Pago Pago, AMERIKA SAMOA

SAINIA O LE PEPA – FINAGALO TATAU ONA FA’AFOI MAI TATOU TAGATA

Ua mae’a fa’asalalau ina i upega tafa’ilagi a le facebook ma isi so’oaga fa’apena le tusi fa’atauanau a i latou ua auai i le taofi e tatau ona toe fa’afo’i mai o tatou tagata o lo’o toe fia fo’i mai i aiga,ae ua taofia i fafo ona o le fa’asa o lo’o faia nei a le Covid-19.

E oo mai i le aso Faraile ua te’a ua atoa le 385 o i latou ua mae’a saunia lea pepa fa’asalalau, e aga ina ia avea ma tamau olo’o ua to’atele nisi e manatu ina ia faia lea tulaga e le Malo, fa’afo’ia mai lea o tatou tagata o lo ua toe fia fo’i  mai i aiga.

I le tusi ua fa’asalalauina, “Ona o lo ua auaufa’atasi ma i latou ua opea i fafo atu o le atunuu ona o le taofiga o femalaga’iga talu oe Covid-19, ua matou fa’ailoa atu ai i o tatou ta’ita’i o le tatou malo, “Aua ne’i avea le tatou atunuu ma se malo e le fa’afo’ia maia o tatou tagata i fanua.Aua fo’I nei fa’amauina i lo tatou tala fa’asolopito, ua na’o Amerika Samoa lava le malo ua le manatu e toe fa’afo’I mai o latou tagatanuu i o latou eleele ona o le Covid-19.”

Ua fa’alauiloaina lea fa’alapotopotoga o tagata o le “Tagata Tutufa’atasi Allieance  Amerika Samoa.”

O i latou o lo’o a’afia ai, ua latou fa’ailoa mai, Ua umi tele ona taumafai e fa’aaoga latou pasese ua mae’a totogia, lea ua tolopo so’o a latou malaga i va’alele. O le to’atele lava sa malaga mo talavai, o nisi sa malaga ona o fa’alavelave tau i aiga, o nisi o a latou malaga asiasi i fanau ma aiga i fafo, a’o nisi na malaga fa’apitoa mo galuega.

“O le ono masina ua mae’a atu o taofia pea femalaga’iga ma ua a’afia ai le lagona toe fia fo’i atu lava i aiga. Peitai ua fa’aauau pea lava, ua foliga o se ma’i foi e leai se vaifofo i lagona ma loto. E ui foi ona e le o i ai se Coronavirus i Amerika Samoa ae o lo’o fa’aauau pea ona masa’a atu le Cares Act ma isi fa’atupega o le Covid-19 i le tatou teritori, ina ia fa’aauau galuega fa’asao pe puipuia mai le oo atu o lea fa’ama’i leaga i le atunuu.” 

Ua latou fa’ailoa, e i ai nisi o lo’o mautu nofoaga e nonofo i le taimi nei, peita’i o le to’atele lava, o lo’o tulaga fa’aletonu.

“Ua mautinoa o lo’o ua taumafai lava nai aiga i lenei umi o le taimi e nonofo ai ma latou, ae ua faigata le olaga i so’o se vaipanoa ona o le Covid-19, e sili lava i o tatou aiga iina e faigofie ona maua le tausiga o le soifua ma e le taugata tele le olaga e pei o nei atunuu. E le o fa’asea fanau ma aiga, ae le mafai e iloa lava e le tagata le ootia,” o nisi na o fa’amatalaga ua fa’alauiloa mai ai.

Ua latou talosagaina fo’i pe ua le tatau ai ona fesoasoani atu le CARES Act mo tagata Amerika Samoa o lo’o taumafai e nonofo i fafo ma faia talavai ona o le Covid-19, ua le mafai ona taliu mai i aiga.

“Ua mautinoa e le’i maua i matou i le Covid-19, ae tauau e maliliu ona o le a’afiaga o le loto ma le mafaufau ua mamafa ma saputu mai nei fa’afitauli talu ai le fa’asa ona toe taliu atu i le tausiga e masani ai i Aiga.”

O le fa’apotopotoga lea ua latou talosaga fa’atauanauina o tatou taitai ina ia tafa le finagalo e faia ni malaga fa’apitoa mo i latou. 

“Tasi pe lua malaga i le masina, fa’atasi ai ma le fa’amamaluina pea o mea uma o le fa’asa i le faia o tui ma nonofo i le nofova’ava’aia mo le 14 aso, e mautinoa lava e mafai ona fa’asaoina ai Amerika Samoa i lenei fa’ama’i.”

O le uepesite a lenei fa’apotopotoga ua fa’aigoaina – “Tagata Tutu Fa’atasi Alliance o Amerika Samoa”.

TINA O LE PAE & AULI – SE VAIFOFO O FA’AFITAULI?

O le fa’afaletui a Tamaitai na usuia i le aso Lulu ua te’a i le Gov. Rex Lee Auditorium, lea na tapena e le Pae ma le Auli e va’ava’alua ai ma le Alliance Against Domestic & Sexual Violence, sa matua fa’atumulia i fautuaga lelei, e taumafai ai ona so’otaga tiute fa’atina ma le vaifofo o fa’afitauli i mafutaga i totonu o aiga, ma so’o se mea lava e fa’atasia i ai nit agata e to’atele. 

Sa i ai fo’i le so’otaga o lenei fa’amoemoe ma le Fetulima Aputiputi Counseling Program, e agaga uma lava i le taumafaiga e soloia a’afiaga o lagona i tagata ae maise i taimi o mafatiaga ogaoga o le loto.

O le taumafaiga ina ia maua se to’a ma lagona saogalemu i taimi o le fevesia’i o lagona mafatia, taimi o o’otiaga fa’aleituaiga o lagona ma sauaga i totonu o mafutaga faaleaiga, ua sili ai i nisi le mou ese atu ona o le maasiasi.

E mautinoa le mea lenei, “O le tina sa fa’auia mai ai le ola a le Atua i le tagata soifua, o ia fo’i ua i ai auupega uma mo lea taua “fa’aleagaga o le ola O ia o le fa’afailele tofia, o le tausitama ma le ta’ita’itama.”

E le faigofie le matata lea, e tatau ona fa’aauuegaina tina uma mo lea tofi ma ua le sasi ai lava le utaga mamao ma le tofa loloto ale atunuu ina ua latou fa’apale le tina i le tofi “Auga Fa’apae” i totonu o aiga potopoto. O fale e tua i ai faletetele o lo’o soalaupule ai le tofa ma le moe i totonu o aiga tetele, potopotoga a fa’afaletui o Ali’i ma Faipule o afio’aga ma Itumalo. O tausi Ali’i e fautuaina tula malolosi o afioaga, ae maise o le latou upega faalagi “pae ma le auili” i totonu o aiga. O i latou fo’i o fautua tofia,” o se malelega lea a le afioga Leiataua Leuga Turner i lana tima’iga i le fa’afaletui a Tina.

“Aua nei galo, o tamaitai po’o tuafafine o le I’oimata uliuli lea i mata o latou tuagane i le fa’avasegaina o le Aiga Samoa. O le auga o mea lelei uma ma le matagofie i lona aiga, e fa’asifo i ai mea uma e fa’atino e latou tuagane, aua o se ipu ma’ale’ale lea e ao ina fa’apelepele ma fa’afailele e aiga.”

Ua tetele mai fo’i le fa’afitauli, ua so’ona maumau le ola talavou ona o lagona ua omia, ae o lo’o fia maua e nisi e to’atele le ola faafualoa a’o malosi le tino.

“Tulai mai tina, o lo’o ia i tatou ma lea meaalofa o le aumaia o le soifua i le lalolagi, ia tatou fa’afailele ma fatufatu mea lelei uma mo le soifua laulelei o fanau, ia tatou malamalama lelei i le tatou tofi o le fa’afailele o i latou se’ia latou iloa lelei lo latou ala o fa’amanuiaga mai le Atua. Ia ta’ita’i tama ia i latou ma malamalama i fa’afitauli e fetaiai ma i latou i le ala.”

“Poo a fo’i mea e feagai ma le fanau ona o fa’aiuga ua latou faia ua sasi, e fa’aaogaina lelei e le Atua nisi o sese e aumaia ai manuia e le matineia e se tasi i le lumana’i. Aua nei va’ai le talavou tama’itai ua vave ona ma’itaga i le olaga talavou o se mea matua leaga tele lea, ae ia silafia lelei, o lou avea ma se tina o se pepe fou o se mea sili ona taua mo le ola fou ua foa’iina e le Atua ia te oe, a’o e talavou. Ia a’oa’oina lelei lou tamaitai talavou, ua fai oe ma tina e fa’ata’ita’i i ai nisi i lona tausitama lelei, ta’ita’itama lelei ma e onosa’ia ona fa’afailele lou tofi ua e maua.”

Na tula’i fo’i le tina o le atunuu Cynthia Moliga mo lona sao,sa ia tima’ia ai le galulue faatasi o nei fa’alapotopotoga ua mae’a fa’ailo a latou manulauti tau’ave, e fa’atutu i mafutaga i totonu o aiga ma isi fa’apotopotoga uma, “Ia ausia le sini autu o latou auaunaga, taofia ai le tele o fa’afitauli o aafia ai le fanau talavou, o le maumau o le ola, vave ona ma’itaga, sauaga i totonu o aiga, fa’ataumaoia o fanau e lei uma ai pule a matua ma isi uma. Aua lava nei outou fa’avaivai, ia faia le so’otaga ma ia fa’ataunuu le tautua mo le fanau a’afia o le atunuu. Fa’afetai i la outou tautua mai tausaga e tele, ele maumau lo outou tautiga i galuega lelei.”