Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA

 

LE’I TOE TA’UA SE MALAGA FA’APITOA - VA’ALELE HAWAIIAN AIR MO PASESE FIA MALAGA MAI

 

Talu mai le fonotaga i le Aukuso 30, 2020; lea sa tofia ai ma se komiti fa’apitoa latou te fa’atulaga ma tapena ala e mafai ai ona tuufa’atasia mai ni malaga fa’apitoa e toe fa’afo’ia mai ai tagata uma o Amerika Samoa o lo’o opea i le Iunaite setete ona o le fa’asa o le Covid-19, e le’i toe fo’i ane lava lea Komiti tofia ma se tonu lelei mo lea fa’amoemoe i isi fonotaga um ana faia a le Komiti o le Covid-19 i le vaiaso ua te’a.

 

Ua va’aia i luga o so’otaga i ala fa’salalau i upega tafailagi a le facebook, ua le fa’atali tagata sa i isi setete, ae ua amata ona malaga mai i Hawaii e nonofo faatali ai fo’i mo se tapenaga o latou avanoa e malaga mai ai pe a faia se malaga a le Hawaiian Air.

 

E tusa ai ma le saunoaga a Motusa Tuileama Nua, “O le faigata ona fa’amautu o lenei fa’amoemoe o le mautinoa lea ua mae’a faia uma tui suesue o le Covid-19 a i latou o le a malaga mai, tolu aso a’o le’i malaga mai. ma ia mautinoa fo’i o le a puipuia lelei i latou mai le toe a’afia atu i lea ma’i pipisi a’o le’i tuuva’a ese mai le va’alele.”

 

“E le faigofie ona fa’atino lea ituaiga o mea pe afai o lo’o vavamamao nofoaga o tagata uma nei e fia malaga mai, ma ua le nonofo i se mea nofoaga va’avaaia lelei, a’o le’I tu’ua e i latou le malae va’alele i Honolulu. E tele na’ua le galuega e tatau ona fa’atino i Honolulu ma e ao ina totogia lea vaega atoa e le tatou malo, i vaega tupe ua mae’a taua’aoina mo i tatou.”

 

“O i latou uma o le a mafai ona malaga mai i lea malaga, e tatau ona i ai fa’atasi i latou i le malae va’alele i se taimi patino e tasi, ina ia fa’atautaia a latou suega i se taimi e tasi ma maua le fa’aiuga o nei suega o le Covid-19 i se taimi talafeagai ma le tu’uva’a ese mai o le va’alele mai Honolulu.”

 

I le taimi nei, ua galulue fa’atasi le Matagaluega o le Soifua Maloloina, le pulega a le LBJ Medical Center ma le Ofisa o Foma’i a le Veterans Association ina ia fa’ataoto lelei le fuafuaga e mafai ona fa’aoo i le Kovana sili ma pasia lelei mai ai e fa’atino. O le aso Tofi nei lea ua manatu e tatau ona fa’ata’ita’ia ai lea fuafuaga fa’ataoto mo le malaga fa’apitoa lea.

 

O le a fa’ata’ita’ia le tautuaina o le pasese e to’a 300 e ao ina malaga mai i lea aumalaga, ma o le a fa’aaogaina uma lava vaega o Ofisa e ao ina tofu tiute e fai i le to’ai taunuu mai o lea to’atele o le pasese. Ia oso tatau fo’i le matagaluega latou i le latou taimi e tatau ai mo le suesuega a’ia’i o le aumalaga pe le o sao mai ai lava se tasi o ua a’afia I lea gasegase.

 

Ua fuafua e fa’ata’ita’ia lea fuafuaga fa’ataoto mai le itula e 6:00 i le afiafi se’ia pa’ia le 11:30 i le po o le aso Tofi nei. Ua amata mai le faataitaiga i le to’ai taunuu o le va’alele, faia suesuega,i le malae va’alele ma fa’asolo mai i le nofova’ava’aia ma latou fo’i tautua o i ai.

 

O lo ua fa’ailoa atu i nei sui totino o le Komiti mo Malaga fa’apitoa mi Hawaii, ia mua’i fuafua toto’a pe alagatatau ona fa’ataunuuina nei malaga pe leai Afai e tatau ona faia, ia latou fa’atulaga mea uma e ao ina faia a’o le’I tu’uva’a ese mai le va’a ma le aumalaga mai Honolulu, ma le galuega e faia i le to’ai taunuu mai i Amerika Samoa nei.

 

TAOFIA E LE HAWAIIAN AIR ONA TOTOGI SUIGA O NOFOA & ASO MALAGA AI

 

I le aso Lulu na te’a ua fa’alauiloa fa’alaua’itele mai ai e le Pulega a le Hawaiian Air nisi o suiga e ao ina nofouta i ai i latou uma e fia malaga i faigamalaga i le ea e ala i latou va’alele uma e aofia ai ma malaga mai i Amerika Samoa i le lumana’i.

 

O le aso Tofi na te’a ua fa’amalosia ai nei le toe totogia o se suiga e faia i le aso e te malaga ai pe o le suiga fo’i o sou nofoa i luga o latou va’alele mo femalaga’iga.

 

“Ua manatu le pulega ma le aufaigaluega, ia faia e le tagata lana fa’aiugaiI le aso e fia malaga ai, ma fesuia’i sona nofoa e fia alaala ai i so’o se taimi ua ia filifili e fia asiasi ai i Hawaii mo sana tafaoga, ma ua le tatau fo’I ona toe totogia se suiga ona tautua a le tatou Kamupani Va’alele.Ua I ai nisi ua latou faaaogaina latou maila e totogia ai suiga o latou nofoa ato ai aso patino e malaga ai. Ua taofia nei lea mea, ae fa’asao fo’i au maila malaga e fa’aaoga tatau e fesoasoani ai i le totogia o pasese ma nofoaga e aumau ai.” O se saunoaga fa’apitoa lea  ale alii CEO o le Hawaiian Air Peter Ingram i le vaiaso lava fo’I ua te’a, ua matele ina fa’alauiloa mai e isi kamupani va’alelel tetele o lo’o tautuaina le Iunaite Seete ma atunuu masani o lo’o latou feso’ota’I ona o femalaga’iga i lo latou va.

 

NOFOA MA KESI A’OGA - E LE’I TAUNUU MAI LE OKA

 

I le aso Tofi talu ai na matauina ai i le a’oga tulaga muamua sili ona to’atele fanau a’oga o lo’o a’oa’oina a, Tafuna Elementary, e le’i to’ai taunuu atu lava kesi ma nofoa na talosagaina mo le amataga o aoga i lenei tausaga a’oga fou. Peita’i, inau a fesiligia fo’i le tamaitai Fa’atonu o A’oga, Dr Ruth Matagi-Tofiga e tusa o lea mataupu, ae fa’ailoa mai ai, “Ua kiliva mai nei e le DOE le 200 o nfoa ma laulau e 50 mo le taimi nei ua tatalia ai pea le maea kiliva maia o le oka a le Matagaluega o A’oga ua mae’a ona taua a’aoina atu Ia i latou e sapalaia mai i le Faleteu Oloa a le Matagaluega ma kiliva mai ai loa.”

 

Ua fa’ailoa mai e to’atele naua fanau a’oga ua le fa’amautu i se kesi ma le nofoa, aua ua to’atele f’oi le fanau a’oga ua ulufale i lea aoga i lenei tausaga aoga. O le tele o nofoa, ua leaga, peita’i ua fa’aaoga pea, ae ua iloga mai ua i ai totoga o nofoa ua leaga e ono a’afia ai le fanau pe a fa’aaoga pea.

 

Peitai, ua va’aia le amata ona tauofo o le sapalaia o le ASDOE i laptops, Ipads, chrome books ma tablets i le taimi nei, ma ua iloga ai e le’i faia se fa’atauga, ae o lea ua a’e a’oga. O lona uiga, e faatoa maua mai nei mea e fia fa’aaoga e le fanau a’oga, ae ua toe malolo atu tamaiti mo le kuata muamua o le tausaga a’oga pe laki mai i tulaga o fela’ua’iga o oloa ma le cargo i le atunuu.

 

Ua fa’ailoa fo’i e le fa’atonu o a’oga, “Ona o le tele o le aofaiga o le Oka e ao ona faia e se kamupani o le a nafa ma lea kone karate, o lea ua le mafai ai ona fa’atauina mai e se kamupani e pikia e le matou matagaluega, e ao lava ina tauofo. Ma e fa’atau mai lenei fa’atauga mai fafo i le Malo tele. E le mafai fo’i ona fa’atau maia i se Kamupani Korea, ae o oloa uma nei e ao ina fa’atau mai o oloa gaosia i le Malo o Amerika.

 

Ona o lo’o vaevaeina vasega i a’oga ta’itasi e fa’aaogaina le lotoa i aso ta’itasi, e aofia ai le aoga tele lea a Tafuna Elementary, o lea ua fa’ailoa ai, o le a leai lava se taimi e toe o mai atoatoa ai le faitauga o le fanau a’oga ma vasega uma i le a’oga i se aso a’oga e tasi, o le a fa’aauau ai pea ona fetogia’I fa’apea aso a’oga mo vasega o aofia i aoga tetele tulaga muamua ma aoga maualuluga. Peita’i o le amataga lenei o le faiga fou o a’oga o le a alu ai lava fa’apea. Ua na’o aoga tulaga muamua lava ma a’oga maualuluga e le to’atele na’ua fanau a’oga o aofia ai, e faia atoatoa latou a’oga i aso uma o le vaiaso.”

 

Ua fa’ailoa mai fo’i e le fa’atonu o a’oga, o lo’o tatalia lava fo’i e faiaoga lo latou totogi e tusa ai o le a latou vasega na fa’atautaia ina ia mafai e i latou ona amatalia le “aoga tautai lua” lea ua fa’atautaia ai nei a’oa’oga. A’oga i Potu aoga ma a’oga i luga o laina feso’ota’i a le Initeneti.O nei totogi e toina mai lea le saoga a le ASDOE mai le Covid-19.”

 

“Ua toe lava o le totogia mai o faia’oga, ae ua mae’a fa’agasolo ese mai e le ASDOE le latou vaega fai mo totogi nei o faiaoga e fa’aaoga ai le latou saoga mai le CARES Act e $45 miliona.”