Ads by Google Ads by Google

Tala I Vaifanua


[ata: foa'i]

Pago Pago, AMERIKA SAMOA

 

FA’ATUPEGA A LE COVID-19 – AGAVA’A TOTOGIA FOMA’I MANU MAI USA

 

Fa’ailoa e le tamaitai Faipule o le Itumalo o Fofo, Andra Samoa, “O lo ua matauina e i ai le tinoitupe ua agava’a ona fa’aaoga mai le fa’atupega a le Covod-19, e mafai ona totogia ai se tatou foma’i manu e agava’a ona galue i le Teritori, o i latou lea e fa’afaigaluega mai so’o se setete ma teritpri o le Iunaite Setete ma Teritori o Amerika.”

 

O le tele o atugaluga o lenei tamaitai Faipule e finau ai lava o ia mo le fa’asa’oga o lea tautua, aua e lamatia vave tele le soifua maloloina o tagata e to’atele o loo alaala i Amerika Samoa pe afai ae tuu umi lea tautua e le fa’atinoa i totonu o le atunuu.

 

I sana fa’amatalaga sa le malie lona manaoga e talanoaina lenei mataupu, i le taimi na oo atu ai le alii fa’atonu o Faato’aga e talia faafesili o le Paketi fa’asoa a lana matagaluega. Lea sa ia matauina ai, e le o i ai se vaega tupe ua fa’aagaaga mo le totogi o se foma’i manu, lea e tatau ona nafa ma lea matagaluega.

 

Ina ua le fa’amalieina lona taofi i lea tauaofiaga, sa ia toe sulufa’i atu mo se fesoasoani a le Matagaluega o le Soifua Maloloina, le ali’i fa’atonu Motusa Tuileama Nua, ona o lona naunau lava i le fia maua mai o se foma’i manu mo le atunuu.

 

“E tele mafuaga e ao ai ona fa’ataua fo’i lenei tautua aua e tutusa lelei le aoga o foma’i mo i tatou o tagata soifua, ma le aoga o le foma’i manu i a tatou fagafao ma meaola o lo’o tausia i le malu o tatou aiga.” 

 

“Ona ua le agava’a foma’i manu mai nisi lava malo e latou te okaina vaila’au mo togafitiga o gasegase ma le tausiga lelei o meaola i so’o se teritori ma setete o le Iunaite Setete o Amerika, o le ia lea lape i le matagaluega o Fa’ato’aga i le latou fa’afaigaluegaina o le foma’i manu mai le usoga i Samoa. Ua silafia le fa’aletonu, ma ua tatau fo’i ona su’ea e lea sui foma’i manu suega e mafai ai ona agava’a mo na faiva e ao ina ia faia,” o se atugaluga na ma mea o mamafa i lagona o le tamaitai faipule.

 

O lana toe sailiga lea i le fa’atonu o le Matagaluega o le soifua maloloina, ua maua ane ai le taumafaiga o lo ua nafa nei ma lea ta’ita’i ua taumafai e saili se tinoitupe mai lana matagaluega ina ia mafai ona talosagaina ai se foma’i manu e galue i le tatou teritori. O le fa’anaunauga ia mafai ona fa’aaoga se vaega tupe ua alagatatau e tusa o aiaiga o le Covid-19 i lea fa’amoemoe 

 

O le totogi sa fa’atulaga mo le Foma’i Manu a le Matagaluega o Fa’ato’aga e na’o le $50,000. Peita’i o le seleni o lo ua fia sailia pea e totogia ai se foma’i manu pe a talafeagai ai ma aiaiga o le faatupega o le Covid-19, e $80,000. e oo i le $120,000. ma e talafeagai ma le totogi o foma’i manu agava’a mai le Iunaite Setete o Amerika.

 

AGAVA’A ‘AU FAIFAIVA FA’ATUPEGA MAI LE USDOA

 

Ua fa’ailoa mai le taua’aoina o se vaega tupe mai le USDOA i le vaega o Kamupani Gaosia Mea Taumafa o gaosia mai fua o faigafaiva mai le gataifale, ma ua aofia ai fagotaga o le Tuna.

 

Peita’i, ua fa’ailoa mai, i le aotelega o lea tinoitupe e $530 miliona ua mafai ona talosaga atu ai nisi o Kamupani I’a i le teritori, ae ua i ai fo’i ma le avanoa matagofie e mafai ona talosaga atu ai fo’i le Aufai Faiva po’o Tautai Fagota o le atunuu mo se fesoasoani tau tupe.

 

O lea aotelega o le vaega tupe o le a fa’asoasoa mai lea e le Polokalama mo Fefaatauaiga o Mea’ai Tuu’apa, lea e fa’atupe e le USDA’s Farm Service Agency. Ua fa’ailoa mai e le USDA Farm Services, Sonny Perdue, sa ia fa’ailoa mai fo’i o lenei fesoasoani o lo’o sapaia tele e le ali’i peresetene o Donald Trump.

 

O lo ua aofia le 16 o ituaiga I’a i lenei fa’ataua mo fagotaga, ma e aofia ai le Tuna. Ua faailoa mai e tatau ona fa’aulu talosaga mai le ‘au faifaiva e afua mai ia Setema 14, 2020, ma e tatau ona fa’atumu ma fa’amae’a ona talosaga mo lea alamanuia a’o le’i o’o ia Tesema 14, 2020.

 

O le Ofisa la o le USDA ua i le Pago Plaza i Pago Pago i le latou telefoni numera 684-633-1031 Ext.121. ma e mafai ona maua fo’i le pepa talosaga e fa’atumu i le emeli www.farmers.gov/seafood 

 

E ese mai lea, o le isi lea ala ua taumafai ai malo tele ina ia maua mai nai vaega tupe, e mafai ona fesoasoani i pisinisi laiti, fesoasoani ae maise o nisi ua le maua fo’i ni tupe e tausia ai aiga ona o le fa’asa o le Covid-19. E le gata i lea, ae o lo ua aoga fo’I lenei vaega tupe mo le fa’atautaia o suega o le Covid-19, o aoga a le fanau, tausaiga fa’apitoa o le fanau, atoa ai ma le fa’aleleiga o le tautuaina o tagata lautele i le kilivaina atu o meli.

 

TAMAITAI SAMOA I KALEFONIA MOLIA FA’ASOA O FANAU E FEUSUAI MO TUPE

 

I se lipoti fa’asalalau mai Amerika, o lo’o fa’ailoa ai o Krista Taufa e 34 tausaga le matua ua saisaitia nei e leoleo ma ua molia i lona taumafai e fefa’asoa’i fanau teine talavou ina ia fa’amalie ai le tuinanau tau feusua’iga fa’aleituaiga o nisi, ae totogia tupe i le a’ai o Las Vegas, Nevada. Na saisaitia mai le tamaitai o Taufa mai Highland Kalefonia ia Setema 1, 2020, ina ua gaoia se tasi o pisinisi MGM Grand ma ua fa’ailoa mai o lo’o,feso’ota’i lea gaoiga ma le fefa’ataua’iga o fanau talavou ina ia feusua’i fa’aleituaiga ae togitupe.

 

O Taufa ua avea nei ma sui ua fa’atutu i ai moliga nei, ina ua mae’a ta’utino e se tasi o teine talavou i Leoleo suesue i Las Vegas, o Taufa ma le teineititi lea sa la’ua fa’afetauia o ia ma faailoa atu, e mafai ona faiaiga ae totogia se tinoitupe. 

 

Ua fa’amauina i le lipoti a leoleo, sa te’ena muamua e lenei ali’i lona faiaiga mo se totogi, peita’i inau a fa’aumiumi le talanoaga sa I’u ai ina totogia le potu e o i ai i la’ua nei. Peita’I e le’i umi ona o i le potu ae osofa’ia atu loa i la’ua e Kritian Taufa ma le tamaloa lea ua fa’amauina lona igoa o Joseph Rowe e 51 tausaga le matua.

 

Na fa’asi’ilima le ali’i ma ave’ese uma ana mea totino ma la’ua mana’omia ona totogia atu se tupe ia i la’ua. O le taimi lea na osofa’ia atu loa e  Leoleo le potu ma ave uma i latou i le Ofisa o Leoleo mo suesuega ma fa’amaumauga o lenei lipoti.

 

Ina ua mae’a fa’amaumauga na faauia loa e le Matagaluega o Leoleo a Las Vegas lenei mataupu i le Komiti Tofia mo Tautua mo le Fanau Talavou, ae maise i omiga fa’apea e ono a’afia ai le soifua ma’ale’ale o le fanau a’o le’i avea ma tagata matutua.

 

I le lipoti mai suesuega o le talavou ua fa’amaonia ai i lana molimau, o ia ua mae’a fa’ao’o ai feusua’iga fa’aleituaiga ma ua aofia o ia i se li’o o lea ituaiga o soligatulafono ma o ia sa aumaia e Taufa ma Rowe i Kalefonia ia Aukuso 30, 2020. Ua ia fa’ailoa fo’i sa fa’amalosia o ia e fa’atino aga nei fa’aleituaiga ina ia maua ai se tinoitupe.

 

Ua molia Taufa i le fa’aaogaina o fanau talavou e fa’afaiaiga mo le totogi, tuulafoai o fanau talavou e le’i atoa le 18 tausaga le matutua, osofa’i o le pisinisi ma mea totino a nisi ma le umia o le la’au malosi ma le fa’anaunauga e fa’aaoga e fa’atino ai le gaoia pe ave fa’amalosi o mea totino a nisi, ma le tau fa’amata’u e fa’aaoga ai le fana ma ave fa’amalosia ai mea a isi.