Ads by Google Ads by Google

Tala I Vaifanua


Le faletua o Sylvia Imeleta Mauga i lana molimau i lona to’alua fa’apelepele, le tofa ia Matagi M. Mauga i ona toe sauniga. [ata: Leua Aiono Frost]

Pago Pago, AMERIKA SAMOA

 

TUUAMALO LE MALO - MATAGI MALOTUMAU PALEPOI SIALEGA MAUGA

 

Na fa’atumulia le malumalu EFKAS i Aua i le toe sauniga o le susuga le Ti’akono, a’o le tofa Matagi, Malotumau David Mauga, i lona aiga, peita’i o lea fo’i sa se’ei i le nofoa o lona itumalo Sua #2 mo ni nofoaiga e lua o le Maota o Sui o le fono faitulafono a le tatou malo.

 

O lona toe sauniga sa ta’ita’ia lava e lana fa’afeagaiga taulagi Rev. Viliamu Leilua o le EFKAS i Aua. O ia fo’i lea sa ia fa’au’uina le tofi Tiakono o le tofa Matagi ma le tausi Sylvia Imeleta Sonoma Liufau, o Aua ma Afonotele.

 

Sa molimau Sylvia i le sauniga, “O Davey o se tasi sa ou malu ai i taimi uma, i o’u aiga ma so’o se mea ma te fa’atasi i ai. Ou te fa’atuatuaina o ia  aua ua iloa lelei lona alofa ma le fa’amaoni ia te au. Ou te fa’afetai i le Atua ona o se meaalofa sili ua ou maua i lenei olaga, ua ia tuuina mai e ma te Mafuta ma soifua fa’atasi o se aiga.”

 

“O ia o se tasi e soifua fiafia, e leai ma se taimi e iloa ai e ia ona fa’amisa pe feupua’i ma se isi. E fai fa’aiuga lelei, aua e magafagafa i mea uma e a’afia i sona manatu fa’aalia. O se tasi e agaga e fa’atino galuega lelei, e matua osi aiga lava, e fai tonu lelei fo’i, aua e mama lava ona manatu.”

 

“Na  ma fa’aipoipo ma David Mauga ia Me 27, 2000 ma e oo mai i lona tu’ua ai o le mafutaga, e matua leai se taimi ua ma’ua feupua’i ai, ou te misia o ia i lona loto maulalo ma le le gaoia i taimi uma.”

 

“Fa’afetai fa’apitoa i le tina o Iva Pedro Mauga, ona o lona alo, o se pele ia te ia, sa avea ma ou fa’amalumaluga mo le 21 tausaga o le ma’ua mafutaga. O se tasi e iloga le tamali’i o ona uiga ma ua avea ma fa’amau fa’ailoga o se alo sa matua aoaia lelei e ona tua’a.”

 

“Fa’afetia i le itumalo o Sua #2 i lo latou finagalo ma lo latou fa’atuatuaina o ia e suia le itumalo i lona nofoa i lemaota o sui o le fono faitulafono a le tatou Malo. Fa’afetai mo le avanoa sa ia tautua ai. Peitai e le’i muta ai lona fa’amoemoe inau a ia oo i lea tofiga. Sa ia toe fa’ailoa mai i sana talatalanoa fa’asamamanoa, “E tatau fo’i ona oo atu I le taumafaiga i le sui i le Konekeresi ma le tauva mo le avea ma kovana i se taimi.”

 

“Ua tu’ua nei e Matagi Malotumau David Mauga lona tofi Tiakono, ma  ona aiga, ae maise foi o le mafutaga mafana i le alofa ma le fa’amaoni, ia vi’ia pea le Atua i ana fa’amanuiaga sa oua mauaina ai lenei mafutaga ma la’u pele ua moe malolo fo’i mai tiga o le tino ona o gasegase.”

 

Na soso’o lea ma le tula’I o le tuafafine ina ia tolaulauina se solo matagofie e fa’ailoa ai lagona o le alofa ma le misia o le mafutaga ae maise o toe saafiafiga a le tina matua, tuafafine ma uso o Davey.O ia lea sa fai ma sui o le tina matua, Iva Pedro Mauga.

 

O le afioga le Sui Koana Lemanu Peleti Mauga sa avea ma sui o aiga e molimau ai I le olaga tautua o lona uso la’ititi. “O se tasi e mafai ona fa’atagata matua i le matou aiga, ae la’ititi lava ia i le matou fanauga. E matele ina fa’atalitalia i ai matou tonu. E o atu i matou ua fa’atalitali mai o ia ma le tonu i le tele o fa’alavelave e fia fa’ataunuu. O ia na te iloa uma matou aiga ma so’otaga o aiga. O ia fo/i e vala’au mai e fa’afeso’ota’I i matou uma i mea e fai ma talanoaga e ao ina faia mo fa’alavelae o aiga. O le misia tele lenei uso i le matou mafutaga fa’aleaiga.”

 

O le tofa Matagi sa fa’auu mai le a’oga maualuga a Samoa i le tausaga 1987, ma sa oo atu fo’i lana vasega e faia le latou pese ma le molimau e fa’amavae ai ma David Mauga. Na fa’aauau lea o aoaoga a lea atali’i i le ASCC ma maua ai lona fa’ailoga AS i le Administration i le Justice  i le 1992.

 

Na toe fa’aauau ana aoaoga mo se fa’ailoga  BA i le Administration of Justice ia Me 15, 2010, i le Iunivesite o Hawaii i Hilo. O ia lava o se aloali’i mai le Fagaloa, na soifua a’e i si ona aiga i Fatumafuti ma amata mai ana a’oga i Matafao lea na fa’au’u mai ai le vasega 8 i le tausaga e 1983.

 

O lana ulua’i galugea sa ia galue ai i le US Army Reserve o le Specialist mai le tausaga e 1993-2001. Ona avea lea ma faia’oga I le Manumalo Baptist Academy mo le 10 tausaga o lona soifua mai le 1995-2005.

 

Soso’o lea ma le faigaluega i le Ofisa o le Loia Sili e talafeagai ai ma lona fa’ailoga o le BA in Administration of Justice, mai le tausaga 2005-2015, ma sa avea ma Fa’atonu o le Consumer Affairs, po’o fefa’ataua’iga o oloa taumea’ai mai fafo ma auina atu fo’i i fafo. Ona se’ei ai lea i le tofi mo le ituma,o Sua #2 mai le tausaga e 2015 se’ia oo i le 2019.

 

O le susuga le Tiakono o se alo e fa’asino ia Sialega Palepoi Afamasaga Mauga ma le tina o Iva Pedro Mauga o Fatumafuti.  E to’atasi lava lona alo, o David “Iki” Palepoi. Ia manuia lau malaga.

 

MAE’A TA’AMIOSAGA TU’UGA VA’A FAILA A LE SAILING ASSOCIATION OF AMERICAN SAMOA INC. [SAASI]

 

O le aso Gafua, aso malolo o le Labor Day sa fa’amae’a ai aso e lua o le tu’uga va’a faila a le fanau talavou ua aofia I le Asosi Folau a Amerika Samoa po’o le SAASI.

 

Ua faailoa mai e latalata i le 60 le fanau sa auai mai i aso e lua mo nei tu’uga faitaulia mo le latou olaga taumafai i lea fo’I fa’agatama, o le folaui va’a faila ma e mana’omia lava ona malosi le savili po’o le matagi e lelei ai se’e a nei ituaiga o va’a i luga o le sami.

 

I le fa’aiuga o nei taumafaiga uma a le fanau, sa fa’atulaga ai le tufatufaga o latou fa’ailoga ma le fa’alauiloaga fo’I o i latou ua agava’a i fa’ailoga tulaga muamua se’ia o’o i le tulaga tolu.

 

E oo mai i le aso lona lua o nei tu’uga ua toe o le 21 ali’i ma tamaitai folau i va’a faila o le a tauva ai. Peita’i e le’i taofia ai le isi vasega uma o totino e laiti mai le o atu pea ina ia latou folau fa’asamasamanoa nisi ae tafafao ma ta’a’ele fo’i i le matafaga i Utulei nisi .Ua va’aia fo’I le sapasapaia e matua o le fanau o totino o le SAASI le fa’amoemoe o le fanau, ma ua o atu uma e tapua’ia faiva o tautai i lea aso.

 

Na talafeagai fo’I le tau savili ma le timuga o le aso malolo, ua fa’afaigofie ai faiva i le tai o nai tautai talavou. I le tu’uga sa fa’atulaga i ona vaega e tolu. O ituaiga va’a o Optimist, Laser ma le 420. O le tu’uga lenei sa fa’aigoajna o le Labor Day Regatta. O le tu’uga muamua inau a mae’a tu’ufa’atasia ‘ai na maua mai aso e lua o le tu’uga a le Optimist Open Division ua maua ai le tulaga tolu e Aurora, tulaga lua o Ty ae tulaga tolu ai  Corona. O le tulaga Tu’uga lona lua o le 420 na maua lemtulaga lua e Reagan ma Thomas, ae o le tulaga muamua na maua lea e Tiva ma Jackson.

 

Oo mai le tuuga o le  Laser Open Division sa maua ai le tulaga tolu e Georgia; tulaga lua o Christian ae tulaga muamua ai Victor. Peita’I o le tuuga a le Laser National Womens Ratio na maua lea e Jade Cox, ae o le fa’ailoga a le Men’s Nationa Lser Championship ua maua lea e le ali’i talavou o Victor Chen.

 

Ua fa’ailoa mai le tu’uga lea a tamaitai o le Laser Ratio, na tauivi mai lava i le amataga le tamaitai o Jade Cox ma Emily Chen, e itiiti lava nai ‘ai ua manumalo ai nei Cox i le la’ua tauiviga mo lea Nationa Award.

 

Sa taua’aoina fa’ailoga e le afioga le Faipule o Amerika Samoa i le Konekeresi sa fa’ailoa fo’I lona agaga fiafia ona o lo ua va’aia le naunau o le tupulaga talavou o le atunuu e tauva i lea fo’i fa’agatama e tatau ona matua lelei ai alo o Samoa ma isi atumotu o le pasefika, aua e ola a’e i tatou e matua sio mia o atou motu uma i le sami.

 

E ui ina tetele timuga ma louloua le tai ona o le matagi, sa fa’ataunuu lava tu’uga aua o taimi ia e lelei ai le folau I va’a faila. Fa’amalo le tauivi i lea fo’I fa’agatama i le fanau talavou uma sa auai.