mo fanau e faia ai latou meaa’oga e fa’aaoga ai le initeneti ona o lo’o le feso’ota’i latou fale ma initeneti.

Ua taumafai fo’i e talanoa i le ASTCA i le tau o lea auaunaga, ina ia mafai ona fa’afeso’ota’ia ai e aiga latou fale ia fa’aaoga e latou fanau i meaa’oga. Pei e sili atu ona e fealua’I ma lau rauta ina ia maua ai lava lau sootaga ma le initeneti nai lo le tau totogi na’o le fale mo lea auaunaga, ma e te alu ese loa mai le fale ona motusia loa lea.

O le isi tautua ua tatau ona toe fa’aa’e, o le maua lea o le so’otaga a le initeneti i le telefoni fe’avea’I e pei ona Masani ai. Ua matele ina faia e le tagata le auaunaga lea e fa’aigoaina o le Data, ae ua le mautu le auaunaga ina ua suia mai le pulega o le ASTCA na le toe fa’aauau ai ona faia lea auaunaga, ae sa ta’i $30 i le masina atoa.

O le taimi lenei e tatau ai i le tatou kamupani telefoni ma initeneti ona latou fa’avasega mai ni latou tau taugofie mo le mamalu o aiga uma ina ia mafai ona lava le fa’asoa o le tamaoaiga tausi i totonu o le aiga.

Peitai ua fa’ailoa mai e le vasega o faia’oga, a mae’a le latou fa’aaogaina o le MFI mo vaiaso nei sa tuuina mai ona maua lea o le isi latou 6 masina e fa’aaoga ai le MIFi mo mea’aoga a le fanau i Fagaitua ae fa’atautaia mai I nofoaga nei ua atofaina e i latou e fa’atutu ai le latou rauta.

I le taimi nei ua fa’ailoa mai e le matagaluega o a’oga, o le a latou tufatufaina mai masini Komipiuta, poo Ipad, tusi chrome, tablets mo le fanau a’oga e leai ni masini fa’apea i o latou aiga, ma o le a maua fo’i le sootaga MIFI ina ia fa’aaogaina e aiga e leai ni initeneti i o latou fale.

“O lo ua fa’ailoa mai i lenei tausaga i a’oa’oga a le fanau a’oga uma, ua fa’atautaia ia soso’o fa’atasi le aoga i potu aoga e fofoga ma fa’atautaia e faia’goa, ma a’oa’oga i le Initeneti lea e fesootai mai i luga o masini komipiuta poo telefoni, ipad, tusi chrome ma tablets,” o se faamatalaga lea a le tamaitai o Faugagana o Fagaitua High.

AUGA VA’AIA ILOGA O’OTIA LAGONA –  A’APA ATU & FESOASOANI IA FA’AOLA

Ua augani mai nisi ua nafa ma fesoasoani e tuuina atu ia i latou ua o’otia lagona ma ua fa’asolo atu ina manatu i latou, ua sili ai le oti nai lo le ola pea, “E i ai auga e va’aia gofie, e iloga ai i latou ua ogaoga mafatiaga, ma ua tatau ai ina e a’apa atu ma e fesoasoani ia i latou, ao le’i maumau le soifua.”

O le toe fafagu la lea i tagata uma, ina ia va’ai toto’a i nei auga, ma latou faia se galuega alofa e faasao ai se soifua o se tasi.

“Ia e matua nofo lelei ma fa’alogo i ona pagatia, ia fa’ailoa atu i se foma’i tau le mafaufau, ma nisi o e faufautua fa’apitoa, ina ia latou toe fa’afo’i i lea sui lona lagona alofagia ma e taua fo’i lona tagata i taimi uma.”

Ua fa’ailoa e Jueta McCutcheon o le Falema’i a le Veterans Affairs, “Ua i ai laina telefoni e mafai ona fa’auia i ai lau talosaga ina ia fa’ao’o ane se fesoasoani fa’avave i so’o se tasi ua e matauina o o’otia ona lagona.”

O nei laina o feso’ota’iga ua fa’aloa mai 252-3502; 699-4211 ma e matala lava mo le 24 itula o le aso atoa I le fitu aso o le vaiaso. 

Ua faato’ai mai lenei taumafaiga i ala o fa’asalalauga fa’alaua’itele i le mamalu lautele o tagata uma i Amerika Samoa ina ia nofouta ai tagata uma, “O lo’o i ai le fesoasoani, pe afai o le a tatou va’ai toto’a i uiga o tatou uo, e iloga ua a’afia o latou lagona pe afai ua le fiafia fa’atasi ma outou e faia mea e Masani ai. Ua matele ina le fia auai fa’atasi ma outou, ma ua le foliga fiafia i taimi uma ae ua pei e aualofa ma ua le talatalanoa ma outou ana uo masani.”

FA’AILOA KOVANA MAFUAGA AVE’ESEA O TAGATA A LE FEMA

O le fonotaga a le Kapeneta i le aso Gafua na fa’ailoa ai e Kovana Lolo Matalasi Moliga mafuaga o le ave’esea atu o tagata faigaluega a le FEMA mai le teritori.

“O le mea sili ona faigata ona soloia, o le mau a le Matagaluega o le Soifua Maloloina ina ia taofia sui na malaga mai ia nofova’ava’aia ona o lo’o tele setete o Amerika sa malaga mai ai nisi o i latou,” o le saunoaga lea a le kovana. 

“Ina ua va’aia e malaga mai se tasi o nei sui faigaluega mai Florida agai ane i Dallas, sau ai i San Francisco, oo mai ai i Hawaii ma fa’ato’a oo mai ai i Amerika Samoa, o setete uma lava o loo faifai tetele ai le fasi a le Coronavirus, e le o mama ai le mau a le DOH ina ia taofia i latou nei e nofo va’ava’aia mo le 14 aso, ia mautinoa o lo’o mama i latou mai lea verusi,” o se isi lea fa’amatalaga Lolo.

“Na fa’aalia le taofi o le ta’ita’i o le FEMA e talia e i latou le nofo va’ava’aia o latou sui faigaluega i le 3 i le fa o aso, ae tatala i latou e faia latou galuega, ae le o le 14 aso, ona o le mana’omia fo’i ona fa’amae’a latou galuega iinei. O le talanoaga lenei e fa’ato’a uma ane ua latalata i le tulua o po ma ao o le aso Tofi, peita’I e le’i sologa lelei lea fo’i feutaga’iga.O Robert Fenton o le Ofisa Ulu o le FEMA lea sa matou feutaga’i.

Na toe vala’auina e Lolo le isi talanoaga ma le ali’I fa’atonu o le DOH ma le to’alima o foma’i ina ia toe feutaga’i se suiga mo le aufaigaluega a le FEMA, peita’i e le’i mafai ai lava ona matu’u mai se suiga a le DOH, i lea mataupu.

I le aso na soso’o ai na fa’afeso’otai e Lolo le Sui Failautusi o le Initeria Doug Domenich ma le Fa’atonu o le OIA Nikolao Pula e faamatala aiai i ai le fa’amoemoe maualuga o Amerika Samoa ina ia le oo mai lava le Coronavirus i le atunuu, ma o lo’o mamafa lea pitola’au i le matagaluega o le Soifua Maloloina.

“O le afuaga lea e le maluelue gofie ai le mau a le DOH i le nofo va’va’aia o tagata uma ua nonofo nei i Amerika Samoa,” o se tala lea a Lolo. 

“Ina ua mae’a ona fefa’asoa’i manatu o i matou ma le Initeria i ona taitai sa talanoa i ai, ua silafia nei e i latou, o lo’o i ai le auala o lo’o feagai ma fa’atino ai e le tatou matagaluega o le soifua maloloina le puipuiga malu o le atunuu mai le fa’ama’I ina nei oo mai, ua fai si eseese mai le malo tele ma ona setete. Ua matua taumafai i tatou e aua lava ne’i ulufale mai lea fa’ama’i. E le taitai ona lava le 150 moega ua i ai nei i le falema’I e gafatia ona fa’ataotolia ai le anoanoa’I o nisi e pesia ma tau togafitia mai le covid-19.”

Na fa’afetaia e Lolo galuega a le DoH i a latou fa’aiuga fai ina ia mautinoa lava e le oo mai le Covid-19 i le atunuu.