Tala I Vaifanua
Pago Pago, AMERIKA SAMOA -
TALOSAGA PTA TAFUNA HIGH - FA’ASAO PEA LOTOA MO FANAU A’OGA:
O lo ua fa’ailoa mai e le PTA Tafuna le fuafuaga a le Matagaluega o A’oga ina ia latou fa’aaogaina le lotoa pito mai i le alatele i le itu i le malae va’alele o le a latou fa’aaogaina e siitia atu i ai nisi ofisa o le matagaluega o lo’o i Utulei i le taimi nei.
O lea fuafuaga a le Matagaluega o A’oga ua le manatu le PTA e ao ina fa’ataunuu ma ua latou saunia ai se tusi e talosagaina ai le Kovana Sili ina ia faia se fa’aiuga e suia ai lea fuafuaga a le Fa’auluuluga o le Matagaluega o Aoga, ona e mana’omia lava ona lava le malae e fa’aaoga e le fanau a’oga i Tafuna.
O le fonotaga a le Kapineta a le Kovava i le vaiaso ua te’a sa faailoa ai e Fiu Saelua, o le Ofisa o le Erate o le a suia atu mai Utulei i lona nofoaga o i ai, i le Lower Campus a Tafuna, ae o le nofoaga lea o lo’o faamautu i ai le JROTC a lea a’oga maualuga.
E ese mai lea fa’amoemoe mo le ERATE ae ua fa’ailoa mai o lo’o i ai ma le fuafuaga e fa’atu ai ma se isi fale fou mo le Ofisa autu o le DOE i Tafuna lava. O le susuga le Peresetene o le PTA, William Spitzenberg na ia saunia le tusi mo le PTA e fa’aoo atu i le Fa’atonu o A’oga, Dr Ruth Matagi Tofiga, ua talosagaina ai lona auau fa’atasi ma le PTA i Tafuna i lona saini a’ao fa’atasi ma i latou e fa’ao’o atu lea talosaga i le afioga le Kovana Sili, ina ia le tupu lea tulaga.
“Ia talosagaina le tumau pea o lea laufanua ma falea’oga mo le a’oga maualuga a Tafuna High, aua o lo’o to’atele na’ua fanau a’oga ua a’otauina i Tafuna High, ua mana’omia tele lea laueleele e soloa’i i ai isi vasega e faia fa’atinoga i fafo, e pei o le JROTC, ma e talafeagai fo’i le tele o le laufanua mo Tafuna High ona o le to’atele o fanau a’oga o loo a’oa’oina ai.”
Ua i ai nei fuafuaga a le PTA mo le latou tusi ua fa’amau ai saini uma a matua ma faia’oga ina ia fa’aulu atu mo le silafia a le tatou Kovana, ae ua mae’a mautu lo latou fa’amoemoe. Peita’i e muamua lava ona sailia le auga o le fa’amoemoe, pe o sapaia mai e le Fa’atonu Sili o a’oga le latou mau, ina ia fa’aagaaga pea lea laueleele i le lotoa pitoalalo o le Laumua, e mafai ona fausia ai nisi falea’oga mo le lumana’i o lea a’oga e sili ona to’atele i le atunuu atoa.
12 FA’ALAPOTOPOTOGA AGAVA’A MO FA’ATUPEGA HUMANITIES - VAEGA TUPE MAI LE CARES ACT
Ua fa’ailoa mai e to’a 12 Fa’alapotopotoga ua mae’a ona agava’a mo fa’atupega o lo ua fa’amatu’u mai e le Amerika Samoa Humanities Council ma e pasia fo’i lau talosaga e le Komiti Fa’afoe pe afai ua e talosagaina se fesoasoani.
Ina ua fesiligia fo’i le tamaitai fa’atonu o le Amerika Samoa Humanities, Tauaisafune Niualama i le aotelega o le seleni sa latou mauaina mai le CARES Act lea ua maua ai e le to’a sefululua o nei fa’alapotopotoga alamanuia, ae sa ia fa’ailoa mai, “O le aotelega o le seleni ua maua mai le CARES Act e toetoe lava atoa le kuata miliona, $240,000. Peita’i o talosaga foi ua talia nei ua fa’atulaga lava na’o fa’alapotopotoga tumaoti e le o se vaega o le tautua a le Malo ma ona matagaluega eseese.”
O le Komiti Fa’afoe a le Humanities Council o lo’o avea ai le afioga le Maluolefale Faiivae A. Godinet ma ta’ita’ifono.
O lo ua fa’aaogaina nei fa’atupega ina ia mafai ona fesoasoani atu i nei fa’alapotopotoga e toe faaleleia nisi o latou galuega na fa’atino, pe o latou galuega fo’i ua a’afia e mafua mai i fa’asa o le Covid-19.
Ua fa’ailoa fo’i e le Komiti Fa’afoe, “E le’i faigofie ona maua avanoa o nei fa’alapotopotoga e talileleia ai latou talosaga, o polokalama uma nei ua fa’atupe e le HEART Program o le a tatala mo le mamalu lautele e le tatau ona totogia.”
I le taimi o le filifiliga, e faia ona pasia mai lea e le Komiti Fa’afoe ma e le o se pasiga faigofie le faiva sa feagai ai ma i latou. O i latou e to’a 12 ua filifilia nei, ua mae’a fono ma pasia lelei fo’i e le Komiti, ua fa’ailoa ai le aoga fo’i o latou galuega fa’atino i le agaga e fa’aauau ona fa’aauupegaina le tagata o a taeao e i latou o soifua i le taimi nei. O latou folasaga foi o le a aoga lea e fa’aoaina ai a taeao i le sao o le Amerika Samoa Humanities i aganuu a Samoa ma ana agaifanua.”
Ua fa’afetaia e le tamaitai fa’atonu le tapenaga lelei sa mafuli i ai nei fa’alapotopotoga ma lo latou naunauta’i ina ia fa’aauau tu ma aga a Samoa, “Ia le tafea i le auau a tatou measina ua mae’a tuulima mai ia i tatou e o tatou tua’a ua mavae atu.”
O fa’alapotopotoga nei e to’a 12 ua agava’a i nei fa’atupega e aofia ai:
• Mafutaga Tina EFKAS Amaluia
Samoa Musika Foundation Incorporated
• Intersections
• Friends of the Museum of American Samoa
• EFKAS Nu’uuli
• Parents of Children with Special Needs Network
• CCCS Ierusalema Fou
• Le Vasa
• Pasefika Community Connection
• Malosiaga Mo Samoa
• Le Taupou Manaia
• Pacific Island Foundation
O le fa’atupega ua toina mai lea e le National Endowment of the Arts [NEH] a le Malo Tele, e faauia mai i le CARES Act a le Coronavirus Act 2020 ia sapaia pea galuega fa’atino uma fa’aleaganuu ma agaifanua a tagata lautele o le teritori o Amerika.
I talosaga sa fa’aulu mai na suesueina auiliili e le Komiti Faafoe o le Humanities, ma e i ai ona fa’atulagaga e tatau ona fa’amautu o lo’o agaga i ai le polokalama ua fa’ailoa mai e i latou na talosaga. E tatau ona fa’alauiloa fa’alauaitele i le mamalu lautele o le atunuu ina ia mafai ona fa’aaoga e le Amerika Samoa Humanities e fa’aalia ai le so’otaga ma le tala fa’asolopito o le atunuu, ia fa’ailoa fo’i le tulaga o le mana’omia o i ai mo le faatinoga ma ia iloga lava se a’afiaga tuga o lenei taumafaiga ona o le fa’asa o le Coronavirus.
Ua fa’ailoa atu fo’i le agaga fiafia tele o le Komiti Fa’afoe ina ua mafai ona toe soso’o le talosaga a le Utumea CCCAS Youth ma le Tauaitala Foundation.
Pe nafai fo’i e mana’omia lava e so’o se fa’alapotopotoga tumaoti se fa’atupega mai nisi lava tupe toina atu e le Amerika Samoa Humanities i so’o se masina o le tausaga e mafai ona ulufale atu ma taua’aoina atu sau pepa talosaga e faatumu, e aunoa lava ma se totogi. O le toe aso mo talosaga e fa’aulu atu ma isi lava polokalama faatino a le Humanities e muta lea ia Setema 28, 2020.